Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
157
— Nima... qizmisan? 
— Qizmidingki... dod deysan? 
— «Yula-a-a-a!.. — deya, yig‘lab-yig‘lab qo‘ya berdim. Osmon — tosh bo‘ldi. Yer — tosh bo‘ldi. 
Devor — tosh bo‘ldi... 
— Aytaman, «Sadist»boy, aytaman! — deya, yig‘lab-yig‘lab yolbordim. 
— Ana endi o‘zingga kelayapsan! — dedilar. 
— Qo‘ybering, «Sokol»boy, meni qo‘ybering! — deya, yolborib-yolborib yig‘ladim. — Aytaman, 
«Sadist»boy, mana-mana aytaman! 
— Ana endi esing kirdi! — dedilar. Mendan qo‘l oldilar. 
28 
Oppoq qog‘oz tikilib-tikilib shaylandim. Qalam ushlab-ushlab shaylandim. 
— Qani, yoz, qani, — dedi Ivan Ivanovich. — SSSR Bosh Prokurori o‘rinbosari o‘rtoq Sorokoga... 
Ivan Ivanovich aytib-aytib turdi. 
Men bitta qoldirmayin, bitib-bitib turdim. 
— Qani, menga ber, qani, — dedi Ivan Ivanovich. — Ay, kuchingdan, jigit! Ana endi jigitmisan-
jigit bo‘lding! Shugina gap uchun Sho‘ro qonun posbonlarini bir yildan ziyod qiynading-a! 
— Endi... ust-boshimni bersangiz deb edim. 
— Ust-bosh? Ust-boshni nima qilasan? 
— Manavi zindoni ust-bosh bilan qishloq borib bo‘ladimi? El-yurt nima deydi? Do‘st bor, 
dushman bor... 
Ivan Ivanovich og‘iz ushlab-og‘iz ushlab kuldi.
Ivan Ivanovich bet changallab-bet changallab kuldi. 
Ivan Ivanovich ko‘z artib-ko‘z artib kuldi. 
— Hay, jigit-ay, jigit-ay!.. — dedi. — Ayt, tag‘in nima qilay? 
— Tag‘in... meni kechasi bir mahalda olib kelib edilar. Men bediramdan-bediram kelib edim. Shu 
bois... ayta berayinmi? 
— Ayt-ayt? 
— Shu bois... bir-ikki so‘m yo‘lkira qarz berib tursangiz... deb edim. Bola-baqram oldiga eson-
omon yetib borsam armonim yo‘q... Omonatingizni chaqama-chaqa jo‘nataman... 
Ivan Ivanovich xandon-xandon kuldi. 
O‘NINCHI BOB
 
1
Sayyor sud Denov paxta zavodi madaniyat saroyida bo‘ldi. 
— Joyingizdan turing, sud kelayapti! El-yurt to‘la saroy bir qalqib oldi. 
— ...Aybdor Jamoliddinov Dehqonqul Aqrabovichga so‘ngso‘z beriladi! 
Bola-baqralarim qoshimda bo‘ldi. Xesh-aqrabolarim qoshimda bo‘ldi. Ko‘ngil yetarlarim-da 
qoshimda bo‘ldi. Unda, tag‘in, kimim... tag‘in kimim yo‘q bo‘ldi? 
— Shu... shu, dalalarimni bir ko‘rib ketayin, — dedim. 
— Kimni-kimni? — dedi qozikalon. 
— Dalalarimni bir ko‘rib ketayin... 
Qozilar o‘zaro qarashib-qarashib oldi. Qozilar o‘zaro bosh irg‘ashib-bosh irg‘ashib oldi. 
— ...Jamoliddinov Dehqonqul Aqrabovich O‘zbekiston Jumhuriyati jinoyat tuzugining 153-

---

Tog‘ay Murod. Otamdan qolgan dalalar (roman) 
www.ziyouz.com
kutubxonasi 
158
moddasiga binoan... sakkiz yil muddat bilan ozodlikdan mahrum etiladi! 
El-yurt to‘la saroy bir yig‘lab oldi! 
2 
Zindonmashina ravon-ravon yurdi. Zindonmashina do‘qib-do‘qib yurdi. 
Zindonmashina bir joyda manzil etdi. 
Temir eshik lang ochildi. 
Qizil askar avtomat bilan tush, ishorasini berdi. 
Men zindonmashinadan tap etib tushdim. 
Favqulodda yorug‘dan ko‘z ocholmadim. Ko‘zlarimni chirt yumib turdim. 
Ohista-ohista ko‘z ochdim... 
O‘zimni... o‘zimni shiyponimiz oldida ko‘rdim! 
Tevarak-boshim dalalarim bo‘ldi. 
Dalalarim sokin-sokin bo‘ldi. 
Dalalarimda qarg‘alar uchib-qo‘nib turdi. 
Dalalarimda qoramollar o‘tlab-o‘tlab yurdi. 
G‘o‘zalar shipshiydam g‘o‘zapoya bo‘ldi. 
G‘o‘zapoyalar shumshuk-shumshuk bo‘ldi. G‘o‘zapoyalar sariq-sariq bo‘ldi. 
G‘o‘zapoyalar bo‘y-bastidan... ushbu yil hosili mo‘l-mo‘l bo‘ldi!..