Mavzular: Pedagogik mahorat haqida tushuncha, uning oʻqituvchi faoliyatidagi oʻrni va ahamiyati. Pedagogik fikr tarixi va maktab amaliyotida

Aksiologik yondashuvga koʻra, pedagogik madaniyat – tarbiya haqidagi fan sifatida pedagogika tayanadigan pedagogik qadriyatlar majmuidir. Ushbu qadriyatlar moddiy va ma’naviy shakllarda mavjud boʻladi. Shaxsga yoʻnaltirilgan yondashuv nuqtai nazariga koʻra, pedagogik madaniyat – bu pedagogik faoliyatdagi tarbiyaviy munosabatlarni amalga oshiruvchi subyekt sifatida kasbiy yetuk pedagog shaxsining muhim sifati.
Faoliyatli yondashuvga koʻra, pedagogik madaniyat – bu pedagogik qadriyatlarning tadbiq etilishini ta’minlovchi, oʻqituvchi kasbiy faoliyatining oʻziga xos usullari majmuidir.
Pedagogik madaniyatning mufassal tavsifi L.D.Stolyarenko tomonidan quyidagicha ochib berilgan: “Pedagogik madaniyat – bu umuminsoniy madaniyatning bir boʻlagi boʻlib, unda eng avvalo, avlodlar almashinuvi va shaxsning ijtimoiylashuvi kabi tarixiy jarayon uchun xizmat qilishda insoniyat uchun zarur boʻlgan ma’naviy va moddiy qadriyatlar aks etgan”.
Oʻqituvchining pedagogik madaniyati quyidagi kasbiy ahamiyatli shaxs sifatlarining mavjud boʻlishini taqozo etadi:
1) shaxsga yoʻnalganlik: e’tiqod, ijtimoiy faollik, fuqarolik tuygʻusining mavjudligi;
2) kasbiy-axloqiy sifatlar: insonparvarlik, jamoaviylik, adolat, mehribonlik, samimiylik, haqiqatparvarlik, talabchanlik, bolalarga nisbatan mehr va hurmat, oliyjanoblilik, xolislik;
3) pedagogik mehnatga munosabat: vijdonlilik, javobgarlik tuygʻusi, fidokorlik, berilib ishlay olish va oʻz pedagogik faoliyatidan qoniqish hissi, uni hayot mazmuniga aylantira olish;
4) qiziqishlar va ma’naviy ehtiyojlar: bilishga oid faollik, tafakkurning kengligi va teranligi, estetik madaniyat, qiziqishlarning va ma’naviy ehtiyojlarning koʻp qirraliligi, yoqtirgan ijodiy ishning mavjud boʻlishi, tashqi koʻrinish va nutq madaniyati.