O´quv moduli birliklari: Gazsimon avtomobil yonilg`ilari, neftmas yonilg`ilar. Gazsimon yonilg`ilar

2. Suyultirilgan uglevodorod gazi
Atmosfera bosimi va harorat noldan yuqori bo`lganda suyultirilgan uglevodorod gazi gaz holatida bo`ladi. Bosim bir oz oshganda (1,6 Mpa dan ko`p emas) u oson bug`lanadigan suyuqlikka aylanadi. Suyultirilgan gaz asosan propan (80 foiz atrofida) va butan (20 foiz atrofida) gazlari aralashmasidan iborat bo`ladi. Bundan tashqari unda oz miqdorda bo`lsa ham etan, pentan, propilen, butilen va etilen gazlari bo`ladi. Suyultirilgan gazlarning yonish issiqligi 44800-47000 kJkg ni tashkil etadi. Zichligi taxminan 0,524 gsm<sup>3</sup> (20<sup>0</sup>C haroratda) bo`lgan suyultirilgan gaz yonganda chiqadigan hajmiy issiqlik 24000 MJm³ dan ortib ketadi. Bu ko`rsatkichni benzinga solishtirib ko`rib, shuni aytish mumkinki, suyultirilgan gaz yonilg`i sifatida benzinning o`rnini to`liq bosa oladi. 1,6 Mpa ish bosimiga mo`ljallangan nisbatan yengil yupqa devorli po`lat ballonlarda avtomobilning foydali yuklanishini kamaytirmasdan yetarli miqdorda gaz saqlash mumkin. Shuning uchun suyultirilgan gazda ishlaydigan avtomobillar benzinda ishlaydigan avtomobillar kabi zahira yurish yo`liga ega. Suyultirilgan gazlarning detonatsiyaga turg`unligi yuqori bo`lganligi uchun (tadqiqot usuli bilan aniqlangandagi oktan soni 110 dan ortiq) benzinda ishlaydigan dvigatellarni suyultirilgan gazda ishlatishga qayta jihozlaganda ularning siqish darajasini oshirishga imkon beradi. chunonchi, ZIL-130 avtomobilining benzin bilan ishlovchi dvigatelida siqish darajasi 6,5 bo`lsa, ZIL-138 avtomobilining gaz bilan ishlovchi dvigatelida 8; benzin bilan ishlaydigan ZMZ-53 dvigatelida 6,7 bo`lsa, gaz bilan ishlaydigan ZMZ-53-07 dvigatelida - 8,5. Belgilangan darajada siqish darajasining ortishi gaz bilan ishlovchi dvigatellar quvvatining benzin bilan ishlovchi dvigatellarga nisbatan bir oz (5-7 foizga) kamayishini to`la kompensatsiya qilish imkonini beradi.
Davlat standarti talablariga muvofiq, suyultirilgan gazlar uch xil markada chiqariladi: texnik propan, texnik butan va ularning aralashmalari. Texnik propanni qishda, texnik butanni yozda, ularning aralashmalarini esa yil davomida ishlatish mumkin. Texnik propanda propan fraktsiyalari hajm bo`yicha kamida 93 foizni, texnik butanda butan fraktsiyalari 93 foizni tashkil etadi, qolgan 7 foizini esa yengil gazsimon uglevodorodlardan iborat aralashma tashkil qiladi. Tabiiy suyultirilgan gazlarning hidi ham, rangi ham bo`lmagani uchun ularga oz miqdorda o`tkir hidli gazsimon moddalar qo`shiladi. Bu moddalar sizib chiqib to`plangan gaz hidini sezishga imkon beradi.
Gaz har qanday idishga hajmining ko`pi bilan 90 foizgacha miqdorda to`ldiriladi, shunda idishning yuqori qismida gaz to`planishi uchun bo`shliq qoladi.
Me`yorlangan sifat ko`rsatkichlari. Avtomobil yonilg`isi sifatida suyultirilgan gazning sifatini xarakterlovchi asosiy ko`rsatkichlarga komponent tarkibi, to`yingan bug` bosimi, suyuq bug`lanmaydigan qoldiqning bo`lmasligi, zararli aralashmalar miqdori kiradi.

5.1-jadval. Gaz yonilg`ilarining tarkibi va ba`zi xususiyatlari

Gaz turlari

Hajmiy tarkibi

Zich-ligi kg/m^3

Yonish issiq-ligi kJ/m^3

Oktan soni

metan CH4

etan C2H5

propan C3H8

butan C4H10

Boshqa gazlar CnHm

Vodorod H2

Is gazi CO

Karbonat angidrid CO2