O’zbekiston respublikasi oliy va o`rta maxsus ta`lim vazirligi

Oliy ta’limning magistratura bosqichida qo‘yiladigan talablar majmuasi:

1. 
   Zaruriy bilimlarni o‘zlashtirishda o‘qitiladigan barcha fanlarning bir-biri bilan o‘zaro aloqadorligini bilish.
   
2. 
   Qiziquvchanlik. Kasbiy yetuklikka erishish, insonning tanlagan kasbi bilan bog‘liq bo‘lgan ehtiyojlarining hissiy namoyon bo‘lishi.
   
3. 
   Ta’lim yunalishi asosida tanlagan mutaxassisligi bo‘yicha chuqur bilim, ko‘nikma va malakaga ega bo‘lish.
   
4. 
   Ilmiy pedagogik, ilmiy tadqiqotchilik faoliyatining asoslarini o‘rganish.
   
5. 
   Ta’lim menejmentini bilish.
   
6. 
   Ilmiy tadqiqotning metodologik asoslarini bilish.
   

Xulosa qilib aytganda, mamlakatimizda yuksak ma’naviyatli shaxsga qo‘yiladigan talablar majmuining tarkibiy qismi sifatida kasbiy mahorat ham belgilangan. Kasbiy kompetentlik – bo‘lg‘usi o‘qituvchi-pedagog kasbiy mahorati o‘lchovchi muhim mezonlardan biri sanaladi hamda uning kompleksligini ta’minlaydi.
Soha mutaxassislari N.A.Muslimov, Z.Q.Ismoilova, N.Gaipova, O.Qo‘ysinov, Q.Olimov, Sh.Abdurahmonov, M.Qodirovlarning fikricha, shaxsda kasbiy mahoratni shakllantirish quyidagi mazmunda amalga oshirilishi mumkin:
– ta’lim muassasalarida yoshlarning intellektual, hissiy, jismoniy, axloqiy va ruhiy xususiyatlarini rivojlantirishda kasbiy bilimlarga ega bo‘lishlarida nazariy bilim va amaliy faoliyatga undovchi ma’lumotlarni berish, innovasion axborot texnologiyalarini o‘rgatish, xorijiy tillarni o‘zlashtirishlariga imkoniyat yaratish, jarayon hamda tizimlarni tahlil qila olishga yo‘naltirish, amaliy harakatchanlik va kasbiy faoliyatiga moslashuvchanlik malakalarini shakllantirish;
– jamiyatda amalga oshirilayotgan islohotlar talablariga to‘la javob beruvchi, ishlab chiqarish sohasida yuzaga kelgan raqobatga bardoshli, keskin o‘zgarishlarga moslasha oluvchi, shuningdek, mehnat bozorida mutaxassislar malakasiga qo‘yilayotgan talablar darajasida samarali faoliyat yurituvchi barkamol shaxsni shakllantirish;
– kasbiy mahoratni belgilovchi fazilatlarni shakllantirish va rivojlantirish muammolarini uzluksiz va uzviy, bosqichma-bosqich amalga oshirishni ta’minlash;
– ta’lim oluvchilarda mehnatsevarlik, qiziquvchanlik, intizomlilik, tashabbuskorlik, ijodiy fikrlash va tashkilotchilik sifatlarini shakllantirish;
– ta’lim oluvchilarga o‘zining ijtimoiy jamiyatdagi roli va o‘rnini anglab yetish, o‘zlashtirishi zarur bo‘lgan bilim va faoliyat tajribasini o‘zlashtirish, maqsadni ko‘ra bilish, faoliyatni rejalashtirish, uning mazmunini tahlil qilish, axborot vositalari va texnologiyalari yordamida mustaqil ishlash, jamoada turli xil ma’naviy-ma’rifiy tadbirlarni tashkil qilish va o‘tkazishni bilish;
– ma’naviy, motivasion, intellektual va amaliy jihatdan o‘zini rivojlantirish, irodaviy va hissiy jihatdan o‘z-o‘zini boshqara olish ko‘nikmalarini shakllantirish;
– bo‘lajak yetuk mutaxassislarda, ya’ni kasbiy mahoratni egallagan yoshlarda jamoatchilik, millatlararo do‘stlik, insonparvarlik, o‘zgalarni tushuna olish, har qanday vaziyatlarda muammolarni to‘g‘ri hal qila olish, har bir bajariladigan ishning natijasini oldindan ko‘ra olish va to‘g‘ri xulosalar chiqara olish, o‘z ustida doimiy ishlab yangiliklardan boxabar bo‘lib borish kabi fazilatlarni tarbiyalashdan iborat.
Kasbiy mahoratni shakllantirishda umuminsoniy va milliy qadriyatlar asosida yoshlarni tarbiyalash, mamlakatimiz mustaqil taraqqiyotini yanada takomillashtirishda ishlab chiqarish sohalarini rivojlantirish, zamonaviy texnika va texnologiyani muayyan sohalarga tatbiq etish, ulardan samarali foydalanish yo‘llari haqida to‘liq bilimga ega bo‘lishlari ochib beriladi. Zamonaviy mutaxassis (jumladan, o‘qituvchi-pedagog ham) o‘z kasbiy faoliyati sohasidagi yangiliklarni egallab borishi, istiqboldagi taraqqiyot yo‘nalishlari hamda yuzaga keluvchi muammolarni yechish yo‘llarini ko‘ra bilishi lozim. Kasbiy mahorat yoshlarni kasbga yo‘naltirish va tayyorlashda kasb egalariga nisbatan hurmat hissini, kasbiy g‘ururni shakllantirishdan iborat.