|
Birinchi yo’nalish, turizm-ekskursiya xizmatining sifati va hajmini hozirda mavjud bo’lgan moddiy-texnik baza asosida oshirishni ko’zda tutadi.
Ikkinchi yo’nalish, moddiy bazani yanada rivojlantirishni, turizm muassasalari tarmog’ini kengaytirishni va qo’shimcha turistik resurslarni o’zlashtirishni ko’zda tutadi.
Ma’lum tarixiy joylar, obidalar va hududlarni maxsus muhofazaga olmaslik, ularni yemirilishiga, yomon ahvolga tushib qolishiga olib keladi. Shu sababli
maxsus muhofaza qilinadigan tarixiy-madaniy hudud va muzeylarda qo’riqxona tashkil etilishi maqsadga muvofiq deb hisoblaymiz. Muhofaza qilinadigan hududiy shakl hisoblangan muzey-qo’riqxona o’z hududidagi tarixiy-madaniy merosni, atrof-muhitni muhofaza ostiga oladi.
Eng asosiysi, bu hududdan turizm maqsadida tartibli, me’yor darajasida foydalanish imkoniyati tug’iladi. Bulardan tashqari, quyidagi ishlarni bajaradi:
madaniy va tabiiy landshaftlarning yemirilishi, yomonlashishiga olib keluvchi vositalardan saqlaydi;
tartibsiz turizmdan saqlab, ekskursiya xizmatlari va boshqa xizmatlarni joriy etish orqali milliy iqtisodiyotga daromad keltiradi;
bundan tashqari, daromad evaziga shu hududlarning o’zini ham saqlash va ushlab turishi uchun iqtisodiy imkoniyat yaratiladi.
Albatta tumanlardagi ayrim tarixiy joylar, ajoyib tabiat hududlariga alohida e’tibor qaratilmasa, ular turistik jozibadorligini yo’qotadi. Shu sababli, birinchidan, bu hududlar tarixiy-madaniy meros yoki rekreatsion resurs sifatida tan olinib, maxsus muhofaza ostiga olinishi (maxsus ruyxatga olinishi, ekologik, arxitektura jihatdan nazorat ostiga olinib, muhofaza etish) kerak. Ikkinchidan, bu hududlardan foydalanish va muhofaza etishning iqtisodiy sharoitini yaratish lozim. Bunda davlatning iqtisodiy-siyosiy ko’magi, soliq siyosati, moliyalashtirish dasturi kabi ishlarni amalga oshirish maqsadga muvofiq bo’ladi.
Тarixiy, arxitektura yodgorliklaridan turizm maqsadida samarali foydalanishga to’sqinlik qiluvchi omillardan biri bu tarixiy joylar oldida, atrofida har xil qurilishlarning (turar joy, savdo do’koni, maishiy xizmat ob’ektlari, yo’l va boshqalar) bo’lishidir.
Viloyatda turizmning turli yo’nalishlarini masalan, diniy, tarixiy, arxeologik, etnografik, ekoturizm va h.k.larni rivojlantirish uchun imkoniyatlar mavjud bo’lib, bu imkoniyatlardan to’laqonli foydalanish lozimligini taqozo qiladi. Bu esa mavjud infratuzilmaning holatini talabga javob beradigan darajada ushlab turishini ta’minlashni taqozo qiladi.
Viloyatda milliy turistik mahsulot shakllantirish masalasi to’liq yechilgan emas. Bu imkoniyatlarning ishga solinishi nafaqat turizm sohasining, balki butun iqtisodiyotning samaradorligini oshirishga olib keladi.
Хulosa o’rnida shuni ta’kidlash joizki, Navoiy viloyatida turizmni tashkil etish va rivojlantirish borasida katta turistik salohiyatga ega bo’lib, bu yerda yana qo’shimcha tarixiy, diniy, madaniy-etnografik turistik resurslarga boy hisoblangan qishloq joylarining mavjudligi keng turistik imkoniyatlardan dalolat beradi. Bu salohiyatdan turizm faoliyatida samarali foydalanish uchun quyidagi ishlarni amalga oshirish kerak deb hisoblaymiz:
mintaqada mavjud turistik resurslar asosida yangi turistik mahsulotlarni shakllantirish hamda ekskursiya xizmatini takomillashtirish;
“Тur xizmatlar paketi”ni shakllantirishda iste’molchilar talabiga javob bera oladigan paketlar narxini to’g’ri belgilash;
turmahsulotlarning xaridorligini oshirish maqsadida targ’ibot-tashviqot, reklama jarayonini rivojlantirish;
turistik firmalarning faoliyatini ekologik, diniy, madaniy, sport ekstremal sayyohlik sohalariga yo’naltirish;
turizm bozorining rivojlanish imkoniyatlarini hisobga olgan holda, chet el mamlakatlaridan keluvchi sayyohlarning tashrif maqsadlari va xususiyatlarini o’rganish, ularga eng qiziqarli yo’nalishlarni taqdim etish;
xizmatlar turini, ayniqsa, sayyohlik yo’nalishiga kiritiluvchi xizmatlar turini kengaytirish orqali milliy turistik mahsulot raqobatdoshligini oshirish;
xalqaro sayyohlik ko’rgazmalarini tashkil etish va o’tkazish.
Viloyatda turizmni rivojlantirish borasidagi bizning tavsiyalarimiz amaliyotga tadbiq qilinsa, Navoiy viloyatida ham turizmni rivojlantirish imkoniyatlari paydo bo’ladi va rivojlantirish uchun bir qancha ichki imkoniyatlar yechiladi. Pirovardida mamlakat iqtisodiyoti ham rivojlanadi, aholining farovon yashash imkoniyati ham yanada kengayadi.
Do'stlaringiz bilan baham: |
