Mintaqaviy temir yo‘l uzelining texnik foydalanish tasnifi

1-bob. Mintaqaviy temir yo‘l uzelining texnik foydalanish tasnifi

1.1 2-Mintaqaviy temir yo‘l uzeli uchastkalarining texnik foydalanish tasnifi

Ishi ko‘rib chiqilayotgan 2-MTU bir yo‘llik uchastkada joylashgan. 2-MTU Respublikamiz turli xil xo‘jaliklarining temir yo‘l transportga bo‘lgan ehtiyojini ta’minlovchi yirik magistrallaridan birining tarkibiga kiradi. 2-MTU tomonidan amalga oshiriladigan tashishlarda ko‘mir, ruda, qurilish materiallari, yog‘och va don mahsulotlari kabi yuklar muhim o‘rin egallaydi.

2-MTU uchastkalarining sxematik ko‘rinishi 1.1-rasmda keltirilgan. 2-MTU uchastkalarining umumiy uzunligi 300 kilometrni tashkil etadi, jumladan R-T uchastkasi 123 kilometr, T-I uchastkasi 88 kilometr va T-O uchastkasi 89 kilometr. Stansiyalardagi qabul qilish-jo‘natish yo‘llarining foydali uzunligi 1050 metr.

1.1-rasm. Mintaqaviy temir yo‘l uzeli uchastkalarining joylashish sxemasi

2-MTUning R-T, T-I va T-O uchastkalaridagi mahalliy ishlar terma poyezdlar tomonidan bajariladi.

2-MTU tarkibiga 4 ta texnik, ya’ni R, T, I, O stansiyalari va 10 ta oraliq a, b, v, g, d, e, j, z, i, k stansiyalari kiradi. 2-MTU 3 ta MTUlari bilan chegaradosh, bular E stansiyasi orqali 1-MTU bilan, N stansiyasi orqali 3-MTU bilan va V stansiyasi orqali 4-MTU bilan tutashadi.

2-MTUning barcha uchastkalari avtoblokirovka tizimi bilan jihozlangan bo‘lib, texnik va oraliq stansiyalaridagi strelka o‘tkazgichlari va signallar elektr markazlashtirilgan. MTU joylashgan yo‘nalishdagi tortuv turi elektrli bo‘lib, yuk tashish harakatida “2TE10П” va yo‘lovchi tashish harakatida “VL-80” rusumdagi lokomotivlardan foydalaniladi. Stansiyalardagi manyovr ishlari teplovozlar yordamida amalga oshiriladi.

2-MTU uchastkalaridagi hisobiy nishablik 8,8‰ ni tashkil etadi. Barcha peregonlar va stansiya yo‘llarida R65 markali relslar yotqizilgan, ballast qatlami shebenli, shpallar turi esa, temir beton bo‘lib, har bir kilometrga 1840 ta shpal ishlatilgan.

Asosiy lokomotiv deposi T stansiyasida va aylanish depolari E, N, V stansiyalarida joylashgan. 2-MTUda umumiy yuklash 439 vagonni, tushirish esa, 464 vagonni, tranzit vagon oqimlari 2248/105 vagonni tashkil etadi hamda u, barcha temir yo‘l chegara punktlaridan 2984 ta vagonni qabul qilib, 2753/118 vagonni topshiradi (1.1-jadval). 2-MTU yuqoridagi ko‘rsatkichlar va ish hajmidan ko‘rinib turibdiki, MTU uchastkalari asosan tranzit poyezdlarni o‘tkazish jarayonlari bilan shug‘ullanadi.

Yukli poyezd tarkibidagi vagonlar soni 59 ta, bo‘sh poyezd tarkibidagi vagonlar soni 73 ta va yuk poyezdining og‘irligi 4850 tonnani tashkil etadi (hisoblar natijasiga ko‘ra aniqlanadi).

2-MTU asosan tranzit poyezdlarni o‘tkazish uchun mo‘ljallangan, chunki olib chiqish va olib kirishlar miqdori juda kam darajada. Yuqorida keltirilgan barcha jihatlarni e’tiborga olgan holda 2-MTU uchastkalarining ishini tashkil etish tartiblari ishlab chiqilgan.