Oziq ovqat texnologiyasi

Avtoklav (37-rasm) ichiga sirkulyasiya trubasi (1) o‘rnatilgan bo‘lib, silindrik qism, sferik taglik va qopqoqdan iborat. Truba (1) ichiga purkagich (4) orqali bosimi 2,5 MPa gacha bo‘lgan ochiq bug‘ beriladi. Yog‘ va suv avtoklav tubigacha tushirilgan truba (2) dan beriladi. Bu truba apparat tubigacha tushirilgani uchun birinchi bosqich gidrolizdan so‘ng glitserinli suvni chiqib ketishini ta’minlaydi. Truba (3) esa ikkinchi bosqich gidrolizdan so‘ng yog‘ kislotalari chiqib ketishi uchun xizmat qiladi.
Sferik yuzada truba (2 va 3) lar shtutserlari mavjud, bundan tashqari bug‘ chiqishi yoki avtoklavdagi kislotani chiqishi uchun kerakli bosimni ta’minlaydigan bug‘ning kirishi uchun shtutser hamda nazorat o‘lchov asboblari uchun shtutserlar o‘rnatilgan. Sanoatda sig‘imi 9,5 -20 m³ bo‘lgan,kislotaga chidamli po‘latdan yasalgan avtoklavlar keng qo‘llaniladi.
Glitserinli suvni tozalash. Yog‘larni reaktivsiz parchalashdan olingan glitserinli suv tarkibida, glitserin va suvdan tashqari, xilma xil turdagi organik va mineral aralashmalar ham bo‘ladi. Bu aralashmalar miqdori gidrolizlanayotgan moy sifati va assartimentiga bog‘liq. Aralashmalarning ko‘p qismi lipidlar, ayniqsa yog‘ kislotalari bo‘lib, ular glitserinli suvning 0,3-1,5% ini tashkil etadi. Bundan tashqari 0,05-0,1% amino birikmalar, jumladan, 0,02-0,04% amino kislotalar, 0,04-0,08% karbonal birikmalar, 0,004-0,008% uglevodlar, mineral tuzlar va boshqalar mavjud.
Bu moddalarning ko‘pligi sirt aktivligiga ega bo‘lib, suv-yog‘ emulsiyasi turg‘unligini oshiradi. Bu esa glitserinli suvni qayta ishlashni qiyinlashtiradi.
Glitserinli eritmani konsentrlashdan avval, u aralashmalardan tozalanadi. Bundan maqsad:
- birinchidan, standart talablarga javob beradigan toza glitserin olish
- ikkinchidan, bug‘latish jarayonini texnologik shartlarini to‘liq ta’minlash (isitish trubalarida qo‘yqa hosil bo‘lishini kamaytirish vakuum apparatlarda glitserinni ko‘piklanishini oldini olish va boshqalar)
- uchinchidan, apparatni korroziyadan himoya qilishdir.