O‘quvchilar o‘zini baholashi O‘quvchilar boshqa o ‘quvchilarni baholashi

Kishining kelajakda qanday inson bo‘lishi, shaxs sifatida kamol topishi, kasb tanlashi, orzu-havaslari ro‘yobi birinchi navbatda, u aynan qanday ta’lim olishiga bog’liq.
Shu bois mamlakatimizda ta’lim-tarbiya tizimini tubdan isloh qilish, farzandlarimizning jahon andozalari darajasida zamonaviy bilim va kasb-hunar egallashi, kadrlar tayyorlash sifatini ilg’or xalqaro standartlar asosida takomillashtirish dolzarb ahamiyat kasb etmoqda. Bu jabhadagi ezgu sa’y-harakatlar bugun ham izchil, shiddatli davr talabiga hamohang tarzda davom ettirilmoqda.
Ta‘lim sohasida islohotlar samaradorligini oshirish O‘zbekistondagi islohotlarning kun tartibida turgan asosiy vazifaga aylandi. Buning uchun barcha imkoniyatlar ishga solinmoqda. Ta‘lim tizimini kompleks rivojlantirish, malakali kadrlar tayyorlash maqsadlariga katta kuch va mablag‘lar yo‘naltirilmoqda. Soha rivojiga bo‘lgan ana shunday e’tibor maktablarda o‘quv-tarbiya jarayonlarini sifat jihatidan o‘zgartirishga, o‘qituvchilar tarkibini yaxshilashga xizmat qilmoqda.
Hozirgi tez o‘zgarib, tez rivojlanayotgan dunyoda zamonaviy bilim va ko‘nikmalarga ega bo‘lgan yosh avlodgina munosib o‘rnini topa oladi. O‘zbekiston aholisi tarkibida yoshlar 60 foizdan ko‘proqni tashkil etadi. Yoshlarimizga yuksak mezonlar asosida ta’lim-tarbiya berish, ularda yangicha, innovatsion fikrlash qobiliyatini o‘stirish bugungi kechiktirib bo‘lmaydigan vazifadir.
Kreativ fikrlaydigan, zamonaviy kadrlar tayyorlash bugungi dolzarb masaladir. CHunki, ilmdan maqsad faqat uni yod olish emas, balki uni idrok etish, tafakkur qilishdir. Kishida fikr bo‘lsa, demak u mulohaza qilyapti, unda mushohada bor, u har qanday masalani tahlil va talqin qila oladi, nima yaxshi, nima yomonligini teran ko‘z bilan ko‘ra oladi. O‘quvchilarni faqat yodlashga emas, balki fikrlashga chorlaydigan metodika yaratish zarurati ta’lim-tarbiya jarayonida nechog‘lik ahamiyatga egaligini shundan ham bilsa bo‘ladi.
Bugungi kunda o‘quvchilarning bilimini hamda aqliy kamolotini baholash ham muhim ahamiyatga egadir. Chunki, baholash jarayoni o‘quvchilarni rivojlantirish va ular tarbiyasiga muhim ta’sir ko’rsatadi.


Zotan, har bir o‘quvchi bilan uning imkoniyatlarini ro’yobga chiqarish ustida ishlansa, bolaning intellektual salohiyati o‘sishiga yordam beradi. Bunda aynan baholashning roli judayam muhim. O‘quvchi o‘zining bilimini aniq bilganidan so’ng o‘z ustida ishlashga va yanada ko‘proq mehnat qilishga harakat qiladi. Masalaning yana bir tomoni borki, buning uchun o‘qituvchi ham tinimsiz ravishda izlanishi, o‘qitishning yangicha va zamonaviy usullaridan foydalanishni mukammal bilishi zarur. O‘qitish va o‘rganish bor joyda albatta, baholash ham mavjud. Uning natijalari orqali biz keyingi ta’limning rivojlanishiga hissa qo‘sha olamiz.