O‘zbekiston respublikasi oliy va o‘rta maxsus ta’lim vazirligi samarqand davlat universiteti filologiya fakulteti

18-MAVZU: SO‘Z TARKIBI VA SO‘Z YASALISHI.
FAOL SO‘Z YASOVCHI QO‘SHIMCHALAR.
INTERNET MATNI (HAFTADA SODIR BO‘LGAN YANGILIKLAR).


So’z yasalishi haqida ma’lumot
Tilda oldin mavjud bo’lgan so’zga ma’lum yasovchi vositalar qo’shish bilan yangi so’z hosil qilinishiga so’z yasalishi hodisasi, shunday hodisani o’rganadigan tilshunoslik bo’limiga esa so’z yasalishi deyiladi.
Demak, so’z yasalishi atamasi ikki ma’noda: a) so’z yasalishi hodisasi ma’nosida va b) so’z yasalishi hodisasini o’rganuvchi tilshunoslik bo’limi ma’nosida qo’llaniladi.
So’z yasalishi hodisasi o’zining ichki tuzilishiga ega bo’ladi va ikkita tarkibiy qismni o’z ichiga oladi: a) yasashga asos qism; b) yasovchi vosita. Yasashga asos qism bilan yasovchi vosita birgalikda yasalmani tashkil qiladi. Masalan, terim so’zida ter- yasashga asos, -im qismi yasovchi vosita, terim yasalma hisoblanadi. Terimchi so’zida esa terim yasashga asos qism, -chi yasovchi vosita, terimchi yasalma sanaladi.