O`zbekiston respublikasi oliy va o`rta maxsus ta`lim vazirligi toshkent davlat texnika universiteti “Geologiya qidiruv” fаkultеti “Nеft va gazni qayta ishlash ob’ektlari” kаfеdrаsi «korroziyadan himoya qilish»

7.2. Ярали коррозия
Ярали коррозия ўзининг ривожланиш характери бўйича ПК га жуда яқин бироқ, бунда коррозион жараён локализацияси унчалик ўткир эмас ва ярали коррозия ўчоғининг диаметри ПК нисбатан анча катта бўлади. Яраларнинг диаметри одатда уларнинг чуқурлигига нисбатан етарлича каттадир. Ярали коррозия пассив металларда ҳам, актив эрийдиган металларда ҳам кечади. Коррозиянинг бундай кўриниши углеродли ва паст легирланган пўлатларда кўпроқ учрайди.
Углеродли ва паст легирланган пўлатларнинг ярали коррозияга чидамлилиги уларнинг структурали ва структура-фазали ташкил этувчиларига сезиларли даражада боғлиқдир. Ярали коррозияга пўлатлар чидамлилигининг кескин пасайиши уларнинг структурасида калций асосидаги металлмас сулфидларнинг қўшилиб қолиши сабабли юзага келади.
Анча камроқ ва фақат углеродли пўлатлар учун амалий аҳамиятга эга бўлган емирилиш хавфи марганец сулфидининг аралашуви туфайли вужудга келади. Нозик дисперс перлит ажралмаларининг узлуксиз тўри ҳосил бўлиши билан феррит-перлит структурали пўлатлар учун ярали коррозияга мойиллик ортади.
Перлит фазаларининг таъсир механизми қуйидагича. Перлит — феррит ва цементит пластинкали фазалар нисбати (7–8):1 бўлган пластинкасимон қатламли структурага эга. Термик қайта ишлаш шароитига қараб, пластинкаларнинг қалинлиги тахминан 10 мартагача ўзгариши мумкин, масалан феррит учун 0,1 дан 1,0 мкм гача ўзгариб, пластинка қанча юпқа бўлса, у шунчалик кўпроқ эгриланади. Нейтрал муҳитларда феррит 1–2 тартиб катталикда цементитдан тезроқ эрийди. Эритманинг кислоталилиги кучайиши билан ферритнинг эриш тезлиги яна бир неча тартибда ортади. Цементитнинг эриш тезлиги эса агар ўзгарадиган бўлса, у 10 мартадан ошмайди.
Нейтрал эритмада коррозия кечганда феррит пластинкаси томонидан қолдирилган микрозазордаги локал муҳит оксидланиб, унда ферритнинг эриш тезлиги янада ортади. Перлит колониясидаги пластинка қанча юпқа бўлса, дастлаб ҳосил бўлган зазорлардаги муҳит шунча тез оксидланади ва феррит пластинкаларининг кейинги эриш тезлиги янада ортади. Бунда металл матрица ферритининг эриш тезлиги ўзгармай қолади. Металл билан боғланишни йўқотган цементит пластинкалари коррозион яралар ҳосил қилиб бошқача тусга киради. Эритманинг локал оксидланиши коррозия жараёнининг стимули бўлганлиги сабабли, кўриб ўтилган механизм питтинг ва тирқиш коррозиялари билан умумий жиҳатларга эгадир.