Oldi-sotdi shartnomasi tushunchasi

Ko‘chmas mulklarni boshqa shaxsga o‘tkazish bo‘yicha bitimlar
Ko‘chmas mulklarni boshqa shaxsga o‘tkazish bo‘yicha bitimlar mulk joylashgan hududdagi notarial idorada tasdiqlanadi. Mazkur bitimni tasdiqlashda notarius tomonidan talab qilinadigan hujjatlar:
taraflarning shaxsini tasdiqlovchi hujjatlari, shuningdek, agar taraflar yoki ulardan biri yuridik shaxs bo‘lsa, yuridik shaxsning ta’sis hujjatlari;
ko‘chmas mulkka nisbatan mulk huquqini tasdiqlovchi hujjatlar;
bu hujjatlar quyidagilardan biri bo‘lishi mumkin:
ko‘chmas mulkni oldi-sotdi, ayirboshlash, hadya, renta, lizing to‘g‘risidagi notarial tasdiqlangan shartnoma;
umrbod ta’minlash sharti bilan uy, kvartira, uyning yoki kvartiraning bir qismini boshqa shaxsga berish to‘g‘risidagi notarial tasdiqlangan shartnoma; notarial tasdiqlangan lizing shartnomasi;
merosga bo‘lgan huquq to‘g‘risidagi guvohnoma;
er-xotinning umumiy mol-mulkidagi ulushiga mulk huquqi to‘g‘risida berilgan guvohnoma;
sud qarori (hal qiluv qarori, ajrim va boshqalar) yoki davlat ijrochisining qarori yoxud davlat ijrochisi tomonidan tasdiqlangan undiruvchi va qarzdor o‘rtasida tuzilgan bino va inshootni berish dalolatnomasi;
ko‘chmas mulkni auksionda sotib olinganligini tasdiqlovchi auksion natijalari to‘g‘risidagi bayonnoma; ko‘chmas mulkning bir qismi bo‘linganligi to‘g‘risidagi shartnoma;
mahalliy davlat hokimiyati organining qurilishi tugallangan binoni, inshootni, uyni foydalanishga qabul qilish to‘g‘risidagi komissiya dalolatnomasini tasdiqlash haqidagi qarori;
tugatilayotgan yuridik shaxsga tegishli bo‘lgan molmulkni uning muassislari (ishtirokchilari) o‘rtasida taqsimlash (bo‘lish) to‘g‘risidagi notarial tasdiqlangan kelishuv;
ko‘chmas mulkni ochiq savdoda sotib olinganligi to‘g‘risida guvohnoma; qonun hujjatlariga zid bo‘lmagan boshqa hujjatlar.
Ko‘chmas mol-mulkni boshqa shaxsga o‘tkazish bilan bog‘liq shartnomalarni tasdiqlaganlik uchun davlat boji quyidagi miqdorlarda undiriladi.