|
Yo'q! U (Qur'on) bir eslatmadir.
Bas, xohlagan kishi undan eslatma olur.
Ular faqat Alloh xohlaganidagina (Qur'ondan) eslatma olurlar. U (Alloh) taqvoga ahl (loyiq) va mag'firat ahli hamdir.
QIYOMAT SURASI
Surada qiyomat kuni bo'ladigan hodisotlar, qayta tirilishning haqligi, hisob-kitob, jazo va mukofotlar, dunyoparastlikning tanqidi, oxiratda Alloh o'zi tanlagan solih bandalariga diydorini ko'rsatishi, shirku kufrda o'tganlarning yuzlari qaro bo'lishi, o'lim achchig'i va boshqa muhim ma'lumotlar bayon etilgan.
Mehribon va rahmli Alloh nomi bilan (boshlayman).
Qiyomat kuniga qasamyod eturman.
Shuningdek, malomatchi nafsga qasamyod eturmanki, (qayta tirilib, hisob-kitob qilinursizlar)!
Inson uning (chirib ketgan) suyaklarini sira to'play (tiklay) olmasligimizni Bizdan gumon qilurmi?!
Yo'q, Biz uning barmoqlarini (ham tiklab) tekislab qo'yishga qodirmiz!
Balki, inson kelgusida fujur (gunoh ishlarni) qilishni istaydi.
"Qiyomat kuni qachon o'zi?" - deb so'raydi.
Bas, (Qiyomat dahshatlaridan) ko'z qamashganda,
oy ham tutilganda,
quyosh va oy birlashtirilganda,
ana o'sha Kunda inson: "(Jazodan) qochadigan joy qayerda?" - deb qolur!
Yo'q! Boshpana yo'qdir!
U Kunda yolg'iz Rabbing (huzurida) qaror topishgina bordir.
U Kunda insonga (dunyodalik choqida) qilib o'tgan va qoldirgan (barcha) narsalarning xabari berilur.
Balki, (U Kunda) inson (a'zolari) o'zining zarariga guvohlik beruvchidir.
Garchi (u) uzrlarini (o'rtaga) tashlasa ham.
(Ey, Muhammad, Qur'onni) tezroq (yodlab) olish uchun tilingizni u bilan qimirlatmay qo'ya qoling.
Izoh: Odatda Payg'ambar (a. s.) Qur'on suralari va oyatlarini Jabroil (a. s.)dan qabul qilib olganlaridan keyin o'zlarini qiynab bo'lsada, yoddan chiqarmaslik uchun ko'p takrorlar edilar. O'aq taolo ul zotni bu mashaqqatdan ozod etdi. Binobarin, vahiyni bir eshitishlarida yod olish qobiliyati ato etildi.
Zero, uni (Sizning dilingizda) jamlash ham, (tilingizdagi) qiroati ham Bizning zimmamizdadir.
Bas, qachon Biz (Jabroil tilida) uni o'qisak, Siz ham uni o'qishga ergashing!
So'ngra uni (Qur'onni) bayon qilib berish ham, albatta, Bizning zimmamizdadir.
Yo'q! (Ey, Makka mushriklari,) balki sizlar naqd (dunyo)ni yaxshi ko'rasizlar.
Oxirat (Kuni)ni esa tark etasizlar.
U Kunda ba'zi yuzlar yashnovchi,
Parvardigorlariga boqib turuvchidir.
Yana u Kunda ba'zi yuzlar burishgan,
o'zlariga, albatta, noxushlik bo'lishini o'ylab (kutib) turarlar.
Darhaqiqat, (jon) halqumga yetgan,
(vafot etayotganga): "Dam soluvchi kishi bormi?" - deb qolingan,
(jon taslim qilayotgan kimsaning) o'zi (bu dunyodan) ajralish ekanini anglagan,
(jon berish qiyinligidan) oyoq - oyoqqa chalishib qolgan bir vaqtda
yolg'iz Rabbingiz (huzuri)ga haydalish bordir.
Na (Qur'on va payg'ambarni) tasdiq etdi (u) va na namoz o'qidi.
Balki, u (Qur'onni) yolg'on dedi va (imondan) yuz o'girdi.
So'ngra gerdayganicha o'z ahli tomon ketdi.
(Ey, ko'rnamak inson,) holingga voy sening, yana voy!
So'ngra holingga voy sening, yana voy!
Inson o'zini bekor tashlab qo'yiladi deb o'ylaydimi?!
Axir, u (bachadonga) to'kiladigan maniydan iborat bir (haqir) nutfa emasmidi?!
So'ngra laxta qon bo'ldi. Bas, (Alloh uni) yaratib, tikladi.
So'ngra undan juftlar - erkak va ayolni (paydo) qildi.
Ana shu (Alloh) o'liklarni tiriltirishga qodir emasmi?!
INSON SURASI
Surada Alloh taolo inson zotini yo'qdan bor qilgani, so'ngra ikki qarama-qarshi yo'nalishga ravona qilib qo'ygani, kufr va imon egalarining oqibatlari, Payg'ambar (a. s.)ga tasalli beruvchi o'gitlar va boshqa ilohiy ko'rsatmalar mavjud.
Mehribon va rahmli Alloh nomi bilan (boshlayman).
Aniqki, inson uzra qachondir tilga olgulik narsa bo'lmagan vaqt (muddat) kechgan.
Izoh: O'sha tilga olishga arzimas vaqt qaysiligi to'g'risida ikki xil tafsir bor. Birinchisi, bu vaqt Odam Atogacha o'tgan davr. Ikkinchisi, insonning ona qornida to jon kirgunicha kechgan vaqt.
Darhaqiqat, Biz insonni imtihon qilib, (otalik va onalik suvlaridan) aralash bir nutfadan yaratdik. Bas, uni eshituvchi va ko'ruvchi qilib qo'ydik.
Darhaqiqat, Biz uni (insonni) xoh u shukr qiluvchi (musulmon) bo'lsin va xoh noshukr (kofir) bo'lsin, yo'lga yo'lladik.
Albatta, Biz kofirlar uchun zanjirlar, kishanlar va alanga (do'zax)ni tayyorlab qo'yganmiz.
Albatta, yaxshilar (jannatda) mizoji kofur bo'lmish qadahdan (may) ichurlar.
Allohning bandalari ichadigan (bu) chashmani (o'zlari xohlagan joydan) chiqarib (oqizib) olurlar.
Ular (dunyoda o'z zimmalariga olgan) nazrlarini ado qilurlar va yomonligi (dahshatlari) keng yoyiluvchi Kundan qo'rqurlar.
Taomni esa suyub tursalar-da, (o'zlari yemasdan) miskin, yetim va asirlarni yedirurlar.
(Ular ayturlar): "Bizlar sizlarni faqat Alloh "yuzi" uchun taomlantirurmiz. Sizlardan (bu ish uchun) biror mukofot va minnatdorchilik kutmasmiz.
Bizlar Rabbimiz (tomoni)dan bo'ladigan, (azobdan yuzlar) tirishib, burishib qoluvchi bir Kundan qo'rqurmiz".
Bas, Alloh ularni o'sha Kunning yomonligidan saqlar va ular(ning yuzlari)ga tarovat, (dillariga) surur baxsh etar.
Yana sabrlari sababli ularni jannat va (egnilariga) ipak (liboslar) bilan mukofotlar.
Ular u joyda so'rilarga yastangan hollarida o'tirurlar. U joyda quyosh (harorati)ni ham, zamharir (qish sovug'i)ni ham ko'rmaslar.
(Jannat) soyalari ularga yaqin va mevalari ham (uzishga oson bo'lishi uchun) egib qo'yilgan bo'lur.
Ularga kumush idishlar(da taomlar) va (o'zi kumushdan yasalgan bo'lsa-da, nafislikda) shisha bo'lib ketgan qadahlar(da sharoblar) aylantirilur.
Shisha bo'lganda ham kumushdan, (ularni soqiylar) o'lchab qo'yganlar.
(Jannat ahli) u joyda mizoji zanjabil bo'lmish qadahlarda ichirilurlar.
U yerdagi chashmaning nomi Salsabil deb atalur.
Izoh: Salsabil - o'timli, totimli (suv).
Ularning ustida mangu yosh g'ulomlar (xizmat qilib) aylanib tururlarki, ularni ko'rganingizda sochib yuborilgan durlar deb o'ylarsiz.
U joyga qaraganingizda, noz-ne'matlarni va katta hukmronlikni ko'rursiz.
Ustilarida yashil ipak va shoyi liboslar bo'lib, ular kumush bilakuzuklar bilan bezangan bo'lurlar va Parvardigorlari ularni pok sharob bilan sug'orur.
Do'stlaringiz bilan baham: |
