Murakkab sharoitlarda neft va gaz quduqlarini qazish

6.5-rasm. O‘z-o‘zidan ponalanadigan protektorlar.

a - diametri 0,114 m bo‘lgan burg’ilash quvurlari uchun;

b - diametri 0,140 m bo‘lgan burg’ilash quvurlari uchun.

Diametri 0,114 m bo‘lgan protektor quvurlarning istalgan joyiga o‘rnatiladi va u burg’ilash birikmasi bo‘yicha yuqori va pastga harakatlanganda o‘z-o‘zidan ponalanadi. Diametri 0,140 m bo‘lgan protektorlar esa burg’ilash qulfi tagiga o‘rnatiladi. U ham quvurlar birikmasi bo‘yicha yuqoriga harakatlanganda o‘z-o‘zidan ponalanadi. Shunday qilib quduqni konstruksiyasi va mustahkamlovchi quvurlar birikmalarining turlariga qarab burg’ilash qurilma va asbob-uskunalari tanlanadi.

Quduqni burg’ilash jarayoni yer ustida joylashgan kompleks agregatlar, mexanizmlar va moslamalar yordamida amalga oshiriladi.

Burg’ilash qurilmasi majmuasiga burg’ilash minorasi, nasoslar, tok uzatadigan elektr o‘tkazgichlar, agregatlar, har xil mexanizmlar, nazorat-o‘lchov asboblari, minora va qurilmalar o‘rnatiladigan poydevorlar va boshqalar kiradi.

Burg’ilash jarayoni har xil sharoitlarda, maqsadlarda, chuqurliklarda hamda turlicha konstruksiyalarda bajarilganligi uchun har xil belgili hozirgi kun talabiga javob beradigan yuqori texnik-iqtisodiy ko‘rsatkichlarga ega bo‘lgan qurilmalar ishlatiladi.

Odatda burg’ilash qurilmasining asosiy parametri yuk ko‘tarish qobiliyatiga qarab belgilanadi.

Burg’ilash qurilmasining yuk ko‘tarish qobiliyati nominal va maksimal bo‘ladi. Qurilmaning nominal yuk ko‘taruvchanligi ilgakdagi vertlyug va burg’ilash asboblari og‘irligini ifodalaydi. Odatda qurilmaning maksimal yuk ko‘tarishi nominal yuk ko‘tarishga nisbatan 60-70 % yuqori bo‘ladi.