O`zbekiston respublikasi oliy va o`rta maxsus ta`lim vazirligi zahiriddin muhammad bobur nomidagi andijon davlat universiteti axborot texnologiyalari va kompyuter injineringi fakulteti

O`zbekiston Respublikasi Oliy va o`rta maxsus ta’lim vazirligining 1998 yil

30 oktyabr 305 sonli buyrug`i bilan tasdiqlangan

“O`zbekiston Respublikasi oliy ta`lim muassasalari talabalarining Ishlab chiqarish amaliyoti haqida NIZOM” idan

KO`CHIRMA

1.Umumiy qoidalari

1.1. Mazkur Nizom O`zbekiston Respublikasining “Ta`lim to`g`risida” gi qonuni va Kadrlar tayyorlash milliy dasturi, O`zbekiston Respublikasi Prezidentining 2008 yil 29 apreldagi “Loyiha-tadqiqot tashkilotlari faoliyatini yanada takomillashtirish chora-tadbirlari to`g`risida”gi PQ-847-sonli qarori talablariga mos ravishda ishlab chiqilgan.

1.2. Mazkur Nizom loyiha-tadqiqot tashkilotlari uchun mutaxassis kadrlar tayyorlaydigan oliy ta`lim muassasalari talabalarining Ishlab chiqarish amaliyotini o`tkazish shakllari, tartibi va uslublarini belgilaydi.

Ishlab chiqarish amaliyotning vazifasi loyiha-tadqiqot tashkilotlariga malakali mutaxassis kadrlarni tayyorlash, talabalarning o`rganayotgan kasblari bo`yicha bilim saviyalarini oshirish va takomillashtirishdan iboratdir.

Ishlab chiqarish amaliyot oliy ta`lim muassasalarida malakali kadrlar tayyorlash bo`yicha mutaxassis tayyorlash jarayonining asosiy tarkibiy qismi hisoblanadi.

1.3. Bakalavriat yo`nalishlari mutaxassislari bo`yicha kadrlar tayyorlashning muhim qismi bo`lgan talabalar amaliyoti - ta’lim olish sohalariga tegishli korxona, muassasalar va tashkilotlarda o`tkaziladi.

1.4. Ishlab chiqarish amaliyotni o`tkazish muddati, mazmuni va hajmi O`zbekiston Respublikasi Oliy va o`rta maxsus ta`lim vazirligi tomonidan tegishli mutaxassislar yo`nalishlari bo`yicha tasdiqlangan o`quv rejalari va amaliyot dasturlari asosida belgilanadi.

Ishlab chiqarish amaliyotlar bakalavriat yo`nalishlari mutaxassisliklari davlat ta`lim standartlarida ko`zda tutilgan turli shakllarda tashkil qilinadi.

1.5. Ishlab chiqarish amaliyoti o`tkazilishi mo`ljallangan loyiha-tadqiqot tashkilotlari bilan talabalarning Ishlab chiqarish amaliyotni o`tkazish to`g`risida shartnoma tuziladi.

Shartnomada mutaxassisliklar bo`yicha Ishlab chiqarish amaliyotga yuborilayotgan talabalar soni, uni o`tkazish muddati, sharoit va tartiblari, ishlab chiqarish texnologiyasi, sanitar-texnik tozalik talablari va mehnat sharoiti va tomonlarining o`zaro majburiyatlari ko`rsatiladi.

Talabalarni Ishlab chiqarish amaliyotiga yuborayotgan oliy ta’lim muassasasi har bir loyiha-tadqiqot tashkilotlari bilan alohida shartnoma tuzadi.

Shartnoma tuzilgandan so`ng oliy ta’lim muassasasi loyiha-tadqiqot tashkilotlari bilan hamkorlikda Ishlab chiqarish amaliyotning kengaytirilgan dasturini ishlab chiqadi va tasdiqdan o`tkazadi. Dastur loyiha-tadqiqot tashkilotlarida xizmat va boshqa bo`limlarining sharoiti hamda imkoniyatlaridan kelib chiqqan holda, o`quv dasturida ko`zda tutilgan turli ishlarning mazmuni, hajmi va ketma-ketligini o`z ichiga oladi.

1.6. Amaliyot dasturlari tanlangan yo`nalish (ixtisoslik)ning Ishlab chiqarish talablari, korxona, muassasa, tashkilotlarning (bundan buyon-amaliyot ob’ektlari) tavsifi hisobga olingan holda ishlab chiqiladi.

1.7. Ta`lim muassasalari ta’lim yo`nalishlarining o`ziga xosligi va kadrlar buyurtmachilari talablarini hisobga olib, oliy ta’lim muassasasi ilmiy kengashi qaroriga muvofiq amaliyotning boshqa turlarini kiritish huquqiga ega.