Mexanika mashinasozlik fakulteti texnologik mashinalar va jihozlar kafedrasi

Lentali quritkichlar. Bunday quritkichlarda material uzuluksiz ravishda atmosfera bosimida quritiladi (12-rasm). Quritish kamerasi ichidagi ikkita baraban oʼrtasida uzuluksiz lenta tortilgan. Barabanlarning bittasi elektromotor yordamida harakatga keladi, ikkinchisi esa yordamchi boʼladi. Nam material lentaning bir uchiga beriladi, quruq material esa lentaning ikkinchi uchidan ajraladi. Quritish jarayoni issiq havo yoki tutunli gazlar yordamida olib boriladi.

Lentali quritgich: 1-quritish kamerasi; 2-lenta; 3-harakatlanuvchi baraban; 4- yordamchi baraban; 5-kalorifer; 6- bunker; 7-tayanch roliklari.

Bu tipdagi quritkichlar bitta yoki koʼp lentali boʼladi. Sanoatda koʼp lentali quritkichlar keng ishlatiladi. Koʼp lentali quritish apparatlarida qurituvchi agent nam materialga nisbatan perpendikulyar yoʼnalgan boʼladi. Material bir lentadan ikkinchisiga tushaetganda uning qurituvchi agent bilan kontakt yuzasi koʼpayadi. Bunday quritkichlarda quritish jarayonining turli variantlarini tashkil qilish mumkin.

Lentali quritkichlar koʼp joyni egallaydi va ularni ishlatish ancha murakkab (lentalarning choʼzilishi va barabanda notoʼgʼri joylanish holatlari roʼy berishi mumkin). Bunday apparatlarning solishtirma ish unumi kichik, solishtirma issiqlik sarfi esa katta, pastasimon materiallarni quritish mumkin emas.