Металлорганик бирикмалар (маърузалар матни) Магний-, натрий-, рух-, симоб- ва литийорганик бирикмалар

Металлорганик бирикмалар (маърузалар матни)
Магний-, натрий-, рух-, симоб- ва литийорганик бирикмалар. Галогенли бирикмалар, юқори СН кислоталик хоссасини намоён қиладиган углеводородлардан олиш. Кимёвий хоссалари. Кросс-бирикиш реакцияси. Қўшимча реакциялар. Металлорганик бирикмалар асосида органик бирикмалар синтези.

Металлорганик бирикмалар – таркибида углерод – металл боғини тутган бирикмалардир. Бундай аниқланиш органик кислота тузларини металлорганик бирикма эмаслигини билдиради, яъни уларда С-Ме боғи йўқ. Нисбатан барқарор органик бирикмалар ҳосил қиладиган металлар қаторига ишқорий металлар (литий, натрий, калий), ишқорий-ер металлар (кальций, магний), шунингдек алюминий, қалай, қўрғошин, рух, кадмий, темир, никел, хром ва симоб киради. Органик радикал сифатида алкил, алкенил, алкинил ёки арил бўлиши мумкин. Қуйида баъзи металлорганик бирикмалар келтирилган

1-гуруҳ – ишқорий металлар	2-гуруҳ – ишқорий-ер металлар	3-гуруҳ	4 гуруҳ
CH2=CHLi винил литий	C6H5MgBr фенилмагний бромид	[(CH3)2Be]n диметилбериллий (полимер)	CH3SnCl3 учхлоридметил-қалай
C2H5Na этилнатрий	(CH3)2Ca диметилкальций	[(CH3)3Al]2 учметилалюминий (димер)	(C2H5)4Pb тетраэтилқўрғошин
Ўтиш металлари
(C2H5)2Zn диэтилрух	CH3CdCl метилкадмийхлорид	C6H5HgCl фенилсимобхлорид	(C2H5)2Hg диэтилсимоб

Металлорганик бирикмалар хоссалари

Металлорганик бирикмаларнинг физик-кимёвий хоссалари С-Ме боғининг ионланиш даражасига боғлиқ. Бу боғ асосан ион (натрий ацетиленид HC≡C:^─Na⁺) ва ковалент (тетраэтилқўрғошин(C₂H₅)₄Pb) бўлиши мумкин. Металлнинг электромусбатлиги қанча юқори бўлса, С-Ме боғининг ионланиш даражаси шунча юқори бўлади ва бунда углерод диполнинг манфий учи хисобланади. С^δ─Ме^δ+
Электроманфийлик шкаласи ушбу боғни баҳолаш учун асос бўлиши мумкин. қуйидаги жадвалда С-Ме боғининг ионланиш даражаси келтирилган:

Боғ	Ионланиш %	Боғ	Ионланиш %	Боғ	Ионланиш %
С-K	51	С-Mg	35	С-Sn	12
С-Na	47	С-Al	22	С-Pb	12
С-Li	43	С-Zn	18	С-Hg	9
С-Ca	43	С-Cd	15

Металлорганик бирикмаларнинг реакцион қобилияти С-Ме боғининг ионланиш даражасига тўғри пропорционал. Шунинг учун калий ва натрий металлорганик бирикмалари ўта реакцион қобилиятли хисобланади. Улар ҳавода ўз-ўзидан ёниб кетади, сув ва карбонат ангидрид билан жуда тез реакцияга киришади. Ковалент боғли металлорганик бирикмалар масалан (CH₃)₂Hg диметилсимоб нисбатан камроқ реакцион қобилиятли ва ҳавода барқарор, қутбсиз эритувчиларда эрийди.