Mavzu: strategiyani amalga oshirish: kompetentlik, qayta tashkil etish va struktura

Mavzu: STRATEGIYANI AMALGA OSHIRISH: KOMPETENTLIK, QAYTA TASHKIL ETISH VA STRUKTURA.
Menejerlar kompaniya strategiyasini yaratganlaridan so‘ng, uni amalga oshirishlari va yaxshi natija olishlari lozim. Strategiyani hayotga tadbiq etish jamoani jalb eta bilishni, alohida boshqaruv ko‘nikmalarini va turli vazifalarni yechishni talab qiladi. Strategiyani yaratish – bu bozorga yo‘naltirilgan boshqaruv muammosi bo‘lsa, uni hayotga tadbiq etish esa asosan operatsiyalarga, faoliyatga ya’ni insonlarni va xo‘jalik jarayonlarini boshqarishga qaratilgan. Agar muvaffaqiyatli strategiyani yaratish vaziyatni oldindan ko‘rish va tarmoqni chuqur tahlil etish, hamda tadbirkorlikka tashabbuskorlik bilan yondoshish bo‘lsa, strategiyani muvaffaqiyatli amalga oshirish - bu rahbarning insonlarni motivlashi, ularni ehtiyojlarini qondirishi, hamda tashkilotning asosiy faoliyat turlarini va strategiyani amalga oshirishda topshiriqlarni bajarilishini ta’minlashdir.
Strategiyani amalga oshirish – bu asosan menejerning tashkiliy o‘zgarishlarni amalga oshirishi, xo‘jalikni to‘g‘ri yuritishi va ishchi-xodimlarni maqsadlarni bajarishga jalb etish jarayonidir.

Strategiyani amalga oshiruvchining vazifasi – strategik rejani hara-katga keltirishdan, strategik va moliyaviy rejani bajarilishini ta’minlaydigan tadbir choralarni amalga oshirishdan iborat.
Strategiyani yaratish va amalga oshirish tajribasiga va ko‘nikmalariga ega menejerlarning e’tirof etishicha, samarali strategiyani yaratishga qaraganda uni amalga oshirish murakkab muammo hisoblanadi. «Umuman olganda qaysi tomonga yurish kerakligini aniqlash biz uchun qiyin vazifa emas, lekin tashkilotni shu yo‘nalishda harakatlantirish murakkab vazifa» deb ta’kidlaydi menejerlar. Strategiyani amalga oshirish uni yaratishga qaraganda murakkab hisoblanadi. Chunki keng ko‘lamli tadbir-choralarni amalga oshirishni, muammoning ko‘p sonli yechimi variantlarini, insonlarni boshqarish ko‘nikmalarining mavjudligini, tashabbuskorlikni shakllantirishni va boshqarishni, katta muammolarni yechishni va o‘zgarishlarni amalga oshirishga nisbatan qarshiliklarni yengishni nazarda tutadi. Yangi strategiyani e’lon qilinishi bu ijrochilar uni birdaniga qabul qilib, amalga oshirishga kirishdilar degani emas.
Ikkilanuvchilar, shubhalanuvchilar, ham ko‘plab topiladi. Bundan tashqari kompaniya xodimlari strategiyani har xil talqin etishlari mumkin. Amalga oshiriladigan o‘zgarishlarning kompaniya bo‘linmalariga ta’sirini salbiy baholashlar natijasida qarshiliklar kuchayadi. Menejerlar yangi strategiyani amalga oshirishga kirishgan paytda, eskidan shakllangan manfaatlar, munosabatlar va tashkiliy usullar o‘z-o‘zidan yo‘qolmaydi. Ushbu vaziyatlarni tartibga solish, noroziliklar va shubhalarning manbalarini bartaraf etish, manfaatdor tomonlarni kengaytirish, muammolarni yechishga yagona yondashuvni shakllantirish uchun samarali boshqaruv usullarini va ko‘nikmalarini qo‘llash talab etiladi. Tashkilotning muvofiqlik va kelishuvchanlik darajasiga qarab, strategiyani amalga oshirish muddatlari bir necha oydan bir necha yilgacha davom etadi.