O’zbekiston respublikasi oliy va o’rta maxsus ta’lim vazirligi termiz davlat universitetining pedagogika instituti maktabgacha ta’lim kafedrasi

Fan dasturlarini ishlab chiqish va tasdiqlash quyidagi tartibda amalga oshiriladi:

• 
  Vazirlik topshirig‘iga muvofiq tayanch oliy ta’lim muassasasi tomonidan fan dasturining loyihasi tayyorlanadi;
  
• 
  tayyorlangan fan dasturining loyihasiga fanning etuk mutaxassislari, ta’lim yo‘nalishi bo‘yicha turdosh oliy ta’lim muassasalari, tegishli soha korxona, tashkilot va muassasalarining taqrizlari olinadi;
  
• 
  tayanch oliy ta’lim muassasasining Kengashida fan dasturining loyihasi atroflicha muhokama qilinadi va tasdiqlashga tavsiya etilishi to‘g‘risida Kengash bayoni rasmiylashtiriladi;
  
• 
  fan dasturining loyihasi ekspertizadan o‘tkazish uchun tayanch oliy ta’lim muassasasi rektorining xati bilan Oliy va o‘rta maxsus, kasb-hunar ta’limini rivojlantirish markaziga kiritiladi. Kiritilayotgan xujjatlarga taqrizlar, tayanch oliy ta’lim muassasasi Kengashining bayoni ilova qilinadi;
  
• 
  Oliy va o‘rta maxsus, kasb-hunar ta’limini rivojlantirish markazi tayanch oliy ta’lim muassasalari tomonidan kiritilgan fan dasturlarining loyihalarini ta’lim sohalari va yo‘nalishlariga muvofiq jamlab O‘quv-uslubiy birlashma va komissiyalarga taqdim etadi;
  
• 
  O‘quv-uslubiy birlashma va komissiyalar fan dasturlarining loyihalarini davlat ta’lim standartlariga, malaka talablariga, o‘quv rejalarga, mazkur Tartib talablariga mosligi hamda talabalarga mukammal zamonaviy bilim, ko‘nikma va malakalarni berishga xizmat qilishi yuzasidan belgilangan tartibda batafsil ekspertizadan o‘tkazadi va har biri bo‘yicha asoslangan hulosa beradi;
  
• 
  O‘quv-uslubiy birlashma va komissiyalarning fan dasturlari loyihalari yuzasidan bergan hulosalari Vazirlik huzuridagi Oliy va o‘rta maxsus, kasb-hunar ta’limi yo‘nalishlari bo‘yicha O‘quv-uslubiy birlashmalar faoliyatini Muvofiqlashtiruvchi kengash majlisida muhokama qilinadi. Muhokama natijasida ijobiy deb topilgan fan dasturlari Vazirlik tomonidan tasdiqlanishiga tavsiya beriladi, salbiy baholangan fan dasturlari esa qayta ishlashga tayanch oliy ta’lim muassasalariga yuboriladi;
  

Vazirlik huzuridagi Oliy va o‘rta maxsus, kasb-hunar ta’limi yo‘nalishlari bo‘yicha O‘quv-uslubiy birlashmalar faoliyatini Muvofiqlashtiruvchi kengash majlisi qaroriga muvofiq fan dasturlarining loyihalari Vazirlik buyrug‘i bilan tasdiqlanadi;

tasdiqlangan fan dasturlari belgilangan tartibda rasmiylashtiriladi, ularning bir nusxasi Vazirlikda (etalon sifatida), bir nusxasi Oliy va o‘rta maxsus, kasb-hunar ta’limini rivojlantirish markazida, bir nusxasi tegishli tayanch oliy ta’lim muassasasida saqlanadi.

Tasdiqlangan va ro‘yxatga olingan fan dasturlarining elektron versiyalari yoki ko‘chirma nusxalari taalluqligi bo‘yicha tayanch oliy ta’lim muassasalari tomonidan barcha oliy ta’lim muassasalariga etkaziladi.

O‘quv-uslubiy birlashma va komissiyalar tomonidan fan dasturlari loyihalarini ekspertizadan o‘tkazish va muhokama etish tartibi Vazirlik huzuridagi Oliy va o‘rta maxsus, kasb-hunar ta’limi yo‘nalishlari bo‘yicha O‘quv-uslubiy birlashmalar faoliyatini Muvofiqlashtiruvchi kengash tomonidan belgilanadi.

Fanning ishchi o‘quv dasturi

Ta’lim jarayonini bevosita joylarda maqsadli tashkil qilish va mashg‘ulotlarni tizimli tartibga solish maqsadida fan dasturi asosida fanning ishchi o‘quv dasturi (keyingi o‘rinlarda “ishchi fan dasturi” deb yuritiladi) ishlab chiqiladi.