O’zbekiston Respublikasi Sog’liqni saqlash vazirligining 2019 yil "25"areldagi "107" sonli buyrug’ining2-ilovasi bilan fan dasturi ro’yxati tasdiqlangan

5. Klinik manzarasi.

Temir yetishmovchilik anemiyasining klinik manzarasi umumiy anemiya simptomlaridan iborat bo’lib, bu gemik gipoksiya va to’qimada temir yetishmovchiligi belgilari bilan namoyon bo’ladi (sideropenik sindrom).

Anemiyaning umumiy simptomlari sideropenik sindrom – bosh aylanishi, holsizlik, bosh og’rig’i (ko’proq kechki vaqtda), hansirash, yurak urishining tezlashishi, hushdan ketishga moyillik, ba’zan arterial bosim baland bo’lmagan holda ko’z oldida qora nuqtalar uchishi, haroratning biroz ko’tarilishi, kunduzgi uyquchanlik, kechasi yomon uxlash bezovta qiladi. Ba’zida epigastral og’riq, ishtahaning yomonlashishi, dispeptik simptomlar, ko’ngil aynishi, meteorizm kuzatiladi. Terining qon bilan ta’minlanishi yomon bo’lganligi sababli bemorlar sovuqqa sezuvchan bo’lib qoladi. Bu shikoyatlarning yuzaga chiqishi anemiyaga moslashish bilan bog’liq. erkaklar anemiyani ayollarga nisbatan, qariyalar esa yoshlarga qaraganda og’irroq o’tkazishadi. Anemiyaning sekin kechishi moslashuvni osonlashtiradi. Anemiyaning inson ruhiyatiga ta’sir qilishi isbotlangan. Bemorlarga jahldorlik, yig’loqilik, injiqlik, xotiraning va diqqatning pasayishi xos. Jismoniy va ruhiy rivojlanishdan orqada qolish kuzatiladi.

Gemoglobin 80 g/l dan past bo’lgan holda uzoq davom etuvchi temir yetishmovchiligiga quyidagi sindromlar hos: «epitelial», astenonevrotik, yurak qon tomir, gepatolienal va immunodefitsit sindromi. Bu sindromlar yakka holda yoki birgalikda kelishi mumkin (sideropenik sindrom).