«Noorganik moddalar ishlab chiqarishning uskunalari va loyixalash»

Vakuum ostida bug`latish paytida ikkilamchi bug`ni maxsus kondensatorda kondensastiyalash yo`li bilan qurilmada vakuum hosil qilinadi va nasos yordamida kondensastiyalanmagan gazlar so`rib olinadi. Bu usulda jarayon olib borilsa, eritmaning qaynash temperaturasini pasaytirishga erishsa bo`ladi. Natijada yuqori temperaturaga o`ta ta’sirchan mahsulotlar sifatini saqlab qolish imkoniyati tug`iladi. Undan tashqari, vakuumni jarayonda qo`llash, harakatga keltiruvchi kuch miqdorini oshiradi va bug`latish qurilmasining issiqlik almashinish yuzasini, hamda metall sarfini kamaytirish imkonini beradi.

Vakuum ostida bug`latishning yana bir afzalligi shundaki, past temperatura va bosimli issiqlik eltkichlardan foydalanish mumkin. Bu usulda bug`latilganda, hosil bo`lgan ikkilamchi bug`ni, keyingi korpusda birlamchi bug` sifatida qo`llash mumkin.

Albatta, bu usulning kamchiliklari ham bor: jarayonda vakuumni qo`llash uning narxini oshiradi; bug`latgichdan tashqari bir nechta qo`shimcha qurilma va moslamalar ishlatish kerak.