O‘zbekiston respublikasi yer resurslari, geodeziya, kartografiya va davlat kadastri davlat qo‘mitasi to‘G‘risidagi hamda yer munosabatlari va davlat kadastrlarini rivojlantirish jamg‘armasi to‘G‘risidagi nizomlarni tasdiqlash haqida

6-bob. Yakunlovchi qoida

32. Davyergeodezkadastrni qayta tashkil etish va tugatish qonun hujjatlarida belgilangan tartibda amalga oshiriladi.

Vazirlar Mahkamasining 2017-yil 19-iyuldagi 529-son qaroriga
2-ILOVA

Yer munosabatlari va davlat kadastrlarini rivojlantirish jamg‘armasi to‘g‘risida

NIZOM

1-bob. Umumiy qoidalar

1. Mazkur Nizom O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasining Yer munosabatlari va davlat kadastrlarini rivojlantirish jamg‘armasi (keyingi o‘rinlarda Jamg‘arma deb ataladi) mablag‘larini shakllantirish va ulardan foydalanish tartibini belgilaydi.

2. Jamg‘arma O‘zbekiston Respublikasi Prezidentining “O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi faoliyatini yanada takomillashtirish chora-tadbirlari to‘g‘risida”gi 2017-yil 31-maydagi PQ-3024-son qaroriga muvofiq O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasining (keyingi o‘rinlarda Davyergeodezkadastr deb ataladi) amaldagi shtatlariga qo‘shimcha ravishda kiritilgan shtat birliklarini saqlash, Davyergeodezkadastrning moddiy-texnika bazasini mustahkamlash va rivojlantirish, uning xodimlarini rag‘batlantirish, ijtimoiy himoya qilish va qo‘llab-quvvatlash, qayta tayyorlash va malakasini oshirishni moliyalashtirish maqsadida tashkil etiladi.

3. Jamg‘arma yuridik shaxs hisoblanmaydi va uning mablag‘lari O‘zbekiston Respublikasi Moliya vazirligining G‘aznachiligida ochilgan Davyergeodezkadastrning yagona shaxsiy hisobvarag‘ida jamlanadi.