N. Hakimov, E. Abdullayev, F. Halimov, A. Xamidova umurtqasizlar zoologiyasidan amaliy mashg’ulotlar

Qumchuvalchang. Qumchuvalchangi Barens va Oq dengizlarida, qumdan iborat sohilga yaqin zonalar (litoral zona) da ikki tomoni ochiq yoysimon naycha ichida yashaydi. Gavda uzunligi 20-30 sm gacha. Qum orasida o’troq hayot kechirganligi sababli tana tuzilishi ham ancha o’zgargan. Gavdaning tashqi sirtida ko’rinadigan segmentasiya chegaralari ichki segmentasiyaga mos kelmaydi, balki tashqi 3-5 segment chizig’i bitta haqiqiy segment hisoblanadi. Haqiqiy segmentlardagi parapodiyalar nereis parapodiyalariga nisbatan ancha past taraqqiy etgan. Bunday parapodiyalar faqat tananing oldingi qismida bo’ladi. Qumchuvalchangining ingichkalashgan dum qismida parapodiyalar umuman reduksiyalangan. Gavdaning o’rta qismidagi parapodiyalar jabralar bilan qo’shilib ketgan. Qumchuvalchangi organik chirindi bilan oziqlanadi. Buning uchun chirindiga boy bo’lgan balchiqni ichagi orqali o’tkazadi.