Microsoft Word kr oydinda yurgan odamlar ziyouz com doc

www.ziyouz.com кутубхонаси 
28
Бо дариғо, мен шундай одамми-а, дея эзилди. 
Оллоёр... тарки дунё қилди! 
Юрди-юрди, Қоратикон қишлоғига келди. Ундан Қубодиён қишлоғига ўтди. 
Тағин юрди-юрди, Вахшимор дея аталмиш макон сари дохил бўлди. 
Гуноҳларидан фориғ бўлиш учун тоат-ибодатга берилди. 
Eл-юрт хизматини қилди. 
16 
Eмишки, Оллоёр бундай қаради. Вахшиморда сув бўлмади. 
Шунда Оллоёр сой ёқалаб борди. Сой остига тушди. 
Бир ер намланиб турди, сув йилтираб турди. 
Оллоёр шу намни таёғи билан туртди. 
Ердан сув сизиб-сизиб чиқди. 
Оллоёр халфасига: 
— Шу таёқ билан ер чизиб, Вахшиморга из қилиб бора бер, — деди. 
Шунда халфаси: 
— Сув пастда бўлса, Вахшимор юқорида бўлса, сув қандай қилиб чиқади? — деди. 
— Сен илон изи қилиб юқорилаб бора бер, сув чиқмасдан қолмайди, — деди Оллоёр. 
Чиндан-да, сув таёқ изидан юқорилаб борди, Вахшиморлаб борди. 
Сув қуйидан юқорилаб оқди! 
Оллоёр сувни элга кўз-кўз қилди. 
— Қара — булоқ! — деди. 
Шу-шу, булоқ Қорабулоқ, дея аталди. 
Қорабулоқ йиллар мобайнида ўзанини катта олди. 
Мана, икки асдирким, Қорабулоқ қуйидан юқорилаб оқди. Қишин-ёзин қуримади. Қишда илиқ 
бўлди, ёзда совуқ бўлди. 
17 
Вахшимор — илонлар макони демакдир. 
Чиндан-да, ўтмишда Вахшимор илонлар макони бўлди. 
Илонлар Вахшимор оралаб юрди. 
Eл жонини ҳовучлаб-ҳовучлаб кун кўрди. 
Ана шунда, Оллоёр эл жонига ора кирди. 
18 
Eмишки, Оллоёр илонлар подшоси Оқ илон номига нома битди. 
Номани юраклироқ бир халфасига берди. 
— Бор, Оқ илон салтанатига бориб кел, — деди. 
— Қўрқаман, тақсир, — деди халфа. 
— Унда, салтанат қабрига ташлаб қайт, уёғига навкарлари етказади. 
Халфа номани қўйнига солди. Оқ илон қароргоҳига равона бўлди. 
Қароргоҳ Вахшимор қибласидаги Илонқара дегич сайҳонликда бўлди. 
Халфа манзилга етиб келди. Халфа сесканиб кетди. 
Илонқара ғиж-ғиж илон бўлди! Бармоқдай илонлар, билакдай илонлар, йўғон одам сонидай 
илонлар! 
Сариқ илон, кулранг илон, қора илон, айниқса, тошрангли чипорлари кўп бўлди! 
Халфа аросатда қолди. Боришини-да билмади, қайтишини-да билмади. 

---

Ойдинда юрган одамлар (қисса). Тоғай Мурод