O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

24.9. Sud muhokamasida chiqariladigan ajrimlar va sud majlisining bayonnomasi

JPKning 426-moddasi asosida sud muhokamasi vaqtida sud majlisining kotibi bayonnoma yuritadi. Sud majlisining bayonnomasida quyidagilar koʻrsatiladi: sud majlisi boshlangan va tamom boʻlgan vaqt koʻrsatilgan holda majlis boʻlgan joy, sana; sudning nomi va tarkibi; sud majlisining kotibi, tarjimon, ayblovchi, himoyachi, sudlanuvchi, jabrlanuvchi va uning vakili, fuqaroviy da’vogar, fuqaroviy javobgar, ularning vakillari, shuningdek sud chaqirgan boshqa shaxslar; koʻrilayotgan ish; sudlanuvchining shaxsiga doir ma’lumotlar; hozir boʻlgan va hozir boʻlmagan guvohlar hamda ularning kelmaganlik sabablari. Bayonnomada: raislik qiluvchining barcha farmoyishlari koʻrsatiladi va sudning harakatlari qanday tartibda oʻtgan boʻlsa, shu tartibda yoziladi; ishda ishtirok etuvchi shaxslarning ariza va iltimoslari; sudlanuvchi, jabrlanuvchi va guvoh koʻrsatuvlarining batafsil mazmuni; berilgan savollarga ekspertning javoblari; sud muzokaralarining tartibi, sud muzokaralarida ishtirok etgan shaxslarning xulosalari hamda sudlanuvchi oxirgi soʻzining mazmuni; basharti, protsess ishtirokchilari iltimos qilsalar, ishni koʻrish paytida yuz bergan holatlar toʻgʻrisidagi mulohazalar aks ettiriladi.
Sud zarur deb topgan hollarda guvoh va jabrlanuvchilar oʻzlari bergan koʻrsatuvlarini sud majlisining bayonnomasida imzolaydilar.
Sud majlisi bayonnomasiga mulohazalar berish muddati ushbu bayonnomani raislik qiluvchi va kotib imzolaganidan keyingi kundan boshlab hisoblanadi. Mulohazalarning mazmuni sud majlisi bayonnomasining olib borilishi, rasmiylashtirilishi tartibiga, shuningdek undagi yozuvlarning toʻliqligiga va toʻgʻriligiga taalluqli boʻlishi kerak. Muddatning oʻtib ketishiga uzrli sabablar mavjudligi yoki bayonnoma bilan tanishish uzoq vaqtni talab qilsa, bayonnoma bilan barcha protsess ishtirokchilari oʻz vaqtida tanisha olmasa, ushbu muddat raislik qiluvchi tomonidan uzaytirilishi lozim. Sud majlisi bayonnomasiga berilgan mulohazalarni koʻrib chiquvchi rais mulohaza bergan shaxsni uning mulohazasi toʻgʻriligini baholash maqsadida chaqirishi mumkin. Mulohazalarni toʻgʻriligiga ishonch hosil qilgach, raislik qiluvchi uni bayonnomaga qoʻshib qoʻyadi.