Nigora Erkaboyeva pedagogik mahorat (O‘quv qo‘llanma) Toshkent

O‘QITUVCHI MEHNATINI ILMIY ASOSDA TASHKIL ETISH

O‘quv rejasi:

1. 
   O‘qituvchi mehnatini ilmiy tashkil etish.
   
2. 
   Pedagogik faoliyatni rejalashtirish.
   
3. 
   O‘qituvchi mehnatini ilmiy tashkil etishga ta’sir ko’rsatuvchi omillar.
   
4. 
   Pedagogik tajriba to‘plash.
   

Tayanch tushuncha va iboralar: mehnat, o‘qituvchi mehnati, o‘qituvchi mehnatini tashkil etish, mehnatni ilmiy asosda tashkil etish, pedagogik faoliyatni rejalashtirish, o‘qituvchi mehnatini ilmiy tashkil etishga ta’sir ko’rsatuvchi omillar, pedagogik tajriba to‘plash.

1. 
   O‘qituvchi mehnatini ilmiy tashkil etish. O‘qituvchi barkamol avlodni tarbiyalash jarayonida ishtirok etar ekan, nafaqat ma’naviy-axloqiy madaniyati bilan atrofdagilarga o‘rnak bo‘lishi, shu bilan birga, pedagogik mahoratini namoyon eta olishi, yetuk pedagog sifatida malakali kadrlarni tayyorlash ishiga o‘zining munosib hissasini qo‘shishi zarur. Bunda uning mehnati va ana shu mehnatning qanday tashkil etilishi muhim ahamiyatga ega.
   

O‘qituvchining mehnati u tomonidan kasbiy faoliyatning tashkil etilishini anglatadi. Mehnat shaxslar tomonidan tashkil etiladigan faoliyatning muhim turlaridan biri hisoblanadi.
Mehnat – biror maqsad uchun qaratilgan aqliy yoki jismoniy faoliyat. O‘qituvchining mehnati ko‘p holatlarda mehnat deb emas, balki faoliyat,
yanada aniqrog‘i, pedagogik faoliyat deb yuritiladi. Ushbu tushunchalarning mohiyati bilan tanishish fikrni oydinlashtiradi.
Faoliyat – 1) anglangan maqsad bilan boshqariladigan ichki (psixik) va tashqi (jismoniy) harakatlar yig‘indisi; 2) shaxs tomonidan tabiiy, ijtimoiy maqsadga muvofiq tashkil etiluvchi kundalik, ijtimoiy yoki kasbiy harakatlarning muayyan shakli, ko‘rinishi.
Pedagogik faoliyat – o‘qituvchi tomonidan aniq maqsadlarga muvofiq tashkil etiladigan kasbiy harakatlar majmui.
O‘qituvchi tomonidan pedagogik faoliyat (o‘qituvchi mehnati)ning tashkil etilishi kasbiy mehnatning tashkiliy-amaliy jihatdan oqilona uyushtirilishini ifodalaydi. Pedagogik faoliyatni ilmiy asosda tashkil etish talab etiladi.