Мундарижа I боб. “Кўп тармоқли фермер хўжалигини ташкил этиш ва бошқариш” фанининг предмети, мақсади ва вазифалари 10

Ёқилғи-мойлаш материаллари билан таъминлаш тизими- қишлоқ хўжалиги техникалари учун зарур бўлган ёқилғи ва мойлаш материалларини узлуксиз таъминлаш ва сифатли хизмат кўрсатиш учун ташкил этилади. Фермер хўжаликлари билан ушбу тизим ўртасидаги алоқадорлик шартнома асосида бир-бирига ишонч, ўзаро манфаатдорлик, шартномавий мажбуриятларни сўзсиз бажаришга асосланган бўлади. Шартномавий муносабатларни такомиллаштириш, хизмат кўрсатишнинг бозор меҳанизмларига мос келадиган усулларини қўллаш мазкур тизимнинг барқарорлигини таъминловчи муҳим омилдир.
Минерал ўғитлар ва ўсимликларни ҳимоя қилиш воситалари тизими - ўз моҳиятига кўра ернинг иқтисодий унумдорлигини ошириш ва қишлоқ хўжалик экинларини зараркунандалардан сақлашга, пировард натижада ердан мўл ҳосил олишга қаратилган бўлади.
Фермер хўжаликларининг иқтисодий барқарор ривож топишида иқтисодий тизимнинг тутган ўрни беқиёсдир. Тизимнинг таркибий тузилмаси қишлоқ хўжалигига сифатли хизмат кўрсатиш нуқтаи назаридан ташкил топади. Шу билан бирга мазкур тизимнинг фаолиятига баҳо беришда қишлоқ хўжалигида эришилган ютуқлар ёки кўрсаткичлар (меҳнат унумдорлиги, маҳсулот таннархи, фойда, ҳосилдорлик) асос қилиб олинади.
Сув истеъмолчилари уюшмаси (СИУ) тугатилган ширкат хўжаликлари ўрнида ташкил топган нисбатан янги нотижорат нодавлат институционал тузилмадир. Тузилма асосан фермер хўжаликларига кафолатли сув ресурсларини етказиб беради, ички хўжалик суғориш тармоқларини таъмирлаш, ерларнинг мелиоратив ҳолатини яхшилашга оид тадбирларни амалга оширади. СИУларнинг таркибий тузилиши улар хизмат кўрсатадиган суғориладиган ерлар ҳажмига боғлиқ бўлади. Фермер хўжаликлари билан СИУлар ўртасидаги иқтисодий муносабатлар шартнома асосида ташкил этилади. СИУларнинг фаолият кўрсатиши учун зарур бўлган молиявий маблағлар фермер хўжаликларига етказиб берилган сув ва ирригация тармоқларини, мелиоратив фондларини таъмирлаш ёки қайта тиклашга тўланган ҳақ ҳисобига шаклланади.
Ахборот таъминоти, консалтинг ва аудит хизмати тизими шаклланиш босқичида турибди. Истиқболда ушбу хизмат тизимига бўлган талаб ошиб боради. Бу тизим фермер хўжаликларини бозор ҳолати бўйича ахборотлар билан таъминлаш, бизнес-режани ишлаб чиқишда кўмаклашиш, хўжаликнинг иқтисодий фаолиятини тафтиш қилиш ва баҳолаш каби кенг қамровли хизматлар мажмуини бажаради. Малакали кадрларни тайёрлаш, хорижий тажрибаларни ўрганиш, мижозларга сифатли хизмат кўрсатиб, уларнинг ишончини оқлаш мазкур тизимни барқарор фаолият кўрсатиши учун замин яратади.