O‘zbekiston respublikasi xalq ta’limi vazirligi respublika ta’lim markazi umumiy o‘rta ta’limning adabiyot fanidan davlat ta’lim standarti va o‘quv dasturi toshkent-2017

Mavzu. “Ota vasiyati” ertagi. (A2+: 2 soat)

Ertakning syujeti va kompozitsiyasi. Uning asosiy qahramonlari. Ota va o‘g‘illar: ikki katta akadagi manfaatparastlik, ochko‘zlik va xudbinlikning qoralanishi. Kenja o‘g‘il qiyofasida otalar o‘gitiga sadoqat, mehribonlik, mardlik, tantilik xislatlarining ulug‘lanishi. Ertakdagi sehrli vositalar obrazi. Ertakning asosiy g‘oyaviy va badiiy xususiyatlari. Ertak qahramonlarining o‘ziga xosligini ko‘rsatishda dialogning o‘rni.

Nazariy ma’lumot: Sehrli ertaklar.

Mavzu. A.S. Pushkin. “Shoh Saltan haqida ertak”. (A2+: 3 soat)

Ijodkor haqida qisqacha ma’lumot. Ertakda mehr va mehrsizlik, yaxshilik va yomonlik, to‘g‘rilik va egrilik hamda ularning oqibati qanday natijaga olib kelganligi. Yaxshilik va ezgulik tantanasining ertakda mahorat bilan ifodalanganligi.

O‘quvchilarda shakllangan fanga oid kompetensiya elementlari:
Adabiy-nutqiy kompetensiyalar (tinglab tushunish, fikrni og‘zaki bayon qilish, o‘qish, fikrni yozma bayon qilish):

A2

ertak va masallar asosida ishlangan videotasvir va filmlarni ko‘rib, tinglab tushuna oladi;

maqol, topishmoq, masal va ertak namunalarini o‘qiy oladi;

ularning mazmun-mohiyatini tushuna oladi;

masal va ertaklar syujetini qayta hikoya qila oladi.

A2+

ifodali o‘qishda to‘g‘ri nafas olish, to‘xtamning ahamiyatini tushuna oladi;

mustaqil o‘qilgan asarlarning syujetini qayta hikoya qila oladi.