Microsoft Word togaymurod otamdan qolgan dalalar lotin ziyouz com doc

 
23 
Kun g‘o‘zalarim uchida ilashib-ilashib qoldi. 
Men omborxonadan bir orqa dorixalta orqalab keldim. 
Dorixaltalarni varr-parr yirtdim. Bo‘lak-bo‘lak etdim. Kaftday-kaftday etdim. 
O‘qariq bilan egat quloqqa doriqog‘oz qo‘ydim. Sharsharasimon-sharsharasimon etib qo‘ydim. 
Quloqqa bosib-bosib qo‘ydim. 
Bosh-adoq o‘qariqni ana shu maqomda doriqog‘ozladim. 
Mirobdan suv haydab keldim. 
Suv o‘qariqlab-o‘qariqlab oqdi. 
Malla chumchuq suv pishinib-suv pishinib o‘ynadi. Qulrang chumchuq qanot tarab-qanot tarab 
o‘ynadi. 
Kun so‘lidi-so‘lidi—oq bilan qorani farqlab bo‘lmayin qoldi. 
Men bir qo‘yin doriqog‘oz olib oldim. 
Fonus yoqib o‘qariq yoqaladim. 
O‘qariq ohista-ohista to‘ldi. 
Suv doriqog‘oz sharsharalab keldi. Suv doriqog‘oz sharsharadan toshdi. Suv shirr-shirr egat tushdi. 
Men o‘qariq yoqalab qadamladim. Doriqog‘ozlarga fonus tutib-fonus tutib qadamladam. 
Doriqog‘oz tushib ketmish quloqlar bo‘ldi. 
Men egatda tushib yotmish doriqog‘ozni olib quloqqa qo‘ydim. Quloq tevaragini loylab-loylab 
shibbaladim. 
Doriqog‘oz oqib ketmish quloqlar-da bo‘ldi. 
Men bundayin quloqlarga qo‘ynimdan boshqa doriqog‘oz olib qo‘ydim. 
Doriqog‘oz qiyshayib-qiyshayib qolmish quloqlar bo‘ldi. 
Men ana shu doriqog‘ozlarni sozlab-sozlab qadamladim. 
Chilla tunlar oppoq yuzli-oppoq yuzli bo‘ldi. 
Chilla yulduzlar bolaladi. 
Chipirtkalar chirr-chirr etdi. 
Fonusimni turli-tuman hasharotlar o‘rab-o‘rab aylandi. Fonusimni hasharotlar gir-gir aylandi. 
Fonusimni hasharotlar chirt-chirt chertib aylandi. 
Hasharotlar birin-ketin o‘lib-o‘lib aylandi! 
O‘qariqda suv urib ketmish joylar bo‘ldi. 
Men suv urib ketmish joylarni qo‘lim bilan bitab-bitab qadamladim. 
O‘qariq bir joyini yomon-yomon suv urdi. Suv egatlar osha shildir-shildir toshdi. Suv egatlar osha 
varaq-varaq toshdi. 
Men bilaklarimni turdim. Suv urib ketmish yoriqqa qo‘l tiqdim. Yoriqqa kesak tiqdim. Yoriqni 
nuqilab-nuqilab mushtladim. 
Suv hamon buloq bo‘lib tosha berdi. 
Men o‘qariq ostidan loy olib tiqayin, deya qo‘l uzatdim. Bir changal loy tortib ola-ola — ko‘ksim 
bilan suvga tushib ketdim. 

---

Tog‘ay Murod. Otamdan qolgan dalalar (roman) 
www.ziyouz.com
kutubxonasi 
88
Men shilta bo‘lmish ust-boshimni tashladim. Ishtonchan bo‘ldim. Yalang oyoq bo‘ldim. 
Men ishtonchan bo‘lib suv bitadim. Men yalangoyoq bo‘lib suv bitadim. 
Bir ko‘nglim ishtonchan bo‘lib suv taray berayin, dedim. Yana-tag‘in, pashshadan qo‘rqdim. 
Shiltadan-shilta ust-boshimni siqib-siqib kiyib oldim. 
Men o‘qariq bosh-adoqlab borib kela berdim. 
G‘o‘zalarim jildir-jildir suv ichdi. 
G‘o‘zalarim miriqib-miriqib suv icha berdi. G‘o‘zalarim tiniqib-tiniqib suv icha berdi. G‘o‘zalarim 
qonib-qonib suv icha berdi. 
Chilla suv — tilla suv bo‘ldi! 
Tun qaytdi. Oy og‘di. 
Oyoq-qo‘lim bo‘shashib-bo‘shashib qoldi. Ko‘zlarim ketib-ketib qoldi. 
O‘qariq boshida oyoq ildim. Fonusimni qabatimlatib qo‘ydim. 
O‘qariq bo‘yida maydaroq kalladay bir kesak bo‘ldi. 
Men ana shu kesakka yonboshladim. Yonboshdan chalqancha yotdim. 
Kesak boshimga botib-botib yotdim. 
Osmon ko‘rib-osmon ko‘rib yotdim. 
Chilla yulduzlar so‘lg‘in-so‘lg‘in bo‘ldi. 
Ko‘zim ilindi.