"O'zbekiston kelajagi buyuk davlat"

Aziz sayohatdoshim, sizlar bilan yana bir mamlakatga boramiz. Bu sayohat chiqimlarini o'zim qoplayman. Ana undan keyin, sizlar bilan sayohat boshqa men borgan, bilgan mamlakatlarimizda davom ettiramiz. Sayohat istagan o'quvchilarim "Finalda choylashamiz" deb izohda yozib qoldiring va albatta choylashamiz. Hakamlar ham choyni yoqtiradigan insonlar bo'lib chiqsin. :)
Demak, "Bonus" sayohat! chiptalarni do'stim Alisherning kompaniyasidan "tanish-bilish"ga arzonroq oldim. Lekin buni nima ahamiyati bor. Biz yana sarguzashtga ketyabmiz. Bu safar sizlarni orolga olib boraman. Yani orol-mamlakat. 400.000 aholi. Dunyo xaritasi ochilganda bir nuqtachalik keladigan bu mamlakat o'z fuqarolari uchun butun bir olam. Ular shu darajada vatanini sevishadiki, mamlakatning instagramdagi rasmiy heshtegi - #ohmymalta (yani, Oh, mening Maltam) Maltaning ko'chalarida yurganimda bu jumlani juda ham ko'p marta eshitdim. Politsiya hodimlari, shifokorlar, o'qituvchilar, yuristlar, vazirlar, haydovchilar, va hattoki mamlakat prezidenti (Ha, jamiyatda qanday o'rindaligingizdan qat'iiy nazar men sizlarni aralashtirib yozdim) ushbu jumlani ishlatar ekan. Siz menga ishonavering, (Andijonlik ekanim uchun ishlatmadim) bu mamlakatning "suvenir"i vatanparvarlik. "Hazilashyabsizmi?" deysizmi? Yo'q, hazillashmadim. O'zbekistonda vatanparvarlik hissi juda yuqori bo'lishi mumkin. Hamma vatanini sevishi haqida qichqirishi mumkin, ba'zi bir shaxslar dunyo bo'ylab piyolasi, do'ppisi bilan sayohat qilib o'zini vatanparvar deb hisoblashi mumkin. "I love Uzbekistan" deb yozilgan "futbolka"lar ittifoqlar tomonidan tarqatilishi mumkin. Har kuni ertalab maktablarda, universitetlarda davlat madhiyasi yangraganda o'quvchilarimiz, talabalarimiz qo'llarini ko'ksilariga qo'yib turishlari ham mumkin. Estradamiz yulduzlari vatan haqidagi qo'shiqlarini ko'payitishlari ham mumkin. Bu "mumkin-mumkinlar" bozorini shomga qadar ochiq tutsak ham bo'ladi. Lekin ha, "suvenir" qilib olsak bo'ladi. Bu 400.000ta aholi va Malta davlatining sevgisini haqiqiy Ona-bola sevgisiga o'xshatsa bo'ladi. Onalarni yaxshi ko'rishimiz haqida ko'p gapiramiz va amalda ham buni isbotlash uchun butun jonimizni berishga tayyormiz. Demoqchi bo'lganim, aziz o'quvchim, biz onamizni sevishni faqat so'zlarda qoldirmaymiz. Vatan to'g'risida ashula aytishni, "I love Uzbekistan", "I am Uzbek" deb yozilgan kiyimlar kiyishni men amal deb hisoblamadim. Yana solishtirib ko'ring. Siz "Men onamni yaxshi ko'raman" degan "futbolka" kiyib yuribsiz. Lekin amalda bundan onangiz uchun qanday foydasi bor? Vatanni ona deyishdi. Nega ona kabi qaramaymiz? Maltada buni guvohi bo'lish qiyin emas. Vatan ko'chalari ham vatanning bir qismi, nega ko'chalarni toza holatda tutmaymiz? Maltanining ko'chalari kabi toza ko'chalarni men boshqa joyda ko'rmadim. Onalarimiz Alloh ko'rsatmasin bemor holatlarida shifokorga boramiz, kechalari uhlamasdan chiqamiz, tuzalib ketsin deb duolardan tinmaymiz. Shu amallarni vatan uchun nega qilmaymiz? Sizga shu vatanda yashash davomida turli muammolarga uchrayotganingiz sabab sizda nimanidir o'zgartirish hissi tug'iladi. Bugun shu g'oyibona sayohat davomida boshqa mamlakatlardagi yaxshi holatlar haqida 3-4 ma'lumot yozdim. Bunga nisbatan ba'zi bir tanqidchilar chiqib, "chet eldan kirib kelayotgan" deb gapiradi. Chet el ham kimgadir vatan, yani shu chet ellik fuqarolar uchun vatan, Ona. Demak ular o'z onalari haqida ko'proq qayg'urishibdi. Demak muammo ularda emas, o'zimizda.
Niyatim bor. Italiyada, Fransiyada, Finlandiyada yoki Maltada ham blogerlar musobaqalari bo'lsin. Kimdur huddi shu blogpost kabi maqola yozsin. Uning maqolasidagi hamma "suvenir"lar O'zbekistondan bo'lsin. Keyinchalik Toshkentda yana blogerlar musobaqasi bo'lganida kimdur O'zbekiston bo'ylab yana g'oyibona sayohatda bo'lsin. Toshkentga viloyatlardan "suvenir"lar kelsin. Vatanimiz obod bo'lsin. Niyatlarim, orzularim amalga oshsa, O'zbekiston - kelajagi buyuk davlat.