O‘zbekiston respublikasi oliy va o‘rta maxsus ta’lim vazirligi nizomiy nomidagi toshkent davlat pedagogika universiteti madaniyatshunoslik fanidan ma’ruza matni tuzuvchi: f f. n dos

1. Madaniyat falsafasi 
– o‘zida madaniy dunyoqarashning umumiy tamoyillarini namoyon qilib,
murakkab va ko‘p maqsadli jarayonlarni tahlil qilishda tahlil, tasniflashga asoslanadi. Madaniyatni
falsafiy anglash, asoslash bilan bog‘liq materialistik, pozitivistik, idealistik va boshqa ko‘plab
qarashlar mavjud bo‘lib, ularning har birida insonning tabiat va ijtimoiy guruh (sotsium)lar olamida
jismoniy, ma’naviy va ruhiy hayot faoliyatining shakllanishi va rivojlanishini nazariy tushuntirish
usullari va o‘ziga xos tahliliy uslublari ishlab chiqilgan.
2. Madaniyatning tuzilish shakli (morfologiyasi) 
– inson ga bog‘liq bo‘lmagan va jamiyatda
mustaqil mavjud bo‘lgan madaniyatning o‘ziga xos shakli uning tadqiqot predmeti hisoblanadi.
Madaniyatning rivoji jamiyatning ichki qonuniyatlari bilan o‘zaro bog‘liqligi haqidagi qoidagi
asoslangan madaniyat morfologiyasi taqqoslash, tahlil qilish va boshqa uslublar asosida madaniyat
rivojlanishining manbai va omillarini ochishga harakat qiladi. Uning mavjudlik davri u yoki bu
madaniyatning paydo bo‘lishidan to inqirozgachadir.
3. Madaniyat sotsiologiyasi 
– jamiyat madaniy taraqqiyotining aniq jarayonlarinio‘rganish bilan
shug‘ullanadi. U turli sotsiologik axborotlarni to‘plash, qayta ishlash va tahlil qilish bilan bog‘liq
bo‘lgan madaniy jarayonini empirik (tajriba) asosda tadqiq qilishda namoyon bo‘ladi.
4. Madaniyat tarixi 
– madaniyat taraqqiyoti jarayonlarini noyob va asl hodisa sifatida o‘rganadi.
Shuningdek, turli madaniy soha va jarayonlarni o‘zaro taqqoslaydi, ularning o‘zaro munosabati va
ta’siri, zamon va makondagi o‘ziga xos va umumiy xususiyatlarini tadqiq etadi.
5. Madaniyat ekologiyasi 
– hozirgi davrda inson faoliyatining barcha sohalarini, jamiyatning
hamda insonning individual hayotini, tabiat bilan o‘zaro munosabatlarini qamrab oladi. Bu
madaniyatshunoslik tadqiqotidagi eng yangi va faol rivojlanayotgan sohalardan biridir.
Inson madaniyatshunoslik fanining asosiy ob’ekti hisoblanadi, zero madaniyat – bu inson
tafakkurining mahsulidir. Madaniyatshunoslik fani insonning tabiat va jamiyat bilan faol
munosabatlarini aks etdirib, bu munosabatlar uning hayot tarzida namoyon bo‘lishini, shaxsning
jamiyatdagi madaniy faoliyatini, madaniyatlar tipologiyasini o‘rganadi. U insonlarning tabiat va
jamiyatga munosabatini ilmiy izohlab, uning umumtarixiy mazmuni va ma’nosini, ijtimoiy, tarixiy
bilimlar tizimidagi o‘rni va mavqeini belgilaydi.
«Madaniyat» atamasi hozirgi zamon ilmiy adabiyotlarida rang-barang ma’nolarda ifodalangan.
«Madaniyat» va «Kultur» atamalari mutaxassislar fikriga ko‘ra aynan bir ma’noni anglatib, lotincha
«ishlov berish», «parvarish qilish» ma’nosini anglatgan. Keyinchalik «ma’rifatli bo‘lish», «tarbiyali»,

---

«bilimli bo‘lish» mazmunida ishlatilgan. Qadimgi Rimda «Madaniyat» - tushunchasi «hayotni ma’naviy
jihatdan yanada yaxshilashga va tozalashga qaratilgan g‘amxo‘rlik» degan ma’noda ham foydalanilgan.
Ma’lumotlarga ko‘ra, mashhur Rim faylasufi-notiq sitseron ham «ruhiyat madaniyati» atamasini
ishlatgan. Yevropa xalqlarida XVIII asrning oxirlarigacha «Madaniyat» atamasi aqliy-axloqiy
madaniyat tushunchasi bilan yonma-yon ishlatilgan. O‘zbek tilida keng ishlatiladigan «Madaniyat»
atamasi arabcha «madina» - «shaharlik» degan ma’noni bildiradi. Ko‘rinib turibdiki, «Madaniyat»
tushunchasi xilma-xil talqiniga qaramay qadimdan hozirgi kungacha o‘z mohiyatini o‘zgartirmagan.
Agar amerikalik madaniyatshunos olimlar A.Kreber va K.Klakxonlarning 1952 yildagi
ma’lumotlariga ko‘ra madaniyat hodisasiga berilgan ta’rif 164 ta bo‘lsa, so‘nggi adabiyotlarda bu raqam
400 dan ortiqni tashkil etadi.
Madaniyat hodisasi tavsifiga doir ko‘plab izohlar mavjud bo‘lib, ular: «insoniyatni yashash usuli;
insonning ijtimoiy to‘laqonli faoliyati», «inson tomonidan yaratilgan muhit», «sotsial yaxlit organizm»,
insoniyat yaratgan moddiy va ma’naviy qadriyatlar majmui; sun’iy – ikkinchi tabiat; inson ijodiy
faoliyati mahsuli; umuman jamiyat; jamiyatning ma’naviy holati; jamiyat sifati; shartli belgilar tizimi
yig‘indisi; me’yor va andozalar va hokazolardan iborat.
G‘arbiy Yevropada madaniyat tushunchasi XVIII asrning oxiridan e’tiboran hozirgi mazmunini
kasb etgan bo‘lsa-da, u faqat XX asrga kelib ijtimoiy va gumanitar fanlar kategorial tizimidan
mustahkam o‘rin oldi. Kishilik jamiyatining keng ko‘lamli va doimiy ravishda o‘zgarib boruvchi
ma’lumotlarini muayyan tartibga solishga yordam beruvchi, umumlashtiruvchi tushunchalarga bo‘lgan
ehtiyoji madaniyatshunoslik fanini yaratilishiga sabab bo‘ldi.
Insoniyat dastlabki taraqqiyot bosqichida yashagan davrda: ya’ni termachilik, ovchilik, baliq
tutish, ibtidoiy chorvachilik va dehqonchilik bilan shug‘ullangan vaqtlaridayoq madaniy
munosabatlarning dastlabki ko‘rinishlari sodir bo‘la boshlagan. Ming yillar davomida bir maromda,
sekin rivojlanib borgan jamiyatda insoniyat yaratgan madaniyat urf odatlar, e’tiqodlar, hayotning
moddiy va ijtimoiy shakllaridan unchalik farq qilmagan. Madaniyatning avtonomiyasi namoyon bo‘lishi
uchun muayyan darajada texnikaning rivojlanishi va mehnatning ijtimoiylashuviga erishish talab etildi.
Shu asosda madaniyat asta-sekinlik bilan insoniyatdan tobora ko‘proq mustaqil bo‘lib bordi. Insonning
madaniyatga tobe’ligi ortdi. Hozirgi postindustrial jamiyatlardagi ekologik, ma’naviy va axloqiy
sohalardagi mavjud muammolar fikrimizning dalilidir. Shuning uchun madaniyatni fenomen sifatida
idrok etish, uning rivojlanish qonunlarini tushunish va shu tushunchalar asosida madaniyatni
boshqarishga o‘rganish zaruriyat bo‘lib qoldi.
Insoniyat jamiyati doimiy rivojda bo‘lib, u o‘zgarib takomillashib boradi. Turli tarixiy davrlarda
va xilma-xil madaniyatlarda odamlar dunyoni o‘zgacha anglaydilar va qabul qiladilar, o‘zlariga xos
ravishda tasavvurlari va bilimlarini hosil qiladilar. Biz hozirgi davrdagi mavjud muammolarga o‘xshash
bo‘lgan to‘siqlarni o‘tmishda odamlar qanday qilib yengib o‘tganlarini o‘rgana borib o‘tmishga savollar
bilan murojaat qilamiz, o‘tmish bizga javob qaytaradi va shu bilan o‘tmish, hozirgi zamon va kelajak
o‘rtasida doimiy muloqot bo‘lib turadi. Hozirgi davrdagi madaniyatning ilmiy tushunchasi insoniyat
tomonidan yaratilgan va yaratilishi davom etayotgan ma’naviyat, ruhiyatning o‘ziga xosligini anglashi
natijasida vujudga keldi.
Madaniyat – jamiyatning mahsuli, ijtimoiy hayotning eng muhim jabhalaridan biridir.
Madaniyatsiz jamiyat bo‘lmaganidek, madaniyat ham jamiyatdan tashqarida mavjud bo‘lmaydi.
Murakkab ijtimoiy voqelik sifatida madaniyatning o‘ziga xos xususiyati shundaki, u insoniyat
avlodlarining mehnati va bilimlarini o‘ziga singdirib oladi, saqlaydi va doimiy boyitib boradi.
Madaniyat ijtimoiy hayotning vorisligi, qadriyatlarini to‘plash va ularni kelgusi avlodlarga yetkazib
berish bilan bog‘liq bo‘lgan jihatlarni ifodalaydi.
Ijtimoiy hayotning tarkibiy qismi sifatida madaniyatni jamiyatda tutgan o‘rni, jamiyatning
mazmuni va tahlil qilinayotgan ijtimoiy borliqning xususiyatlarga bog‘liqdir. Ijtimoiy jarayon,
kishilarning hatti-harakati, ya’ni sotsial faoliyati madaniy ideallarni, qadriyatlarni, normalarni qator
toptirilishi yoki barham berilishida vosita vazifasini, shuningdek kishilarning ijtimoiy va shaxsiy
munosabatlarining shaxslararo va guruhlararo aloqalari shakli vazifasini ham bajaradi.
Madaniyat ijtimoiy hayotning tarkibiy va funksional jabhalarida ifodalanadi. Shu jihatdan jamiyat
madaniyatni vujudga keltiradi. Jamiyatda vujudga kelgan madaniyat qanchalik murakkablashib, boyib
borsa, uning insonga va jamiyatga ta’siri mukammallashib nisbiy mustaqilligi kuchayib boradi.
Masalan, Antik jamiyat allaqachon o‘tmish, tarixga aylangan bo‘lishiga qaramasdan, o‘sha davr
madaniyati hozirgi kunda ham o‘z ahamiyatini saqlab kelmoqda. Uning insoniyat va jamiyat
taraqqiyotiga saboq beradigan jihatlari beqiyosdir. Shu tufayli ham biz bu davr madaniyatini
mukammalroq bilishga intilamiz. Demak, madaniyatga jamiyatning mahsuli, faoliyat uslubi sifatida
qaralsa-da, ayni paytda har bir jamiyatni u yoki bu konkret madaniyatning shakllanish manbai tarzida
e’tirof etish mumkin.
Ijtimoiy taraqqiyot faoliyat va madaniyatning o‘zaro munosabatlarida o‘zgarishlarga olib keladi.
An’anaviy va industrial jamiyatlarda informatsion faoliyat mustaqil sohani tashkil etgan bo‘lsa,
«kompyuter inqilobi» sharoitida informatsiyalar, yangi texnologiyalar yaratish alohida turdagi faoliyat
sifatida shakllandi, informatsiya qimmatbaho tovarga aylandi, informatsion faoliyatidagi bilimlar
sintezi tizimidagi murakkab o‘zgarishlar qaror topgan muhim g‘oyalar va qadriyatlarga ta’sir etdi.
Ma’naviy madaniyat informatsiyalarning zahiralari to‘planishi natijasida sivilizatsiya taraqqiyotda
tashkilotchi va xarakatga keltiruvchi faktorga aylandi. Buning natijasida faoliyat va madaniyatning
o‘zaro munosabatlarida o‘zgarishlar boshlandi. Agarda dastlab madaniyat faoliyatning mazmuniga
to‘liq bog‘liq bo‘lgan bo‘lsa, sivilizatsiya jarayonlari ta’sirida faoliyatning ko‘proq madaniyat
ishtirokida shakllanishi kuzatilmoqda.

---

Jamiyat taraqqiyotida tarixiy inersiyaning ta’sirini ham hisobga olish kerak. Inersiyaning ta’sirida
insoniyat bajarishi lozim bo‘lgan vazifalardan tamoman boshqa narsalar bilan mashg‘ul bo‘ladi. Chunki
jamoa tafakkuri qiyinchiliklar bilan qayta quriladi. Moddiy boyliklarni qisqa vaqt ichida yo‘q qilish va
yoki buzib tashlash mumkin, lekin ma’naviy qadriyatlardan tezda voz kechib uning yangisini qabul qilib
bo‘lmaydi. Rossiya imperiyasi va sovetlar tuzumining milliy ma’naviy qadriyatlarimiz, urf odatlarimiz
va an’analarimizni «zamonaviylashtirish» borasida olib borgan siyosati oqibati nima bilan tugagani
ko‘pchilikka ma’lum.