Mavzu: “Vatan himoyasi – muqaddas burch”

Dars uslubi: suhbat

Darsning borishi:

O’tilgan mavzuni so’rash

1. 
   Savob nima?
   
2. 
   Qanday gunoh ishlarni bilasiz?
   

Yangi mavzu bayoni

O’quvchilar fikrini bir joyga jamlash uchun ushbu she’rni o’qib (yoki yoddan aytib) berish foydalidir.

Zamin tayanchi

Ko’zga surting Vatan tuprog’in abad,

Mangu nur taratsin ko’k cho’lponlari.

Yo’lingiz yoritsin ko’hna saodat,

Ey ozod gulshanning alp o’g’lonlari.

Mudom safda turing sadoqat bilan,

Zarra yov ko’rmaylik bo’stoningizda.

Mardlik kamarida chaqnab adolat,

Tinchlik ulug’lansin dostoningizda.

Har tomonlama yetuk yoshlargina Vatanni himoya qila oladilar. Bugungi zamon yoshlari maktab partasidanoq vatanparvarlik ruhida tarbiya olishi ham farz, ham qarzdir. Ular o’z mamlakatlari sarhadlarini qo’riqlaydilar. Shu bois har bir yigit-qiz Vatanga xizmat qilishni o’zining muqaddas burchi deb bilishi lozim. Ana shu tuyg’u har bir yoshning qalbidan chuqur joy olishi darkor.

Askar qo’shig’i

Mashq qilib vujuding tinmay chiniqtir,

Jisming sezgir bo’lsin, nigohing o’tkir

Olovda toblangin, muzdek suvga kir,

Yov makrin ilg’ab ol, o’zing berma sir,

Shaxdam yur, chaqqon suz, samolarni quch,

Bir,ikki, uch!

Bir,ikki, uch!

Qadaming dadil bos hech, ikkilanmay

Mard o’zbek nomingni desang sharaflay,-

El-yurtga sodiq bo’l yurtboshimizday,

Vataning qo’riqla hushyor hamda shay.

Shaxdam yur, chaqqon suz, samolarni quch

Bir, ikki, uch!

Bir, ikki, uch!



O’qituvchi: - Bugun sizlar yana bir bor bilimdonligingiz va Vatanga e’tiqodli bolalar ekanligingizni namoyon qildingiz. Men sizlardan juda minnatdorman.

Bolalar, endi, sizlar quyidagi so’zlarga e’tibor berishingizni va yodda saqlab qolishingizni eslatib o’tamiz

Fuqaro - shu mamlakatda istiqomat qiladigan kishi.

Muqaddas – hamma narsadan aziz

Sajdagoh – inson sig’inadigan joy

Mustaqil – erkin, ozod

Bilarjon: - Bolalar, keling, biz doimo yodimizda tutishimiz lozim bo’lgan so’zning ma’nosini barchamiz birgalikda qaytaib olamiz:

- Vatan, bu biz tug’ilib voyaga yetayotgan zamin, musaffo osmon, jonajon O’zbekiston, yaqinlarimiz, mehnatkash xalqimiz, barchasi Vatanimizdir. Biz uni sevishimiz, ardoqlashimiz kerak. Uning xizmatiga doim shay turishimiz, a’lo baholarga o’qib, uning ravnaqiga hissa qo’shishimiz lozim. Siz ta’lim olayotgan maktab ham uning bir bo’lakchasidir. Demak, biz va siz maktabimiz ozodaligiga hissa qo’shishimiz, undagi buyumlarni, narsalarni asrab – avaylashimiz lozim. Chunki kelajakda shu maktabda ukalarimiz, yaqin qarindoshlarimiz ta’lim oladilar. Shunday qilsak, ona – Vatanimiz biz va sizdan minnatdor bo’ladi