O‘zbeкiston respubliкasi

20-§. Yozuvning tarixiy ahamiyati. Yozuvning kelib chiqishi va taraqqiyoti jamiyat taraqqiyoti bilan, uning madaniyatining yuqori saviyaga ko‘tarilishi, shuningdek, siyosiy-huquqiy, estetik va shu kabi fikrlarni qayd qilish hamda keyingi davrga qoldirishga bo‘lgan ehtiyojning o‘sishi bilan bog‘liq. Demak, yozuv jamiyatning eng buyuk madaniy kashfiyotidan biri bo‘lib, kishilik jamiyatining har tomonlama taraqqiyotida juda katta roli va o‘ziga xos ahamiyati bor.
Xalqlarning qadimiy yozuvini o‘rganish juda katta nazariy va amaliy ahamiyatga ega. Yozuvni o‘rganish va ilgarigi davrda yaratilgan yozma yodgorlikni o‘qish qadimda amal qilgan tilning leksik-grammatik xususiyatini, o‘sha yodgorlik egasi bo‘lgan xalqning tarixiy urf-odati va madaniyati bilan yaqindan tanishish imkoniyatini beradi.
Agar yozuv bo‘lmaganda, ajdodlarimiz tomonidan yaratilgan yuksak madaniyat namunalari yetib kelmagan bo‘lar edi. Homer, Beruniy, Yusuf Xos Hojib, Firdavsiy, Nizomiy, Ulug‘bek, Navoiy, Bobur, Pushkin kabi buyuk siymolarning ajoyib fikrlaridan bahramand bo‘la olmas edik.
Jamiyatda kitob, gazeta, jurnal va umuman matbuotning ta’lim-tarbiyaviy ahamiyati yuksak darajaga ko‘tarila borayotgan hozirgi paytda yozuvning, yozma nutqning roli ham o‘sib, ta’sir doirasi kengayib bormoqda.