O‘zbekiston respublikasi oliy va o‘rta maxsus ta’lim vazirligi samarqand davlat chet tillar instituti

Kurs ishini yozish va himoya qilish jarayoni quyidagi bosqichlardan iborat:

1. 
   Mavzu tanlash.
   
2. 
   Foydalanish uchun zarur bo‘lgan adabiyotlarni izlab topish va ularning ro‘yxatini tuzish.
   
3. 
   Kerakli hujjatlar asosida ma’lumotlarni tayyorlash va yig‘ish.
   
4. 
   Kurs ishi rejasini tuzish.
   
5. 
   Rejaga mos bo‘lgan savollarni batafsil o‘rganish va yozish.
   
6. 
   Kurs ishida keltirilgan ma’lumotlarni keng va tushunarli tahlil qilish.
   
7. 
   O‘qituvchining takliflari va ko‘rsatilgan kamchiliklarni e’tiborga olish va to‘g‘rilash.
   
8. 
   Kurs ishini tahrir qilish.
   
9. 
   Kurs ishini to‘g‘ri rasmiylashtirish.
   

MAVZUNI TANLASH

Kurs ishi yozishning asosiy jihatlaridan biri uning mavzusini to‘g‘ri tanlashdir. Kurs ishining mavzulari mazkur fanning o‘quv vazifasiga javob berishi bilan bir qatorda ilm-fanning dolzarb muammolari bilan bog‘liq bo‘lishi lozim. Kurs ishi mavzularining amaliyligi - bu avvalambor ularning ilmiyligi, zamonaviyligi va talabalarda mustaqil ijodiy ishga ko‘nikmani shakllantirishga yo‘naltirilganligidir. Kurs ishlarining mavzulari mazkur fanga mos o‘quv masalalari talablariga javob bergan holda, badiiy adabiyotning dolzarb masalalariga bag‘ishlangan bo‘lishi kerak.

Talabalar kurs ishi yozishi kerak bo‘lgan mavzuni o‘qituvchi tomonidan avvaldan tayyorlangan mavzular ro‘yxatidan tanlashi kerak bo‘ladi (1-ilovaga qarang). Kurs ishlarining mavzulari bevosita talabalarning o‘rganilayotgan tili va adabiyotini nechog‘lik o‘zlashtirganliklarini aniqlash maqsadidan kelib chiqqan holda belgilanadi. Har bir talabaga alohida topshiriq beriladi. Tanlagan mavzular bir xil bo‘lib qolmasligi va talabalar uchun tanlash imkoniyati keng bo‘lishi uchun oldindan tayyorlangan mavzular ro‘yxati kurs ishi yozishi ko‘zda tutilgan talabalar soniga nisbatan ikki barobar ko‘p bo‘lishi tavsiya etiladi.
Kurs ishi ob’ekti sifatida aksariyat holda talabaning bevosita bitiruv malakaviy ishi mavzusining ob’ekti tanlanadi. Kurs ishi ob’ekti hisoblangan biror bir metod yoki pedagogik texnologiya tahlil qilinadi.
Kurs ishi mavzulari ro‘yxati har yili kafedra tomonidan yangi va dolzarb muammolarni yoritishga asos bo‘ladigan mavzular bilan yangilanib turishi va talabalarga tanishish uchun berilishi kerak.
Talaba mavzu tanlashda o‘qituvchilar bilan maslahatlashib o‘zi uchun qiziqarli bo‘lgan o‘rganilayotgan tili va adabiyotiga oid muammolarni ochib beradigan mavzuni tanlash huquqiga ega. Bundan tashqari, talaba ro‘yxatda bo‘lmagan metodikaga oid muammolarni ochishda muhim va qiziqarli bo‘lgan mavzularni taklif qilishi ham mumkin. Mavzu tanlangandan so‘ng, albatta, ilmiy rahbar bilan maslahatlashib keyin ish boshlanadi. Har bir talaba bitta mavzu tanlash huquqiga ega.
Kurs ishini bir necha talabaning bitta mavzudan yozishlariga ruxsat etilmaydi. Bundan istisno holda, ilmiy rahbarning ruxsati bilan bir mavzuning turli jihatlarini yoritib beradigan holatlarda bir necha talabaning bir mavzuda kurs ishi yozishiga ruxsat beriladi. Albatta, bunday tanlangan mavzular tegishli kafedrada ro‘yxatdan o‘tkazilishi shart.