Microsoft Word Tursunboyev S. O'zbek teatri tarixi. Majmua

«HAMMAMIZNI HAYRATGA SOLDI» 
Avji  qish  chillasida  Shukur  Burhonov  menga:  «Bugun  kechqurun  domla 
Shayxzodanikiga  boramiz»,  —  deb  qoldi.  Ammo  sababini  aytmadi.  Domla  meni  har 
ko’rganlarida,  ozorbayjon  tilida:  «Bolam  nega  biznikiga  kelmaysan,  Sakinaxonim  sen  ila 
orzusida»,  derdi.  «Rahmat  domla,  yaxshi  kunlaringizda,  albatta  boramiz»,  —  deb  qo’ya 
qolardim.  O’sha  so’zlar  esimga  tushib,  ehtimol,  bizni  mehmonga  aytgandir,  deb  o’yladim 
ichimda. 
Xullas,  to’rt  kishi  —  Shukur  Burhonov,  Olim  Xo’jayev,  Sa’dixon  Tabibullayev  va 
men qo’ltiqlashib bordik. Domla Shayxzodaning o’zi qarshi olib, iliq so’rashdi. Dasturxon 
yozildi.  Sakinaxonimning  qish  chillasida  tok  bargiga  qiyma  o’rab  pishirilgan  do’lmasidan 
tanovul  qildik.  Dasturxon  yig’ishtirilgach,  domla:  «Mana  endi  asar  o’qisak  bo’ladi»,  — 
dedi. Shunda kelishimizdan maqsad asar o’qish ekanini angladim. 
«Mirzo  Ulug’bek»  tragediyasi  o’qildi.  Asarni  domlaning  o’zlari  o’qidilar.  Ana 
o’shanda  men Shayxzoda zamon shoiri,  foziligina emas, she’rning  har so’zini, so’zinigina 
emas,  har  bir  tinish  belgisini,  urg’usini,  tinimini,  ritm  va  ohangini  o’rniga  qo’yib  chiroyli 
qilib  o’qiydigan  mohir  suhandon  ekanini  ko’rib  qoyil  qoldim.  Asar  hammamizga  ortiq 
darajada  manzur  bo’ldi.  Ko’lamining  kengligi,  falsafasining  teranligi,  dramatik 
kolliziyalarning  o’tkirligi,  xarakterlarning  murakkabligi,  tilining  go’zalligi  bilan  asar 
hammamizni hayratga soldi, asir qildi. 
 
Qudrat Xo’jayev
, «Gozallik shaydosiman» 
1976-yil, 100-bet. 
 

---