Нефть ва газни қайта ишлаш жараёнлари ва ускуналари Ўзбекистон Республикаси Олий ва ўрта махсус таълим вазирлиги олий ўқув юртлари бакалавриатининг «Нефть ва нефть-газни қайта ишлаш технологияси»

Ротацион экстракторлар. Бундай ускуналарда фазаларнинг контакти ва уларни ажратиш марказдан қочма куч таъсирида амалга оширилади. 15.13-расмда мойларни тозалашга мўлжалланган ротацион-дискли экстракторнинг схемаси кўрсатилган. Ҳалқасимон тўсиқлар 2 ёрдамида ускуна бир неча секцияларга ажратилган. Экстракторнинг ўртасидаги айланувчи вал 4 га япалоқ дисклар 3 бирлаштирилган. Вал катта тезлик билан ҳаракат қилганда, енгил фаза марказдан қочма куч таъсирида дискнинг чекасига томон ҳаракат қилади, оғир фаза эса роторнинг марказига яқин жойни эгаллайди. Натижада фазаларнинг жадаллаштирилган ҳаракати юз беради ва секцияларда узлуксиз равишда фазаларнинг ажралиши ҳам давом этади. Фазалар контактини янада жадаллаштириш учун япалоқ дискларга куракчалар бириктирилади (15.13-расм, б). Бундай ҳолатда куракчалар ёрдамида улоқтирилган суюқлик тўр қатлами 8 орқали ўтади. Умуман олганда, экстракторнинг ичида фазаларнинг қарама-қарши йўналган ҳаракати пайдо бўлади.
Саноатда марказдан қочма кучлар таъсирида ишлайдиган ротацион экстракторларнинг бошқа турлари ҳам ишлатилади. Марказдан қочма куч майдонида ишлайдиган экстракторларда жараён максимал тезлик билан боради. Аралашма ва эритувчи зичликларининг айирмаси жуда кичик бўлган ҳолатда ҳам, эмульсия ҳосил бўлишга мойил бўлган суюқликларни ажратишда ҳам бундай экстракторларни ишлатиш мумкин. Бу турдаги экстракторларнинг тузилиши жуда ихчам, иш унуми катта.



15.13 - расм. Ротацион-дискли экстрактор:
а - ротацион-дискли экстракторнинг схемаси; б- ротацион-дискли экстрактор контакт зонасининг схемаси; 1,5-тақсимловчи панжаралар; 2- статор ҳалқаси; 3-ротор диски; 4-ротор вали; 6-куракчалар; 7-горизонтал ҳалқсимон кайтаргичлар; 8-тўр. Окимлар: I-енгил фаза; II-эритувчи; III-енгил фаза (экстракт); IV- оғир фаза (рафинат).

Бундай экстракторлар камчиликлардан ҳам ҳоли эмас: тузилиши бирмунча мураккаб; айрим пайтларда суюқликларни ускунага босим билан беришга тўғри келади.