Odatingni tark etma, navro`Z!

ODATINGNI TARK ETMA, NAVRO`Z!
Sahnada bahor tarovatini ko`z-ko`z etuvchi manzara aks ettirilgan. Uzoq-uzoqlardan bulbul, sa’va kabi qushlarning xonishi eshitiladi. Ariqlarda suvlarning jildirab oqayotgani, qiyg`os ochilgan gullarning tasviri, ko`m-ko`k qir-adirlar, purviqor tog` manzaralari, gullagan dov-daraxtlarning chiroyi zalda o`tirganlarga bahoriy kayfiyat, ko`tarinki ruh baxsh etadi.

(Sahnaga jarchi chiqib keladi, barchani Navro`z sayliga chorlaydi).
Jarchi:

Odamlar-u odamlar,

Bog`da bitgan bodomlar!

Eshitmadim demanglar,

Navro`zni olqishlanglar,

Sayldan kech qolmanglar!

Bozorlar bo`lsin to`kin,

Xalqimiz eksin ekin,

Hunarmand-u kosiblar,

Chevar-u holvagirlar,

Barcha-barchangiz bu kun,

Sayldan kech qolmanglar!

Tun-u kun tenglashadi,

Hamma bir muchal oshadi,

Baxt keltirsin yangi yil,

Sevinchlarga to`lsin dil,

Sayldan kech qolmanglar!
(Jarchi bir aylanib, sahnadan chiqib ketadi. Sahnaga birin-ketin suxandonlar kirib kelishadi).
1-suxandon:

Assalom, ona yurt, tonglar o`lkasi!

Ta’rif-tavsifingning yo`q nihoyasi.

Senga bag`ishlanur muqaddas qo`shiq.

Bu o`zbek elining o`z madhiyasi.
2-suxandon:

Yana ko`k tubida sayraydi qo`shiq,

Yana ko`hna zamin yam-yashil ko`rpa.

Yana tandan ketdi mudrash-u tushlar,

Yana yoshdek dilda o`ynar ming turfa.
1-suxandon:

Tarixing, ta’rifing tillarda doston,

Quyosh charaqlaydi, moviydir osmon,

Hofiz qo`shiq aytar, raqs etar jonon,

Sevinch bag`ishlaysan, keksa-yu yoshga,

Navro`zjon, bu yilgi kelishing boshqa.

2-suxandon:

Bir yon katta kurash, bir yon ko`pkari,

Askiya, aytishar, o`lanlar bari.

Yangalarning aytgan avjli yor-yori,

Sevinch bag`ishlaysan keksa-yu yoshga

Navro`zjon, bu yilgi kelishing boshqa!

1-suxandon:

Assalomu alaykum, fan bog`ining bog`bonlari, mehribon ustozlar hamda ilmga chanqoq o`quvchi-yoshlar!

Yurtimizga o`zining zarrin sepini yoyib, husn-u tarovatini ko`z-ko`z qilib, fasllar kelinchagi – Bahoroy kirib keldi.
2-suxandon:

Ha, bahor-uyg`onish, yasharish fasli. Bu faslda ko`ngillarimiz shodlikka, zavq-u shavqqa oshufta bo`ladi. Bahor-bayramlar, shodyonalar fasli.

1-suxandon:

Yaqindagina 8-mart-Xalqaro xotin-qizlar kunini nishonlagan edik. Endi esa qadimiy va hamisha navqiron, ulug` ayyomimiz Navro`zi olam eshik qoqmoqda. Navro`zi olam muborak bo`lsin!

2-suxandon:

Har yil bahorda Navro`z tantana qiladi. Bahordagi an’analar, urf-odatlar xalqimizni hech qachon tark etmaydi, aksincha, Navro`z sayli yil sayin takomillashib, sayqallashib, boyib boraveradi. Darvoqe, Navro`z ko`p ming yillik tarixga ega.

1-suxandon:

Qani bo`lmasa, Navro`z tarixi bilan tanishaylik.

(Sahnaga bayramona libosdagi yettita o`quvchi chiqishadi).
Zafar:

Sharq xalqlarining azaliy va abadiy bayrami bo`lgan Navro`z to`rt ming yillik tarixga ega. Navro`zning kelib chiqishi va shakllanishiga oid qimmatbaho manbalar zardo’shtiylik dinining muqaddas kitobi hisoblangan “Avesto”, mashhur qomusiy olim Abu Rayhon Beruniy, Umar Hayyom, Abulqosim Firdavsiy, Nosiriddin Rabg`uziy, Yusuf Xos Xojib, Navoiy kabi mutafakkirlarimizning qimmatli ma’lumotlarida Navro`z muhabbat, do`stlik, poklik, va insonparvarlik ramzi sifatida ulug`lanadi.

Madina:

Abulqosim Firdavsiyning “Shohnoma” asarida keltirilishicha. Jamshid (qadimgi Eron shohlaridan biri) temir eritib, qurol yasashni, ip yigirib, kiyim tikishni, uy, hammomlar qurishni ixtiro qildi. So`ng kishilarni o`z qobiliyati, hunariga qarab guruhlarga ajratadi.

Nihoyat, bir kuni taxt yasatib, unda osmonga ko`tariladi, bu farvardinning birinchi kuni edi. Hamma juda baxtiyor, shu kuni yangi yil boshi bo`lib, an’anaga aylanib qoladi. (“Farvariddin” pahlaviycha so`z bo`lib, u hamal burjiga oiddir, ya’ni 21-martdan 22-aprelgacha bo`lgan davrdir)

Laziza:

Abu Rayhon Beruniy “Qadimgi xalqlardan qolgan yodgorliklar” kitobida quyidagilarni yozgan. “U kunni “Navro`z” deb atashining sababi Jamshid podshoh bo`lgach, majusiylar dinini yangiladi va bu kun “Navro`z” – “Yangi kun” deb ataldi”.

Sobirjon:

Sharqning buyuk donishmandi, falakiyot bilimdoni Umar Hayyom o`zining “Navro`znoma” asarida “Navro`z” so`zi birinchi marta zardo’shtiylik dinining muqaddas kitobi (eramizdan avvalgi III-II asrlar) “Avesto”da tilga olinganligini qayd etadi. Navro`z bayram sifatida tilga olingan “Avesto”da inson hayotining mazmuni uch ma’noda mujassam topmog`i lozimligi ham qayd etilgan. Bular – ezgu fikr, ezgu so`z, ezgu amallardir.

G`anisher:

Navro`z kunida bir soat bor. Shu soatda Feruz (baxt falagi) ruhlarni, maxluqotni yaratishga haydaydi. U kunning eng saodatli soatlari – quyosh soatlaridir. Uning tongida yorug`lik imkoni boricha yerga yaqinlashadi. Odamlar unga qarashi bilan o`zlarini baxtli sanaydilar.

Nozima:

Biz ko`hna tarix sahifalariga Navro`zni izlab sayr etar ekanmiz, nigohimiz XII asrning mashhur tilshunos olimi M.Qoshg`ariyning “Devonu lug`atit-turk” sahifalariga tushadi. Chunki jahonga mashhur bu asarida muallif Navro`zni insonlar qalbidan joy olgan qo`shiqlarini tahlil etadi.

Dilnavoz:

Tarix, zamonlar, asrlar guvohki, Navro`z ezgulik, poklik, muhabbat timsoli sifatida ulug`lanib, nishonlanib kelinmoqda. Hamisha shoirlar Navro`zni madh etib keladilar.

Bejizga biz Navro`zni milliy bayramimiz deya qadrlamaymiz. Chunki Navro`z-biz bilan, xalqimiz bilan birga ming-ming yillarni yashab kelayotgan bayram. Unda buyuk ajdodlarimizning ulug` ruhlari bor.
(Birin-ketin davraga ulug` allomalar kirib keladi va o`zlarining Navro`z haqidagi she’rlaridan parchalar aytadilar).
Hofiz Sheroziy:

Gul jamoli dilga yoqmas beginor,

Zavqi yo`qdir bodasiz bo`lsa bahor.

Bahrasi yo`q bog`-u bo`ston sayrini,

Bo`lmasa bir lola yuzli guluzor.
Umar Hayyom:

Gul chehrasida nasmi Navro`z na go`zal!

Kezganda chaman bo`lsa dilafruz na go`zal!

Shod bo`lsang-u har lahza bugun zavqi bilan,

O`tgan kundan hech ochmasang so`z na go`zal!
A.Navoiy:

Muvofiq kiydilar, bo`lmish magar Navro`z ila bayram,

Chaman sarvi yashil xilqat, mening sarvi ravonim ham.
Z.M.Bobur:

Yuzi Navro`zi-yu vasl iydini Bobur g`animat tut,

Ki mundin yaxshi bo`lmas bo`lsa yuz Navro`z-u bayramlar.
Nodirabegim:

Ey mehri jamoli olamafruz,

Ayrjomi visoling – iydi Navro`z.
Z.X.Furqat:

Fasli navbahor o`ldi, ketibon zimistonlar,

Do`stlar, g`animatdur, sayr eting gulistonlar.

Subhidam tushib shabnam, bo`ldi sabzalar xurram,

Gul uza tomib kam-kam, yog`di abri naysonlar!
A.Avloniy:

Bahor ayyomidir ayyom,

Demish shoir Umar Xayyom.

Ketur ey soqi, gulgun jom,

Bo`lur hijron chunon bulbul.
(Allomalar sahnani asta-sekin tark etishadi), “Bahor vasli” kuyi yangraydi. Kichkinagina qizaloq o`z o`rtoqlari bilan ko`m-ko`k o`tlar uzra chopib boychechak izlaydi. Nihoyat, boychechakni topadi. “Urey, mana boychechakni topdim. Yuringlar, qizlar, uni buvijonimga olib boramiz”. (Yugurishib sahnadan chiqib ketishadi).


1-suxandon:

Taklif etilgan barcha mehmonlar kelib bo`lishdi. Negadir Dono buvimiz biroz kechikishyapti. Endi nima qildik – a?

Balki biroz kutarmiz.
2-suxandon:

Ana qarang, gapingiz og`zingizda qoldi. 100 yoshli buvijonimiz kelyaptilar. Kelinglar, ularni olqishlar bilan kutib olaylik.

(Bolalar qarsak chalishadi).
1-suxandon:

Assalomu alaykum, buvijon!

Buvi:

Va alaykum assalom, bolajonlarim! Kechirasizlar. Nevaram Xolidaxon bilan bir bemor o`rtog`imning ahvolini so`rab o`taylik degan edik. O`sha yerda biroz ushlanib qoldik. Kela-kela qabristonga kirib, o`tgan ajdodlarimizning ruhini shod etish uchun fotiha ham o`qib keldik. Voy o`zim aylanay sizlardan!

Kelayotsak, hamma yoq top-toza, saranjom-sarishta, daraxtlar oqlangan, taglari yumshatilgan. Biram quvondim. Aytganday, Navro`zingiz muborak bo`lsin!
2-suxandon:

Rahmat, buvijon, doimo bardam-baquvvat bo`ling, yana uzoq yillar yashang, bizlar xizmatingizda bo`laylik!

(Shu payt qo`lida boychechak ushlagan qizcha yugurib kelib, boychechakni buvisiga tutadi).
Nasiba:

Buvijon, boychechakni topdim-u, siz tomonga yugurdim.

Buvi:

“Rahmat qizalog`im. Mana, bahor boshlanibdi. Omonlik-somonlik, yanagi yilga ham yetaylik”, - deb duo qilibdi.

Bolajonim, endi sen ham o`rtoqlaring bilan o`tirib, bayramni tomosha qilinglar.

1-suxandon:

Bugungi bayramingizga Bahoroy, Navro`zjon, Dehqonbobo va Cho`ponbobolar ham mehmon bo`lib kelishgan.

(Shu payt mayin kuy ohanglari ostida sahnaga Bahoroy va Navro`zjon kirib kelishadi)
Bahoroy:

Mana, men go`zal bahor,

Yetib keldim sizlarga.

Jon kiritdim daraxtlarga,

G`unchalar ildizlarga.

Oppoq o`rik gullarim bilan,

Iliq quyosh nurlarim bilan.

Yashillanib, dam olovlanib,

Kamalakdek ming xil tovlanib,

Mehmon bo`lib keldimsizlarga.

Navro`zjon:

Assalomu alaykum, beg`ubor qalblari o`yin-kulgiga, qo`shig`-u raqsga, san’atga ixlosmand, qadrli yoshlar! Mana, o`lkamizda so`lim bahor. Hamma yerda go`zallik, yangilanish, yasharish. Yurtimizning har bir go`shasida, mahallalarda bayram shodyonalari.

Menimcha, bugundan boshlab, dehqonchilik ishlari ham boshlansa kerak-a?


2-suxandon:

Ha, albatta. Bugun davramizga Dehqonbobo ham mehmon bo`lib kelganlar. Bugun dehqonbobo dalaga chiqib, ilk marta yerga ketmon urmoqchi. Marhamat, Dehqonbobo, dala ishlarini boshlab bersangiz.

Dehqonbobo:

Bismillohir rohmanir rohim!

Eshi yil ketdi,

Yangi yil keldi.

Doshqozonlar tizilsin,

Sumalaklar suzilsin!

Bug`doy pishib chosh bo`lsin!

Rizq-u, ro`zimiz tog` bo`lsin!

Omin, Ollohu akbar!

(Dehqonbobo dalaga ketmon urib, urug` sochadi).

1-suxandon:

Marhamat, do`stlar, navbat Navro`z qo`shiqlariga!

Niyoz:

Dehqon dala aylandi,

Ho`kiz shoxi moylandi.

Omoch, mola, cho`nqa tish.

Dehqonbobo shaylandi.

Um uf, jaqala, um uf, jaqala.

Adiz:

Arpa-bug`doy sepilsin,

Maysa unib yetilsin,

Dehqon ishi o`ng kelsin,

Omborlarga don to`lsin.

Yangi yil qutli bo`lsin,

Qozonlar sutli bo`lsin.

Um uf, jaqala, um uf, jaqala

Zohid:

Bugun bayram – yilboshi,

Yilboshiga el oshi.

Har ro`zg`orning himmati.

Palovmi yo sut oshi,

Um uf, jaqala, um uf, jaqala.

Asqar:

Qattiq oshi, sut oshi,

Qo’noq bo`tqa, so`k oshi.

Shovla pishgan ilikday

Kichirining zo`r moshi

Um uf, jaqala, um uf, jaqala.

Shuhrat:

Ochligimiz yo`q bo`lsin,

Momo, qorin to`q bo`lsin,

Rizqimiz butun bo`lsin,

Umrimiz uzun bo`lsin.

Um uf, jaqala, um uf, jaqala.

Sanjar:

Tog`da bulbul sayraydi,

Tol bag`rini chaynaydi.

Shu ukamdan so`rsangiz,

Qo`zichoqday sakraydi.

Um uf, jaqala, um uf, jaqala.

Ulug`bek:

Omad bizga jo`r bo`lsin,

Noz-u ne’mat ko`p bo`lsin.

Baxtimizga tinch zamon,

Davr-u davron zo`r bo`lsin-

Um uf, jaqala, um uf, jaqala.

Jamshid:

Gul lolalar ochilsin,

El-u yurtga sochilsin.

Doim tinch zamon bo`lsin,

El-u yurt omon bo`lsin.

Um uf, jaqala, um uf, jaqala.

2-suxandon:

Bugungi davramizda Cho`pon bobo ham mehmon bo`lib turibdilar, endi u kishidan tilaklarini eshitamiz.

Cho`pon bobo:

Yangi yilimiz barakali yil bo`lsin-u qo`zilarimiz faqat egiz qo`zilasin.

1-suxandon:

Rahmat, bobojon, yaxshi tilaklaringiz uchun. Azizlar, Navro`zning o`z an’analari, urf-odatlari bor. Navro`z urf-odatlariga rioya qilgan kishi kam bo`lmaydi. Qani, kim qanday Navro`z urf-odatlarini biladi?

Fotima:

Navro`zga tayyorgarlik ko`radilar. Hovli, uylarni tozalaydilar.

Tohir:

Navro`zga qadar daraxt tanalarini oqlaydilar.

Shahboz:

Navro`zga qadar bog`lardagi xazonlarini yig`ib, yoqadilar.

Dilfuza:

Navro`zda bug`doy undirib, sumalak pishiradilar.

Farhod:

Navro`zda yangi kiyim-bosh kiyishadilar.

Xurshid:

Navro`zda qiz-javonlarga yangi kiyim-kechak olib berib, ularni xursand qiladilar.

Maftuna:

Navro`zda ot choptirishga tadorik ko`rishadi.

Asqar:

Navro`zda g`amgin o`tirmaydilar.

Gulmira:

Navro`zda Navro`z taomlari pishirishadi.

Yulduz:

Navro`z kuni hovlilarda chalg`i yasaydilar.

Sanjar:

Navro`zda qiz tanlagani chiqadilar.

Feruza:

Navro`zda araz-ginalarni unutadilar.

Mohidil:

Navro`zda qarindoshlarnikiga mehmonga boradilar.

Po`lat:

Navro`zda so`kinmaydilar.

Muhabbat:

Navro`zda nishonali qizga Navro`z haydasini eltadilar.

Zarnigor:

Navro`z oqshomi qarg`anmaydilar.

Niyoz:

Navro`z kuni ota-ona qabrini ziyorat qiladilar.

Sherzod:

Navro`z kuni otni, itni urmaydilar.

Anvar:

Navro`zda g`iybat qilmaydilar.

Shuhrat:

Navro`z kuni ilonni o`ldirmaydilar.

Malika:

Navro`z kuni barra yalpiz teradilar.

Luiza:

Navro`z kuni qizil rangli kiyimlarni kiyishadi.

Dilbar:

Navro`z kuni bemorlarga bayram taomlari jo`natiladi.

1-suxandon:

Rahmat, bolalar, mana, javoblaringizdan bildikki, sizlar Navro`z urf-odatlarini yaxshi o`rganib olibsizlar. Ularga amal qilsangiz, nur ustiga bur bo`lardi.

2-suxandon:

Endi sizlarning e’tiborlaringizga o`zbek milliy raqsi “Lazgi”ni qizlarmiz ijrosida havola etamiz.

1-suxandon:

Xalqimiz orasida Navro`z haqida juda ko`p afsonalar yaratilgan. Ular haqida nimalar deya olasizlar?

Yulduz:

Men hozir sizlarga “Jamshid mo`jiza yaratgan kun” afsonasini aytib beraman.

Jamshid podshoh bo`lgach, majusiylar dinini yangiladi va bu ish qilingan kunni Navro`z ya’ni yangi kun deb ataydi. Bu kun garchi Jamshiddan oldin ham hurmat qilingan bo`lsa-da, hayitga aylantirilmagan edi.

Navro`zni hayit qilish to`g`risida bunday ham deyilgan. Jamshid o`ziga arava yasattirib olgach, o`sha kuni aravaga chiqdi. Jinlar va shaytonlar uni havoga ko`tarib, bir kunda Dunbovanddan Bobilga olib bordilar. Odamlar bu ajoyib voqeani ko`rgach, o`sha kunni hayit qildilar va Jamshidning aravada uchishiga taqlid qilib, arg`umchoqlarda uchdilar.
(Qizlar arg`umchoqda uchib, “Halinchak” ashulasini aytishadi).
Sabina:

Men “Sulaymonning uzugi” afsonasini so`zlab beraman.

Sulaymon ibn Dovud o`zining sehrli uzugini yo`qotib qo`yibdi. Taxti poyi qo`lidan ketgan podsho ko`p xafa bo`lib, aziyat chekibdi. Ammo oradan 40 kun o`tgach, uning uzugi topilib, avvalgi ravnaqi yana o`ziga qaytib kelibdi. O`sha kuni olamdagi barcha xonlar, jonivorlar-u qushlar, devlar-u ajdarholar Sulaymonning yoniga bosh egib kelibdilar. Buni ko`rgan eronliklar: “Navro`z omaded, ya’ni yangi kun keldi”,- deyishibdi. Shu-shu o`sha kun Navro`z deb ataladigan bo`libdi.

Sehrli uzugi topilgach, Sulaymon shamolga buyuribdi. Shamol uni taxti bilan ko`tarib, uchurib ketayotgan ekan, bir qaldirg`ochning uyasiga duch kelib qolibdi.

Shunda qaldirg`och: “Ey podshoh, uyimda bir necha tuxumim bor edi. Ularga ozor berma”,- debdi.

Shunda Sulaymon qaldirg`ochning uyasini chetlab o`tib, bir xushmanzara joyga borib qolibdi. Shu payt haligi qaldirg`och og`zida suv olib kelibdi va Sulaymonga chigirtkaning oyog`ini hadya qilibdi.

Navro`z kuni suv sepib, sovg`alar berish udumi ana shundan qolgan ekan.
(O`quvchilar “Olov kashf etilgan kun”, “Jamshidning taxti” kabi Navro`z bayrami bilan bog`liq afsonalarni ham so`zlab berishadi).
1-suxandon:

Endi yigitlarimiz ijrosida o`zbek shoiri Muhammad Yusuf so`zi bilan aytiladigan “Navro`z” ashulasini tinglaymiz. Marhamat, tinglang.

Navro`zda Navro`zni ko`ming deyishdi,

Ko`ming va sukutga cho`ming, deyishdi.

Eskilik sarqiti asli bu sayil,

Ey bandayi mo`min deyishdi.

Mo`minlarning boshi egildi yerga,

G`alat qirg`inbarot boshlandi, do`stim.

Go`daklar jang qildi, oqsoqollar jim,

Shaxsan men bir yilda o`n yilga o`sdim.

Birov demadiki, ey gulira’no,

Navro`zlarsiz axir senda ne ma’no?

Xushomad yog`ildi iblis iziga

Shaytonga o`qildi ming hamdu sano.

Xo`sh, keyin ne bo`ldi, dersiz keyin-chi?

Mo`tabar sahnadan tushdi “o`yinchi”,

Qayga g`oyib bo`ldi, xudo biladi,

O`sha xudosizni izlab ko`ringchi.

Joningdan aylanay, Navro`z, kel endi,

Qirq yil qirg`indan ham omon qolganim.

Men seni hech kimga bermayman endi,

Yalmo`giz qo`ynidan tortib olganim.

2-suxandon:

Xalq maqollarida ham Navro`z ulug`langan. Sizlar Navro`z haqida qanday maqollarni bilasizlar?

Fotima:

Navro`zdan so`ng qish bo`lmas,

Mezondang so`ng yoz bo`lmas.

Tohir:

Hut kirdi, yer ostiga dud kirdi.

Sanjar:

Ulus kuni baraka bersin,

Yomonlik yerga kirsin.

Shuhrat:

Hamal yig`loq-savr yig`loq.

(“Andijon polkasi” raqsii ijro etiladi).
1-suxandon:

Bizning elda bu ayyom,

Sumalaksiz o`tmaydi.

Yalpiz, somsa yopmasdan,

Aziz mehmon kutmaydi.

Ha, azizlar, Navro`zni halim, halisa, go`ja va sumalaksiz tasavvur eta olmaymiz. Endi Aziz mehmonimiz Dono buvidan sumalak tayyorlash haqidagi fikrlarni eshitsak.

(Dono buvi sumalakning tayyorlashnishi haqidagi tajribalarini gapirib beradilar).
2-suxandon:

Rahmat, Dono buvi! Sizdan sumalak tayyorlashni bilib oldik. Qani, bolalar, sizlar sumalak va uni tayyorlanishi haqida qanday fikrlar bilasizlar?

Shahboz:

Sumalak bug`doyi undurilayotgan uyga begona kishi kiritilmaydi, tahorat qilib poklangan, ko`ngli toza odam bug`doy undurilayotgan uyga: “Bismillohir rohmanir rohim”,-deb kirib, maysaga suv sepadi.

Dinora:

Bug`doy maysasini odamlar ko`zlariga surtadilar.

Eldor:

Sumalak pishiriladigan kuni hamma ohorlik kiyim kiyadi. Yangi kiyimi bo`lmagan kishi barmog`iga ohorli mato bo`lagini bog`lab qo`ysa ham savob bo`ladi deyishadi.

Sanjar:

Sumalak pisiriladigan kuni otinoyilar avval qur’on o`qib, o`choq atrofiga chiroq yoqadilar, arvohlarga is chiqaradilar.

Jamshid:

Sumalak sharbatini qozonga solishdan avval doshqozondagi yog` qizdiriladi va tuzsiz xamirdan bog`irsoq pishirib, is chiqariladi.

Anvar:

Doshqozon tagiga o`tin qalayotgan ayol ko`nglida nima niyati bo`lsa, sumalak oldida aytsa, orzusi amalga osharmish.

Dilfuza:

Nopok odamlar sumalak qozon atrofiga yaqinlashtirilmaydi. Ular tahoratsiz qozonga yaqinlashsalar, qozon toshadi.

Maftuna:

Farzandtalab ayol sumalak pishirilayotgan qazon atrofini uch marta aylanib, niyatini aytsalar, murodlari hosil bo`ladi.

Luiza:

Sumalak tarqatilgandan keyin yaxshi niyat qilgan ayol doshqozonni yuvadi. So`ngra duo o`qib, qozon ichidagi suvni biror mevali daraxt tagiga to`kadi.

1-suxandon:

Rahmat, bolalar!

Hammamizga ma’lumki, o`zbek xalqi qadim-qadimdan o`yin-kulgiga o`ch. Navro`zni o`yin-kulgisiz tasavvur etish qiyin. Navbat, Navro`z qo`shiqlariga.

(“Boychechak”, “Kim oladi-ya”, “Sust xotin”, “Sumalakjon, sumalak” kabi ashula va raqslar ijro etiladi).

2-suxandon:

Navro`zni milliy o`yinlarsiz ham tasavvur etish qiyin. “Kurash”, “Xo`roz va qo`chqor uyushtirish”, “Ko`pkari”, “Ahug”, “Do`ppi tushurdi”, “Tuxum yorar”, “Varrak uchurish” kabi milliy o`yinlarimiz mavjud. Hozir sizlarni “Arqon tortish” o`yiniga taklif etamiz. Yigitlarimiz ikki guruhga bo`linib, arqon tortishadi.

1-suxandon:

Odatingni tark etma, Navro`z,

Yangi yilim – bahorim bahor.

Ta’rifingga topilgaymi so`z,

Hur diyorim, mangu iftixor!
2-suxandon:

Baxtimizga Navro`z bor bo`lsin,

Katta-kichik baxtiyor bo`lsin.

Omon bo`lsin, el-u yurt omon,

Omon bo`lsin turguncha zamon!

1-suxandon:

Xalqim, bayramlardan chiqmasin boshing,

Ushbu kun farqlay bil, yaxshi-yomonni.

Ogohlik doimo bo`lsin yo`ldoshing,

Ko`kka ko`taraylik O`zbekistonni.

El-u yurtim, Navro`zday uzaysin yoshing,

Mangu porlayversin hurlik quyoshing!
2-suxandon:

Shuning bilan Navro`z bayramiga bag`ishlangan “Odatingni tark etma, Navro`z!” deb nomlangan tadbirimiz o`z nihoyasiga yetdi.

E’tiboringiz uchun rahmat!

Doim bo`ling salomat!