O’zbekiston respublikasi jismoniy tarbiya va sport vazirligi o’zbekiston davlat jismoniy tarbiya va sport universiteti eshkak eshish nazariyasi va uslubiyati chirchiq-2020 yil

Dastlabki sport ixtisosligi bosqichi. Bu bosqichning asosiy vazifalari shug’ullanuvchilarning har tomonlama jismoniy tayyorgarligini ta`minlash, kelajakda ularning to’gri sport texnikasini egallashi, eshkak eshish sportida kelajakda eng yuqori sport natijalariga erishishni ta`minlovchi sharoit yaratishdan iborat.
Ixtisoslik ko’p qirrali xarakterga ega. Eshkak eshish sporti turlari texnikasi asoslari va boshqa jismoniy mashqlarni egallash bilan bir qatorda muvaffaqiyatli ixtisoslikni egallash uchun muhim ahamiyatga ega harakat ko’nikmalarini shakllantiruvchi jismoniy sifatlarni rivojlantirishga ham alohida e`tibor beriladi.
Maxsus mashqlardan iborat nisbatan kichikroq hajmdagi har tomonlama tayyorgarlik kelajakdagi sport takomillashuvi uchun tor ixtisoslikdagi trenirovkadan ancha istiqbolli sanaladi.
Dastlabki sport ixtisosligi bosqichidagi yuklamaning o’sish dinamikasi trenirovka umumiy shiddatining sezilarsiz o’sishi bilan olib borilishi zarur. Shu bilan birga mashqlar shiddati ham o’sadi. Lekin uning oshishini umumiy hajmni oshirgandan ko’ra torroq chegaralarda me`yorlash lozim. Mashg’ulot yuklamalarini me`yorlash choralariga shug’ullanuvchilarning organizmining shiddatli o’sish va yetilish jarayonida o’zgarishlarning o’zi organizmga jiddiy yuklama bo’ladigan davrda qat`iy amal qilish zarur.
Trenirovkaning katta sikllari kengaytirilgan tayyorgarlik davri bilan xarakterlanadi. Musobaqa davri ixchamlashtirilgan turda bo’ladi.
Chuqurlashtirilgan ixtisoslik bosqichi sportchining shiddatli trenirovka jarayonida yuzaga chiquvchi salbiy omillarga nisbatan organizmning yuqori ish qobiliyatini ta`minlovchi barcha funksional tizimlar shakllanishining yakunlangan davriga to’g’ri keladi. Bu bosqichda trenirovka jarayoni yorqin namoyon bo’ladigan o’ziga xoslik kasb etadi. Maxsus tayyorgarlikning solishtirma qiymati maxsus tayyorgarlik va musobaqa mashqlarini bajarishga ajratiladigan vaqtni oshirish hisobiga to’xtovsiz ortib boradi.
Trenirovka yuklamalarining umumiy hajmi va shiddati o’sishda davom etadi. Tanlangan sport turida musobaqalarning soni sezilarli oshadi. Trenirovka va musobaqa tizimi individuallashadi. Trenirovka vositalari shakli va mazmuni bo’yicha musobaqa mashqlariga moslashadi.
Bu bosqichda asosiy vazifa qiyinlashtirilgan sharoitda sport texnikasini mukammal egallash, uni individuallashtirish, sportchining texnik va taktik mahoratini takomillashtirish imkonini beruvchi jismoniy va irodaviy sifatlarni rivojlantirish hisoblanadi.