«muhandislik kommunikatsiyalari qurilishi» kafedrasi

Gazlashtirish sistemalarini loyihalashtirish. Loyiha hujjatlarining tarkibi

Shahar gazlashtirish tarmoqlari asosan ikki bosqichda loyihalashtiriladi. Birinchi bosqichda texnik-ishchi loyiha ishlanadi. Ikkinchi bosqichda esa ishchi chizmalari ishlab chiqiladi. Texnik-ishchi loyihada shahar bosh rejasi asosida gazlashtirish sistemasining sxemasi, gaz iste’moli normalari, yillik va soatlik gaz iste’mollari, iste’mol tartibi, gaz quvurlarini o‘tkazish usullari va chizmalari, GRP larning joylashishi, hamda gaz quvurlarining diametrlari aniqlanadi. Bundan tashqari, texnik ishchi loyihada korroziyaga qarshi qoplamalarning turlari, elektr himoya usullari, quvurlar chuqurligi, tabiiy va sun’iy-to‘siqlardan o‘tish loyihalari ishlab chiqiladi va bajariladigan ishlarning umumiy hajmi va ularga sarflanadigan mablag‘lar va bu ishlarga ketadigan vaqtlar aniqlanadi. Texnik - ishchi loyiha tushuntirish xati shaklida berilib, unda 15000 masshtabdagi shahar bosh rejasida gaz quvurlarining sxemasi va moliya smeta hisoblari berilishi kerak.

Ishchi chizmalar GRP lar, gaz quvurining ayrim inshootlari, hamda ko‘chalardagi gaz quvurlarining ayrim bo‘laklari uchun masshtab 1:500 da yer osti inshootlarining joylashishi, hamda ko‘ndalang kesimlari bilan berilgan bo‘ladi. Unda gaz quvurlarini ayrim qo‘zg‘almas inshootlarga nisbatan bog‘lab ko‘rsatiladi. Bundan tashqari, GRP larning joylashishi, ularga kelayotgan inshootlarning chizmalari beriladi. Ishchi sxemalar asosida smetalar tuziladi. Odatda gazlashtirish sistemasi loyihasi kelajakdagi 10-15 yil oldingi mo‘ljallab tuziladi. Bunda aholining ko‘payishi, kelajakda quriladigan sanoat, kommunal korxonalar, va boshqa iste’molchilar hisobga olinishi kerak. Bu davrning ikki-uch yili loyiha ishlab chiqarishga, hamda aholi punktini gaz qabul qilishga tayyorlashga ketadi. Bundan tashqari 7-8 yil loyihada mo‘ljallangan ko‘rsatkichlarga yetish uchun ketadi. Ba’zi hollarda loyiha va qurilish ishlari ikki yoki uch navbatga mo‘ljallab olib boriladi.