Notiqlik – tarbiya va muloqotning o‘zagi

ЎзДЖТУ Халқаро журналистика факультети
 ф.ф.н., катта ўқитувчи Феруза ҲАЙИТОВА
Сўз – беқиёс қудратга эга муомала воситаси. Олимларнинг фикрича, айтаётган ҳар қандай сўзимиз инсон руҳиятига кўчиб, унда ижобий ёки салбий қувват ҳосил қилар экан. Яхши, ёқимли, қувончли сўзлар табиийки, инсонга хуш кайфият бахш этади, кўнгилни равшанлаштиради. Сўз билан суҳбатдошни ўзига ром этиш, эркин ва чиройли фикр билдира олиш Шарқда, хусусан, ўзбекларда тарбия, маърифат, зиёлиликнинг муҳим белгиларидан ҳисобланади. Улуғ бобомиз Юсуф Хос Хожиб “Одобнинг боши тилдир” деб бежиз айтмаган. Зотан, нутқнинг гўзаллиги, тилнинг бурролиги, лисоний ифоданинг аниқ ва тиниқлиги инсон учун ўзига хос ҳусндир, бу ҳусн охир-оқибатда жамиятнинг, миллатнинг ҳуснини кўрсатади.
Сиёсий жараёнларда яхши нутқ сўзлаш — нотиқлик муҳим аҳамиятга эга масаладир. Сиёсий партиянинг ҳар бир фаоли ўз нотиқлиги билан партия ғояларини тарғиб қилиши, шу орқали электорат ишончини қозониши ва атрофига минглаб хайрихоҳларни бирлаштира олиши лозим. Шу боис Ўзбекистон “Адолат” СДП бу масалага алоҳида эътибор қаратиб, партия ходимларида нутқ маданияти, нотиқликни юксалтиришга алоҳида эътибор қаратиб келади.
Партия Сиёсий Кенгаши Марказий аппарати томонидан “Нотиқлик санъати ва нутқ маданияти. Нотиқлик маҳоратини ошириш йўллари ва услублари” мавзусида ташкил этилган навбатдаги ўқув-семинар мана шу мақсадга хизмат қилди. Семинарда Тошкент ирригация ва қишлоқ хўжалигини механизациялаш муҳандислари институти доценти, филология фанлари номзоди, Халқаро “Антик дунё” ва “Турон” фанлар академияларининг академиги Раҳимбой Жуманиёзов иштирок этиб, нотиқлик санъатининг ўзига хос жиҳатлари ҳақида тўхталиб ўтди.
— Таълимнинг очқичи – нутқ, тарбиянинг тутқичи – хулқ, мулоқотнинг калити – нутқ, муомаланинг калити – хулқ билан, — деди ўқув-семинарда маъруза қилган Раҳимбой Жуманиёзов. — Тил тактикаси — тараққиёт стратегиясининг таъсирчан механизмидир. Сиёсий партия лидерлари ва фаолларида нутқ маданияти ва нотиқлик санъатининг юксак даражада бўлиши аҳоли ишончи, сайловлардаги муваффақият ва партия ғоялари ижобатининг муҳим омилидир.
Семинарда нутқ маданияти ва нотиқлик санъатининг умумий ҳамда ўхшаш томонлари, шунингдек, нотиқ маърузасининг оммага қай даражада таъсир қилиши, уларни ишонтириш, кайфиятини ўзгартириш, қўйилаётган масалаларга диққатни тортиш маҳорати борасида баҳс-мунозара юритилди.
Дилором АДИЛОВА,
Ўзбекистон “Адолат” СДП Сиёсий Кенгаши
Марказий аппарати сектор мудири
НУТҚ МАДАНИЯТИ, НОТИҚЛИК САНЪАТИ — МУВАФФАҚИЯТНИНГ МУҲИМ ҚАДАМИ was last modified: Март 30th, 2018 by matbuo