Natural english

LESSON 0.3
0.3-DARS
Assalomu alaykum.
Uchinchi darsimizga xush kelibsiz. Uni boshlashdan avval qomatlarni rostlab, chuqur-chuqur nafas olamiz, tabassum qilamiz hamda mavzuni eshitayotib bir joyda turib qolmaymiz. Bir yaxshi musiqa qo‘yib, raqsga tushib olsangiz ham bo‘ladi. Kayfiyatlar a’lo bo‘lgach, quyidagi tartibda darslarimizni boshlaymiz.
Main audio qismlarini shunchaki tinglang.
Eshitayotganda tarjimasiga qarab boring. Maqsad – kitobga qaramasdan tinglaganda ham tushuna olish. Matnsiz tushunishni boshlashingiz bilan kitobga qarashdan voz keching!
Darsning savol-javob (Mini Story) qismida savollarga javob berishni boshlang. Kerak bo‘lsa, «pause» tugmasidan foydalaning.
Boshida sekin javob bersangiz ham bo‘ladi.
Endi savollarga tezroq javob bering.
Darslarni 7 kun davomida kuniga kamida 1 soatdan yoki undan ko‘proq eshiting. Har bir o‘quvchining o‘rganish tezligi turlicha. Sistemamiz sizga o‘z tezligingizda o‘rganish imkonini beradi.
Savol: Men bu darslarni takror-takror eshitib zerikib ketyapman. Nima qilay? Shunday eshitishda davom etaveraymi yoki keyingi darsga o‘taymi? Keyingi darslarga o‘tishni juda xohlayapman.
Javob: Birinchidan, ko‘plab insonlar ingliz tilida gapirish uchun yillab vaqtini sarflashadi. Yakunda esa ingliz tilini yaxshi bilishlariga qaramsadan gaplasha olmaydilar. Lekin qo‘lingizda ingliz tilida gapirishingizga yordam beradigan eng ajoyib sistema turibdi. Siz menga o‘xshab 11 yilni behuda isrof qilishingiz shart emas. Shunday ajoyib imkoniyatdan xursand bo‘lishingiz kerak, zerikdim deyishingiz umuman to‘g‘ri emas. Shuni anglang.
Ikkinchidan, oddiy odamlar zerikadi, ustalar esa mazza qiladi. Oddiy odamlar har qanday narsadan zerikish topadi. Ustalar har bir ishini ustalik bilan qiladilar.
Uchinchidan, har kuni har xil jihatlarga e’tibor bering. Birinchi kun tarjimasini to‘liq tushunishga, ikkinchi kun savollarga sekinroq bo‘lsa-da javob berishga e’tibor qarating. Uchinchi va to‘rtinchi kunlari savollarga juda ham tez javob berishga harakat qiling. Beshinchi kuni aytilgan so‘zni aytilganday takrorlang. Agar yuqori kayfiyatda aytilsa, siz ham yuqori kayfiyatda ayting. Ohang va toniga e’tibor bering. Bu tallaffuzga katta yordam beradi. Shu tarzda har kuni e’tiborni turli nuqtalarga qarating – zerikmaysiz. Harakatda bo‘ling. Kuling. Raqsga tushing. Qomatingizni tik tuting. Kayfiyatingiz ko‘tariladi, zerikishdan asar qolmaydi. Kayfiyatingizni o‘zingiz boshqarasiz. Birov buning uchun mas’ul emas. Biling, faqat o‘zingiz mas’ul va javobgarsiz. O‘zingiz zerikmasligingiz choralarini ko‘rishingiz kerak.