O‘rтa maxsus, kasb-hunar тa’limi markazi

175-mashq. Quyida berilgan matndagi ajratilgan so‘zlarning tarkibini aniqlang va ma’nosini izohli lug‘atdan o‘rganing.

«... hijriy 950 (1543)-yilda bir kecha Samarqandda yong‘in chiqdi. Hazrati eshon masjidi tevaragida joylashgan bozori attoron, bozori sarrofon, bozori qog‘ozfurushon, bozori sahhofon, bazzozon, bozori tuxumduzon tamoman yonib kul bo‘ldi...»

176-mashq. «O‘zbek tilining izohli lug‘ati»dan mushrif, sarkor, muh­tasib, imom, mudarris, muazzin singari mansab, lavozimga doir so‘zlar­ning ma’nosini o‘rganib oling va ular ishtirokida gaplar tuzing.


177-mashq. «Makroiqtisodiyot nima?» matnini o‘qing, undagi yangi so‘zlarga izoh bering. Ular tarkibidagi ko‘makchi morfemalarni turlarga ajrating.

Bozor iqtisodiyotiga o‘tish sharoitida oldimizda turgan eng muhim vazifalardan biri iqtisodiyotda jami ishlab chiqarish natijalarini hisoblab borishdir. Hozirgi kunda ilg‘or mamlakatlarda ishlab chiqarish natijalarini makroiqtisodiy parametrlar (yalpi milliy mahsulot, yalpi ichki mahsulot, milliy daromad) orqali tahlil etishga katta ahamiyat berilmoqda. Bunday tadqiqotlarning o‘ziga xos xususiyati shundan iboratki, ularda iqtiso­diyot­ning turli tarmoqlari o‘rtasidagi ishlab chiqarish aloqalari haqidagi, statistik ma’lumotlar batafsil tahlil qilinadi.

Iqtisodiyotning asosiy muammolarini umumjamiyat nuqtayi nazaridan yechadigan bo‘limi makroiqtisodiyot deyiladi. Umumiy talab va taklif, inflatsiya, iqtisodiy yuksalish, ishsizlik, turmush kechirish darajasi, davlat xarajatlari, soliqlar kabi tushunchalar makroiqtisodiyot predmeti jumla­sidandir.
Makroiqtisodiyot iqtisodiyotni yaxlit holicha o‘rganadi va uning mohiyatini yalpi taklifning, ya’ni iqtisodiy tizimning yalpi ishlab chiqarish imkoniyatlarining hal qiluvchi omillarini va yangi talabning, ya’ni iqtisodiy birliklarning ishlab chiqarilgan talablariga va ko‘rsatilgan xizmatlariga sarf qilingan umumiy xarajatlarini hal qiluvchi omillarini tahlil qilishni tashkil qiladi.
Makroiqtisodiyotga doir yangi so‘zlar: litsenziya, lizing, birja, broker, assotsiatsiya, auksion, marketing, menejment, praysing, kredit, investitsiya, ssuda, tashqi savdo defitsiti, aksiz solig‘i, avtoritar kapitalizm, barter savdosi.
(Darslikdan)