Oliy va o‘rta maxsus ta’lim vazirligi O‘rta maxsus, kasb-hunar ta’limi markazi

MAVZU: AMIR TEMUR VA SOG‘LOM AVLOD TARBIYASI

Biz kim – mulki Turon, Amiri Turkistonmiz. Biz kim – millatlarning Eng qadimi va eng ulug‘i Turkning bosh bo‘g‘inimiz.
Amir Temur Aytadilarki, tarixi yo‘q xalqning kelajagi yo‘q. Tarix – bu xotira.
Tarixni yo‘qotish esa inson xotirasini yo‘qotish bilan barobar. Xotira shunday narsaki, u insonni o‘tmishdan ibrat olishga, xatolarni takrorlamaslikka, ezgu maqsadlar sari olg‘a intilishga undaydi. Butun xalqni buyuk kelajak sari olg‘a intilishga undaydigan kuch-chi, u nima deb ataladi? U shaksiz tarixiy xotiradir. YUrtimiz tarixi haqida so‘z ketganda, xayolimizda beixtiyor Amir Temur siymosi gavdalanadi. Amir Temur – buyuk shaxs, kuragi erga tegmagan sarkarda, yirik davlat arbobi, qonunshunos, talantli me’mor, notiq, ruhshunos, shu bilan birga, el-yurtini, xalqini sevgan va uni mashhuri jahon qilgan inson.
Amir Temurning tarix oldidagi xizmati benihoyat katta. Birinchidan, tarqoqlikka barham berib, o‘z tug‘i ostiga Qashqardan Bosforgacha, Hind okeanidan Ural tog‘larigacha bo‘lgan jo‘g‘rofiy kengliklarda yashovchi elatlarni birlashtirib, markazlashgan yirik davlat yaratdi. Bu bilan ilm-fan, madaniyat, savdo-sotiq, me’morchilik, hunarmandchilik va dehqonchilik rivojiga mustahkam zamin yaratib berdi. Bugun “Temur va Temuriylar madaniyati”, “Temuriylar davlati”, “Temuriylar madaniyati”, “Ulug‘bek va Samarqand astronomiya maktabi”, “Navoiy” va “Bobur” kabi qutlug‘ so‘zlarni nafaqat o‘zbekning, balki jahon xalqlari asarlari sahifalarida uchratar ekanmiz, bu gaplarning zaminida, albatta, Amir Temurning ulkan xizmatlari yotadi. Ikkinchidan, Amir Temur bir qator xalqlar va yurtlarni mustamlakachilar zulmidan ozod bo‘lishiga yordam berdi. Masalan, o‘sha davrning eng qudratli hukmdorlaridan hisoblangan Boyazid Yildirimni tor-mor keltirib, Bolqon yarim oroli va Evropa xalqlariga ozodlik bag‘ishladi; Oltin O‘rda xoni To‘xtamishni ikki marta tor-mor etib, Rossiyaning mo‘g‘ullar hukmronligidan qutulishini qariyb 300 yilga tezlashtirdi.
Prezidentimiz aytganlariday: “Amir Temur bizning sha’n-shavkatimiz, g‘urur-iftixorimizdir. Amir Temur – xalqimiz dahosining timsoli, ma’naviy qudratimizning ramzidir”.
Amir Temur odob-axloq, iymon-e’tiqod, ta’lim-tarbiyada o‘zi yuksaklikka, mukammallikka erishgan siymolardan biridir. Bunga ishonch hosil qilish
uchun bobomizning o‘zi tomonidan odob-axloqqa doir dasturlar, o‘gitlar, pand- nasihatlarni, shuningdek, Sohibqiron haqidagi tarixiy asarlarni ko‘zdan kechirish kifoya.