O’zbekiston respublikasi prezidentining kitobxonlik haqidagi qarorlari va bu borada amalga oshirilayotgan ishlar

Kitobxonlik targ‘iboti oiladan boshlansa

Toshkent viloyati O‘rta Chirchiq tumanida O‘zbekiston Yozuvchilar uyushmasi va Respublika Xotin-qizlar qo‘mitasi hamkorligida “Kitob o‘qish oiladan boshlanadi” shiori ostida kitob aksiyasi o‘tkazildi. 

Shu munosabat bilan viloyat ma’naviyat va ma’rifat markazida tashkil etilgan tadbirda O‘zbekiston Yozuvchilar uyushmasi raisi M.Ahmedov, Respublika Xotin-qizlar qo‘mitasi raisi o‘rinbosari G.Ma’rupova va boshqalar mamlakatimizda yoshlarni kitobga oshno qilish, kitob mutolaasi yordamida yot g‘oyalar ta’siridan asrash, ertamiz egalarini vatanparvarlik va milliy qadriyatlarimizga hurmat ruhida tarbiyalashga alohida e’tibor qaratilayotganini ta’kidladi. 

Prezidentimiz Shavkat Mirziyoyevning 2017-yil 12-yanvardagi “Kitob mahsulotlarini chop etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targ‘ibot qilish bo‘yicha komissiya tuzish to‘g‘risida”gi farmoyishi bu boradagi ishlarni yangi bosqichda davom ettirishda muhim dasturilamal bo‘layotir. 

Tadbirda viloyatdagi mahalla fuqarolar yig‘inlarida tashkil etilgan kutubxonalar faoliyatini samarali yo‘lga qo‘yish, aholi, xususan, yoshlar orasida kitobxonlikni kuchaytirish uchun ko‘proq nimalarga ahamiyat qaratish lozimligi haqida fikr almashildi. Mahalla fuqarolar yig‘inlariga O‘zbekiston Yozuvchilar uyushmasi huzuridagi “Ijod” jamoat fondi tomonidan nashr etilgan turli nomdagi kitoblar topshirildi. 

– Yoshlarning kitobga qiziqishini oshirish, aholi o‘rtasida mutolaa madaniyatini yuksaltirishda mahallalarda tashkil etilayotgan kutubxonalarning ahamiyati katta, – deydi Bo‘stonliq tumani “Beshtut” mahalla fuqarolar yig‘ini raisi M.Mirabdullayev. – Aksiya doirasida bildirilgan fikrlardan xulosa chiqargan holda, mahallalarda, ta’lim muassasalarida nafaqat yoshlar, balki ota-onalar o‘rtasida kitobxonlikni targ‘ib qiluvchi ko‘rik-tanlovlar, ma’naviy-ma’rifiy tadbirlar tashkil etishni maqsad qildik. 

Tadbir doirasida O‘zbekiston xalq shoiri Mahmud Toirning “Armon tuni” deb nomlangan kitobi taqdimoti bo‘ldi. Yoshlar atoqli shoirlarimiz she’rlaridan namunalar o‘qidi.

Kitobxonlik targ'iboti

Zahiriddin Muhammad Bobur nomidagi Andijon viloyat musiqali drama va komediya teatri yonida kitob javoni shaklidagi kutubxona tashkil etildi.
Mazkur tashabbusni ilgari surgan viloyat hokimi namuna sifatida mo‘jaz kutubxona uchun shaxsiy jamg‘armasidan 200 ta kitob sovg‘a qildi. Kutubxona soat 8.00 dan 21.00 ga qadar ishlaydi. Javondan foydalanuvchilaro‘zlari tanlagan kitobni shu yerning o‘zida yoki uyda mutolaa qilib, so‘ng qaytarishlari mumkin.
Kitobxonlik targ‘ibotiga xizmat qiluvchi bunday kutubxonalar soni tez kunlarda viloyat bo‘yicha 500 taga yetkaziladi.