Мазкур ўқув услубий мажмуа фаннинг ишчи ўқув дастури ва ишчи ўқув режасига мувофиқ ишлаб чиқилди

Сигнални ўзгартириш турлари. Аналог сигналларга ишлов берилганда улар кучайтирилиши, кўпайтирилиши, солиштирилиши, қиймати чегараланиши, частотаси фильтрланиши ва бошқа ўзгартишларга учраши мумкин.
Кучайтириш, солиштириш, кўпайтириш каби сигнал ўзгартиришлар кенг кўламда ишлатиладиган, саноатда серияли ишлаб чиқарилаётган аналог интеграл микросхемалар (АИС) ёрдамида амалга оширилади.
Кучайтириш деганда сигнал (кучланиш ёки ток) амплитудаси, кучланиш манбаи энергиясини чиқиш сигнали энергиясига ўзгартирилиши ҳисобига частоталарнинг чегараланмаган оралиғида ночизиқли бузилишларсиз К_U марта кўпайтириш тушунилади. Сигналларни кучайтириш операцион кучайтиргич (ОК)лар, видеочастоталарнинг кенг полосали ва ЮЧ кучайтиргичлари ёрдамида амалга оширилади.
Чизиқли аналог ўзгартиришларни амалга оширишда ОК негиз қурилма бўлиб хизмат қилади. Ночизиқли аналог ўзгартиришларни амалга оширувчи асосий қурилма сифатида сигналларни аналог кўпайтиргич хизмат қилади. У иккита киришга эга бўлган ўзгартгичдан иборат бўлиб, Х ва У аналог катталиклар кўпайтмаси U_ЧИҚ ни аниқлайди:
,
бу ерда, К – масштабловчи коэффициент бўлиб, Х ва У га боғлиқ эмас.
Сигналларни аналог кўпайтиргич универсал қурилма бўлиб, у кўпайтириш, бўлиш, даражага кўтариш, илдиз чиқариш каби амалларни бажариш учун ишлатилади. Кўпайтиргичлар асосида барча турдаги детекторлар, модулятор - демодуляторлар, актив фильтрлар, бошқарувчи генераторлар ва бошқалар ҳосил қилинади.
Компаратор иккита аналог катталик U₁ ва U₂ ни маълум аниқлик Δ билан солишитириш функциясини бажаради. Компаратор ОК асосида яратилган ночизиқли тескари алоқа билан қамраб олинган махсус қурилмадир. У исталган шакл ва давомийликдаги сигналларни ҳосил қилиш, ўлчаш ва аналог ахборотни рақамлига ўзгартириш учун ишлатилади.
Баъзи кучайтиргичларда кириш ва чиқиш кучланишлари боғлиқлиги чизиқли бўлади. Қатор ҳолатларда ортиб борувчи ёки камаювчи узатиш коэффициентли кучайтириш зарур бўлади. Бунда ОКларнинг тескари алоқа (ТА) занжирлари чизиқли (резистор) ва ночизиқли (диод, стабилитрон) элементлардан тузилган мураккаб бўлгичлар кўринишида яратилади. Бундай қурилмаларда чиқиш сигнали кириш сигналининг маълум қийматидан бошлаб ўзгармас бўлиб қолади.