O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

19.3. Ayblov xulosasi, ayblov xulosasiga ilovalar, jinoyat ishining prokurorga yuborilishi

Ayblov xulosasi – jinoyat protsessida jinoyat ishi yurituvi davomida tergovchi tomonidan qabul qilinadigan protsessual qarorlar, ya’ni oxirgi-qatʻiy boʻlmasada, ishni mazmunan hal qilishga yoʻnaltirilgan dastlabki tergovning yakuniy hujjatlari toifasiga kiradi. Bu hujjatda tergov organi tomonidan isbotlangan va sudga ishni oʻtkazish uchun asos boʻladigan jinoiy qilmishning holatlari yoritiladi.

Ayblov xulosasi jinoyat va uni sodir etgan shaxs fosh etilgani va ishni sudga yuborish zarurligi toʻgʻrisidagi yakuniy hujjatdir. Unda ish boʻyicha ayblanuvchi tariqasida ishtirok etishga jalb qilingan shaxs (shaxslar) va unga (ularga) e’lon qilingan ayblovning mazmuni, ayblanuvchining aybdorligini tasdiqlovchi dalillar, ayblanuvchining oʻzini himoya qilish uchun keltirgan vajlari va ularni tekshirish natijalari bayon qilinadi.
Muayyan jinoyat ishiga daxldor boʻlgan yana boshqa qoʻshimcha ma’lumotlar ham ayblov xulosasiga ilova qilinishi mumkin. Jumladan, ayblanuvchilarning ba’zilari qidiruvda ekanligi, betobligi sababli tibbiy muassasada da’volanayotganligi, garov kim tomonidan berilgani va qayerda saqlanayotgani, jabrlanuvchi va ayrim guvohlar xizmat safarida boʻlib, Oʻzbekiston Respublikasi hududidan tashqarida ekani kabi ma’lumotlar sud majlisini oson oʻtkazishga imkon beradi.
Prokurorga tasdiqlash uchun yuboriladigan jinoyat ishi boʻyicha ayblov xulosasi barcha ayblanuvchilarga va prokurorning nazorat ish yurituviga yetarli nusxada boʻlishi kerak. Jinoyat ishi taaluqli prokurorga yuborilganligi haqida jinoyat protsessining manfaatdor ishtirokchilarga xabar qilinadi.

Mavzu boʻyicha xulosalar

Mazkur mavzuni oʻrganishda o‘quvchilar dastlabki tergovni tamomlash turlari, jinoyat ishini tugatish asoslari va jinoyat ishini tugatish toʻgʻrisidagi qarorni asoslash; jinoyat ishi tamomlanganidan keyin undagi materiallar bilan tanishib chiqish huquqini ta’minlash, iltimoslar qilish va ularni koʻrib chiqish, ayblov xulosasi tuzish, unga ilova qilinadigan hujjatlarni rasmiylashtirish tartib-qoidalariga qat’iy rioya qilish koʻnikmalariga ega boʻlishlari lozim.