O`zbekiston sharoitida iqlimlashtirilgan lola daraxti alkaloidlarini tadqiq etish” mavzusi bo’yicha

ХУЛОСАЛАР

1. 
   Хаудаг манбасининг “Каттақум-2” қудуғи ерости гидротермал сувларидаги йод миқдори ва унинг топилиш шакллари ўрганилди. Бу сувлар таркибида йод йодидлар (68-70%), йодатлар (12-14%), йод хлориди (8-10%) ва молекуляр йод (6-8%) шаклларида бўлиши аниқланди. Тажрибалар натижасида олинган маълумотлар асосида йоднинг умумий миқдорини математик қайта ишлаш амалга оширилди ва олинган маълумотлар ерости сувларидан йодни ажратиб олишнинг такомиллаштирилган технологиясини ишлаб чиқишга қўлланилди.
   
2. 
   Таркибида йод сақлаган сувларда йод ва унинг табиий бирикмаларининг миқдорини аниқлашда қўлланилган усуллардан - соддалиги, етарлича сезгирлиги, тезкорлиги ва арзонлиги билан ажралиб турадиган титриметрик ва потенциометрик усуллар энг яхши аналитик усуллар эканлиги аниқланди. Йод ва унинг бирикмаларини аниқлашда титриметрик усулнинг сезгирлиги - 0,01 мг/л ни ташкил этади, потенциометрик усулда - 0,02 мг/л, иккала усулда нисбий стандарт четланиш 4-5%. Мазкур объектда қўлланиладиган йод ажратиб олишни потенциометрик усулда назорат қилиш услуби синовдан ўтказилди ва тадбиқ этилди.
   
3. 
   Тадқиқ қилинаётган сувлардаги йод бирикмаларини оксидлаш учун оксидловчилар сифатида натрий персульфат, натрий нитрит, кальций гипохлорит ва водород пероксид ишлатилди. Йодид ионининг водород пероксиди, натрий нитрити ва кальций гипохлорити таъсирида оксидланиши динамикаси бўйича тегишли маълумотлар олинди. Оксидловчиларни қиёсий таҳлил қилиш натижасида йод бирикмаларини оксидлаш учун кальций гипохлорит ва водород пероксид таклиф этилди.
   
4. 
   «Каттақум-2», «Учқизил», «Кокайти» ва «Ўртабулоқ» қудуқларидаги ерости гидротермал сувларидаги йод бирикмалардан йодни ажратиб олишда, бу сувларда минераллашганликнинг 113 г/л дан 283 г\л гача ортиши, сарфланадиган оксидловчилар ва кислота эритмасининг миқдорига пропорционал боғлиқ бўлиб, оксидловчилар 2,5 ва сульфат кислотаси эритмаси эса 1,5 марта ошиши исботланди.
   
5. 
   Абсорбентдаги элементар йодни чўктириш учун оксидловчилар сифатида К₂Сr₂О₇, КСlOз, Н₂О₂, Са(СlO)₂, КМnО₄ ва NaNО₂ синовдан ўтказилди. Натрий нитрит ва водород пероксидларининг экологик хавфсизлиги, яроқлилигининг юқорилиги ва нархи арзонлиги аниқланди. Натижада, олинган маълумотлар технологик жараённи мақбуллаштириш имконини яратди.
   
6. 
   Тажрибалар асосида ва MATLAB амалий дастурини қўллаган ҳолда абсорбент таркибидаги 85-90% кристалл йодни ажратиб олиш имконини берадиган сульфат кислота эритмаси учун рН=2,95 мақбул қийматга эга эканлиги аниқланди.
   
7. 
   Хаудаг ҳудудидаги тадқиқ этилаётган гидротермал сувларнинг физик-кимёвий хоссалари ўрганилди ва бу сувларнинг босим кўрсаткичлари (28 атмосфера), ҳарорати (76°С) ва бромидли минералланиш (220 г/л) юқори қийматларга эга эканлиги аниқланди.
   
8. 
   Йодид ионларининг элементар йодгача оксидланиш тезлиги йоднинг йодат ионигача оксидланиш тезлигидан сезиларли даражада катта бўлиши аниқланди, натижада, йоднинг ҳаво фазасига десорбцияси 94 % - гача етади. Потенциометрик ва УБ-спектрофотометрик усулларда абсорбентлар эритмаларидаги йоднинг ажралиш механизми ва бу жараёндаги оксидловчиларнинг роли кўрсатилди.
   
9. 
   Сурхондарё вилояти Хаудаг ҳудудидаги ерости гидротермал сувларидан десорбция қилинган йодни концентрацияси 5-8% ишқор эритмасида юттириб ажратиб олишда ҳаво-десорбция технологик схемаси танланди. Элементар йодни тадқиқ қилинган сувлардан ва абсорбентлардан ажратиш услуби такомиллаштирилди. Натижада абсорбентдаги йоднинг қолдиқ концентрациясини 0,63-0,58 г/л дан 0,2 г/л гача камайишига эришилди, бу эса қўшимча 49 кг йод олиш имконини яратди.