O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Mavzu boʻyicha xulosalar

Jinoyat ishini sudda koʻrish uchun tayinlash bosqichining tushunchasi, ahamiyati, unda aniqlanishi lozim boʻlgan holatlar hamda chiqariladigan qarorlar, surishtiruv va dastlabki tergov jarayonida yoʻl qoʻyilgan texnik yoʻsindagi kamchiliklar, shu jumladan, yozuvdagi xatolar, harfiy xatolar yoki arifmetik xatolarni bartaraf etish uchun ishni prokurorga yuborish, ishtirokchilarni ish materiallari bilan tanishtirish, ushbu ishlarni sudda koʻrish muddatlari haqidagi koʻnikmalar shakllanishi lozim.

Muammoli savollar va kazuslar

1. 
   Jinoyat ishini sudda koʻrish uchun tayinlash chogʻida aniqlanishi lozim boʻlgan holatlar nimalardan iborat?
   
2. 
   Jinoyat ishini sudda koʻrish uchun tayinlash toʻgʻrisidagi qarorda nimalar koʻrsatiladi?
   
3. 
   Jinoyat ishini sudda koʻrish uchun tayinlash chogʻida jinoyat ishini yuritish qaysi tartibda toʻxtatiladi va tugatiladi?
   
4. 
   Protsess ishtirokchilari jinoyat ishi materiallari bilan qanday tartibda tanishtiriladi?
   

Kazus
“JAHONGIR BUILDINGS” MChJ rahbari O.Xolmurodov qoʻl ostida faoliyat olib borayotgan xodimi A.Salimboyev tomonidan Oʻzbekiston Respublikasi Jinoyat kodeksining 167-moddasida nazarda tutilgan jinoyat sodir qilingan. Mazkur jinoyat ishi yuzasidan “JAHONGIR BUILDINGS” MChJ rahbari O.Xolmurodov fuqaroviy da’vogar sifatida qatnashishini bildirdi. Sud chaqiruv xatiga asosan O.Xolmurodov sud majlisiga chaqirildi.
Sudya O.Xolmurodovni jinoyat ishida ishtirok etishi uchun maxsus MChJ tarkibidagi vakolatli organ tomonidan beriladigan maxsus vakolatnoma olib kelishni, agarda maxsus vakolatnoma olib kelinmasa sudda fuqaroviy da’voni koʻrib chiqmasligi haqida ogohlantirdi.
Mazkur holatni Oʻzbekiston Respublikasi jinoyat-protsessual qonunchiligi asosida tahlil qilgan holda huquqiy baho bering. Fuqaroviy da’vogarning sud majlisiga kelmasligi oqibatlarini bayon qiling.
XXIV BOB. SUD MUHOKAMASINING UMUMIY SHARTLARI
(Muallif – yuridik fanlar nomzodi, dotsent D.Bazarova)


Annotatsiya: mazkur mavzu orqali oʻquvchilar sud muhokamasining umumiy shartlari, ya’ni sud muhokamasining bevositaligi, ogʻzakiligi va oshkoraligi, sudlovga tegishlilik, sud tarkibining oʻzgarmasligi, sud muhokamasi ishtirokchilarining tengligini ta’minlash va ularning protsessual holatini kafolatlash, sud muhokamasi doirasining qat’iyligi; jinoyat ishini toʻxtatish va tugatish, sud majlisining tartibi va sud majlisining bayonnomasi toʻgʻrisidagi tushunchalarga ega boʻladilar.