O‘zbekiston respublikasi yoshlar ishlari agentligi o‘zbekiston respublikasi oliy va o‘rta-maxsus ta’lim vazirligi o‘zbekiston yoshlar ittifoqi markaziy kengashI

O‘ZBEKISTON RESPUBLIKASI YOShLAR IShLARI AGENTLIGI
O‘ZBEKISTON RESPUBLIKASI OLIY VA O‘RTA-MAXSUS
TA’LIM VAZIRLIGI
O‘ZBEKISTON YOShLAR ITTIFOQI MARKAZIY KENGAShI
O‘ZBEKISTON VOLONTYORLAR ASSOTSIATSIYASINING
QO‘ShMA QARORI


Oliy ta’lim muassasalarida volontyorlik markazlarini tashkil etish
to‘g‘risida

1. O‘zbekiston Respublikasining “Volontyorlik faoliyati to‘g‘risida”gi Qonuni hamda O‘zbekiston Respublikasi Vazirlar Mahkamasining 2021-yil 18-yanvardagi “O‘zbekistonda yoshlarga oid davlat siyosatini 2025-yilgacha rivojlantirish konsepsiyasini tasdiqlash to‘g‘risida”gi 23 - son Qarorini ijrosini taʼminlash maqsadida O‘zbekiston Respublikasi Yoshlar ishlari agentligi, O‘zbekiston Respublikasi Oliy va o‘rta-maxsus taʼlim vazirligi, O‘zbekiston yoshlar ittifoqi Markaziy Kengashi hamda O‘zbekiston volontyorlar assotsiatsiyasi qaror qiladi:

2. Quyidagilar:
Oliy taʼlim muassasalarida Volontyorlik markazlarini tashkil etish bo‘yicha respublika ishchi guruh tarkibi 1-ilovaga;
Oliy taʼlim muassasalarida Volontyorlik markazlarini tashkil etish to‘g‘risida nizom 2-ilovaga;
Oliy taʼlim muassasalarida Volontyorlik markazlarini tashkil etish bo‘yicha chora-tadbirlar dasturi 3-ilovaga;
Oliy ta’lim muassasalarida tashkil etilayotgan Volontyorlik markazlari ro‘yxati 4-ilovaga muvofiq tasdiqlansin.
3. Vazifalar taqsimoti:
3.1 Yoshlar ishlari agentligi Markazlarni zamonaviy moddiy-texnik bazasi bilan ta’minlash, volontyorlik faoliyatiga oid uslubiy qo‘llanmalar yaratish va barcha oliy ta’lim muassasalariga tarqatish, volontyor mentor-trenerlar uchun o‘quv seminarlar tashkil etish ishlarini amalga oshirishga mas’ul etib belgilanadi.
3.2 Oliy va o‘rta maxsus ta’lim vazirligi Markazlarning infratuzilmasini ta’minlash, samarali faoliyat olib borishi uchun barcha sharoitlarni yaratib berish,
eng faol volontyor talabalarni umumiy yig‘inlarda e’tirof etgan holda doimiy rag‘batlantirib borish ishlariga mas’ul etib belgilanadi.
3.3 O‘zbekiston Yoshlar ittifoqi Markazlar faoliyatini muvofiqlashtirish, talabalar orasida keng targ‘ib qilish, volontyorlik loyihalarni amalga oshirish uchun moliyaviy ko‘mak berish ishlariga mas’ul etib belgilanadi.
3.4 O‘zbekiston volontyorlar assotsiatsiyasi Markazlar faoliyatini yo‘lga qo‘yish va ularga uslubiy ko‘mak berish, volontyorlik loyihalarini Markaz volontyorlari orqali amalga oshirish mentor-trenerlar uchun o‘quv oromgohlarga malakali trenerlarni jalb qilish ishlariga mas’ul etib belgilanadi.
4. Mazkur qaror ijrosini nazorat qilish Respublika ishchi guruhi zimmasiga yuklatilsin.