O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

18.3. Dastlabki tergovni toʻxtatishning shartlari

Dastlabki tergovni to‘xtatishning shartlari – tergovchi tomonidan ish yuritishga to‘sqinlik qiladigan asoslarning vujudga kelishi orqali jinoyat ishini to‘xtatish to‘g‘risidagi qarorning qabul qilinishi bilan bir paytda mavjud bo‘lishi talab etiladigan holatlardir.

18.4. Jinoyat ishini yuritishni toʻxtatishning protsessual tartibi

Tergovchi ishni toʻxtatish toʻgʻrisida qaror qabul qilishdan oldin jinoyat ishi boʻyicha yigʻilgan daliliy hujjatlarni yana bir marta sinchiklab tahlil etadi va ayni paytda, jinoyat ishida barcha imkoniyatlardan foydalanilganligini tekshiradi, uning shartlariga, asoslariga rioya qilib va ish holatlarini mukammal oʻrganib, jinoyat ishini davom ettirishga hech qanday asos yoʻqligiga ishonch hosil qilganida jinoyat ishini toʻxtatish toʻgʻrisida qaror qabul qiladi.

JPKning 369-moddasida dastlabki tergovni toʻxtatish toʻgʻrisidagi qarorning mazmuni berilgan boʻlib, ushbu qaror, boshqa qarorlar singari, uch qismdan: kirish, tavsif-asoslantirish va xulosa qismlaridan iborat boʻladi. Masalani yoritish uchun bu qismlarning har biriga alohida toʻxtalish joiz.
Qarorning kirish qismi tarkibida u tuzilgan kun, oy va yil, joy, tuzuvchining lavozimi, harbiy yoki maxsus unvoni, familiyasi va ism-sharifi, jinoyat ishini rasmiylashtirish raqami, ushbu qaror chiqarilgan jinoyat ishining materiallari koʻrsatilishi kerak.

18.5. Toʻxtatilgan jinoyat ishini qayta tiklash asoslari va tartibi

Jinoyat ishini qayta tiklash jinoyat ishini yuritishni toʻxtatish institutining mazmunan va mohiyatan ajralmas tarkibiy qismi hisoblanadi.

Jinoyat ishini yuritishni qayta tiklash Jinoyat-protsessual kodeksning 371-moddasiga binoan quyidagi asoslarda ifodalanadi:
1) nergovni toʻxtatish uchun asos tariqasida ushbu kodeksning 364-moddasida nazarda tutilgan holatlar bartaraf etilganida;
2) ish boʻyicha ayblanuvchining ishtirokisiz bajarilishi mumkin boʻlgan qoʻshimcha tergov harakatlarini oʻtkazish zarurati tugʻilganida;
3) jinoyat ishini yuritishni toʻxtatish toʻgʻrisidagi qarorni prokuror bekor qilganida jinoyat ishini yuritish qayta tiklanadi.
Tergovni toʻxtatish uchun asoslar bartaraf etilganida, ya’ni jinoyat sodir etgan shaxsning aniqlanishi, yashiringan ayblanuvchining qayerdaligi aniqlanishi, Oʻzbekiston hududidan tashqarida boʻlgan shaxsni tergovga ta’minlash choralarining koʻrilishi, ayblanuvchi ishini yuritishda uning ishtirok etishini istisno etadigan ogʻir va davomli, lekin davolab boʻladigan kasallikdan sogʻayishi kabilar ishni qayta tiklash uchun asos boʻladi.