Oziq ovqat texnologiyasi

Yog‘ kislotalarini uzluksiz distillyasiyalashning texnologik sxemasi (42-rasm). Xom yog‘ kislotalari (1) sig‘imga keladi, u yerdan (2) vakuum – quritish apparatiga tortib olinadi, u yerda yog‘ kislotalari 120-130 ⁰C gacha isitiladi, quritiladi, deaeratsiyalanadi va oson uchuvchi moddalar xaydaladi, ular (11) tutgichda yig‘iladi. Yog‘ kislotalari quritish apparatida 40-50 min davomida 25-30 mm simob ustuni bosimda ushlab turiladi. Quritish apparatidan yog‘ kislotalari uzluksiz ravishda (3) distillyasiya kubiga o‘tadi, u yerda yog‘ kislotalari asta-sekin 210-240⁰C gacha isitiladi va 6-7% o‘tkir bug‘ berib bug‘latiladi (bosim 10mm simob ust). Yog‘ kislotalari tomchi tutgich (12) dan, o‘tib (4) kondensatorga keladi. Kondensatsiyalangan yog‘ kislotalari (5) vakuum-yig‘gichda yig‘iladi, keyin (6) sig‘imga, u yerdan (7) nasos bilan omborga yoki sovun sexiga yuboriladi.
Gudron uzluksiz ravishda tushirib turiladi va u bak (8) da yig‘iladi; u yerda 70-75⁰C gacha sovutiladi, keyin (9) gudron sig‘imga tushib (10) nasos bilan saqlashga yuboriladi.
Gudron neytral yog‘, yog‘ kislotalari (20-25%) oksikislotalar, sovunlan-maydigan moddalar, gossipol va turli uchmaydigan moddalardan iborat. Gudron miqdori shu moddalarning xom yog‘ kislotadagi miqdori va distillyasiya rejimiga bog‘liq. Yuqori harorat va distillyasiya kubiga havo kirishi natijasida gudron miqdori oshadi. Sistemada vakuum uch bosqichli bug‘-ejektori vakuum nasosi yordamida hosil qilinadi.
Uzluksiz ishlaydigan distillyasion kub (43-rasm) silindrik apparat bo‘lib, tubiga 9 ta seksiya (1) o‘rnatilgan. Seksiyalar elektr isitkich (5) yoki yuqori haroratli organik issiqlik eltgich bug‘lari (VOT) yordamida qizdiriladi. 0,3MPa bosimli ochiq bug‘ning berish uchun barbatyor (6) joylashtirilgan. Xom yog‘ kislotalari markaziy seksiyadan kub, doirasi bo‘ylab joylashtirilgan 8 ta seksiyaga shtutser (2) orqali ketma-ket oqib o‘tadi. Distillyasiya yuzaga kelib, yog‘ kislotalari bug‘lana boshlaydi.
Kubning yuqori qismida yog‘ kislotalari tomchilarini mexanik ravishda ajratadigan ikkita konussimon tutgich (3)lar va 5 mm teshikli panjara o‘rnatilgan. Patrubka (4) orqali esa yog‘ kislotalari bug‘lari kondensatorga chiqib ketadi.
Gudron esa apparatning oxirgi seksiyasidan uzluksiz chiqib turadi. Kub kislotaga chidamli po‘latdan yasalgan bo‘lib, isitish yuzasi 11,85 m² ga teng.